Эвел 39 - Гирами Китаб

Юсуф ва Патифарин хпир

¹ Юсуф Египетдиз хуру ва фяряуьн уьрхру эскрарин аьхюр вуйи египетжви Патифари ариш-веришчйирихьан думу масу гъадагъуру.

² РАББИ Юсуфдихъди хъайи. Египет жвуван, чан аьхюрин, хулаъ яшамиш шули Юсуфди, хъуркьувалар гъазанмиш апӀурайи.

³ Дугъан аьхюриз, РАББИ Юсуфдихъди хъайиб, дугъу апӀру гьарсаб ляхниъ РАББИЙИ дугъаз хъуркьувал туврайиб, рябкъюрайи.

⁴ Патифариз Юсуф кьабул шулу ва дугъкан чан сарпи гъуллугъчи апӀуру. Патифари думу чан хулан ва девлетнан аьхюрди дерккру ва вари мулк-девлет дугъан хилиъ ивру.

⁵ Патифари чан хулан ва девлетнан аьхюрди думу дерккхъанмина, РАББИЙИ дугъан хал, Юсуф бадали, ужувлакк ккипнийи. РАББИЙИН ужʼвал Патифарин варибдиин алийи – гьам хян-хулʼин, гьам хяр-хутӀлиин.

⁶ Гьаддиз дугъу чаз айиб вари Юсуфдин хилиъ ивнийи. Патифарин вари гъайгъушнар ккудуркӀнийи, дугъаз гъубзрайиб анжагъ ипӀубтӀан дайи. Юсуф жандинра, машнанра уччвур вуйи.

⁷ Ва саб вахтналан чан аьхюрин хпирин Юсуфдихъ ул шулу, хъа кӀуру: – Узухъди йихь!

⁸ Аммаки дугъу гьамци кӀуру ва рази шулдар: – Узу имиди, йиз аьхюриз сабдиканра фикир апӀуб лазим дар. Вари чаз айиб йиз хилиъ ивна.

⁹ Му хулаъ узу варитӀан аьхюрди дерккназу. Йиз аьхюри узухьна, чан хпирин ктарди, варибдин аьхювал тувна. Уву дугъан хпир вува. Фици узхьан гьациб, зурба вуйи пис ляхин ва Заануриз къаршу гуннагь апӀуз шулу?

¹⁰ Аьхюрин хпири гьеле дугъаз гьар йигъан чахъди йихь кӀури гъахьнушра, Юсуф дугъахъди хьуз рази гъахьундайи.

¹¹ Саб ражари, ляхин ади, Юсуф чан аьхюрин хулаз гъюру. Хуландарикан хулаъ фужкӀара адайи.

¹² Дишагьлийи, дугъан ккурттарихъан хъичӀирхну: – Узухъди дахъ! – кӀуру. Амма Юсуф, чан зиълан ккуртт дугъан хиларигъ гъибтну, учв гъютӀурччвну, гьергру.

¹³ Чан хиларигъ ккуртт гъибтну, Юсуф гьергну гъушуб дябкъну,

¹⁴ дишагьлийи хулан гъаравшариз дих дапӀну кӀуру: – Лигай, гьаму жугьуд йиз жилири ухьухьна ихь хулаз духна, хъа дугъу ухьу биябур апӀура! Дугъаз, мина дуфну узухъди дахъуз ккун гъабхьну, хъа узу чӀигъар апӀуз хъюгъюнза,

¹⁵ хъа думу, йиз чӀигъарихьан гучӀ дубхьну, чан ккуртт гъибтну гьергну гъушну.

¹⁶ Хпири Юсуфдин ккуртт, дугъан аьхюр хулаз гъяйизкьан хилиъ дибисну гъибтнайи.

¹⁷ Дугъазра дугъу му гьядиса гьамци ктибтнийи: – Уву ухьухьна хъади гъафи гьадму жугьуд лукӀраз, узухьна дуфну, узу нянайикк ккитуз ккун гъабхьну,

¹⁸ хъа узу чӀигъар апӀуз хъюгъиган, чан ккуртт узухь гъибтну, учв гьергну гъушну.

¹⁹ Дугъан аьхюр хпирин ихтилатнахъ хъпехъуру. Хпири кӀуру: «Магьа яв лукӀру узкан гъапӀуб». Дугъаз ижмиди хъял гъюру

²⁰ ва, Юсуф дидисну, паччагьдин дустагъдиъ итру. Гьамци Юсуф дустагъдиъ ахъру.

²¹ Душваъра РАББИ гьадгъвахъди хъайи. РАББИЙИ дугъаз рягьимлувал ва дустагъдин аьхюрин ихтибарлувал тувнийи.

²² Дустагъдин аьхюри Юсуф, дустагъдиъ итнайи варидарин зиин аьхюрди дерккнийи ва дугъу дустагъдин вари ляхнарихъанди жавабра тувуйи.

²³ Юсуфдиин, хъугъʼвал дапӀну, илипнайи ляхнин гьякьнаан дустагъдин аьхюриз фикиркьан ктайи, гьаз гъапиш, РАББИ Юсуфдихъди хъайи ва вари ляхнариъ дугъаз хъуркьувалар гьауйи.