Эвел 37 - Гирами Китаб

Юсуфдин нивкӀар

¹ Якьуб чан адаш гъурабади яшамиш гъаши Ханаан уьлкейиъ яшамиш шулайи.

² Магьа Якьубдин тухмикан ихтилат. ЙицӀиургуд йисаъ айи Юсуф, чан дархи чвйирихъди, дурариз кюмек апӀури, марччарихъ хъайи. Чвйир дугъан адашдин Зилфи ва Билха кӀуру лукӀ хпарикан духьнайидар вуйи. Юсуфди дархи чвйирикан чпин адашдиз чӀуруди ктибтури шуйи.

³ Израилиз (Якьубдиз) чан баяригъ варитӀан ккунир Юсуф вуйи, фицики Юсуф чан адаш кьаби гъашиган бабкан гъахьир вуйи. Гьаддиз Юсуфдиз багьади дабалгнайи ккурттра гъибирхнийи.

⁴ Гъардшариз Юсуф, чпин адашдиз варитӀан ккунир вуди гъяркъган, думу даккун гъахьнийи ва гьаддиз дугъахъди чвйири аькьюллуди гафаркьан апӀури шулдайи.

⁵ Саб ражари Юсуфдиз нивкӀ рябкъюру. Дугъу дидкан чвйириз ктибтуру, хъа дурариз думу имбубтӀан артухъ даккун шулу.

⁶ Дугъу дурариз гъапи: – Хъебехъай, узуз фициб нивкӀ гъябкънуш.

⁷ Ухьу хутӀлиъ дяхнин шилар йитӀури айхьа, ва саб дупну йиз шил за дубхьну дийибгъуру, хъа ичв шилар дидлан илтӀикӀуру ва йизубдиз икрам апӀуру.

⁸ Чвйири дугъаз гъапи: – Увуз учʼин паччагьвал апӀуз ккунди айвуз? Учу яв хликк ккади хьидийин? Дурариз думу имбубтӀан артухъ даккун гъахьнийи, гьаз гъапиш дугъан нивкӀ ва ктибту ихтилат чвйириз кьабул гъабхьундайи.

⁹ Дугъаз сабсана нивкӀ рябкъюру ва дидканра Юсуфди чвйириз ктибтуру: – Хъебехъай, узуз сабсана нивкӀ гъябкъюнзуз: му ражари узуз ригъди, вазли ва йицӀисаб хядру икрам гъапӀунзуз.

¹⁰ Дугъу нивкӀкан неинки чвйириз, хъа адашдизра ктибтнийи. Адашди дугъаз тягьнара гъивнийи: – Рякъюрвуз увузра нивкӀар. Учу: узу, яв дадайи ва яв чвйири дуфну увуз жилиинакьан икрам апӀур кӀури хиял вуяв?

¹¹ Чвйириз дугъкан хъял кайи, хъа адашди му гьядиса кӀваин гъитнийи.

Чвйири Юсуф масу тувуб

¹² Чвйир, адашдин марччарин сюрйир хъаъну, Шехемдин багарихьнакьан душнайи.

¹³ Израили Юсуфдиз гъапи: – Яв чвйир марччарихъ Шехемдин багарихьна душнайиваликан аьгъявуз, узуз уву дурарихьна гьауз ккундазуз. – Узу гьязур вуза, – жаваб туву Юсуфди.

¹⁴ Адашди дугъаз гъапи: – Душну, яв чвйир, марччарин сюрйир – вари сагъ-саламатди вуш аьгъю апӀин ва узуз жаваб хьади гъач. Дугъаз адашди му табшуругъ Хеврон дерейиъ имиди тувнийи. Юсуф Шехемдиз гъушу.

¹⁵ Думу душван чюллериъ, сар рякъюъ айи кас алахъайизкьан, ургну гъузнийи. Думу касди Юсуфдихьан гьерхру: – Фу абгурава?

¹⁶ Юсуфди: – Узу йиз чвйир агураза, – гъапи. – ТӀалаб вуйиз, йип узуз, чпин сюрйирра хъади дурар наан гъяркъюнвуз?

¹⁷ – Дурар мушвʼан гъушну, – жаваб туву рякъюъ айири. – Узуз, дурари: «Дотандиз гъягъидихьа», кӀури гъеебхьунзуз. Юсуф чвйирин шилнаъди гъушу ва дурар дугъаз Дотандихъ гъидихъу.

¹⁸ Чвйириз Юсуф ярхлаан гъяркънийи ва думу, багахь хьайиз, йивну йикӀуз гьял гъапӀнийи.

¹⁹ – Гьатмагьа, гъюра думу нивкӀархъан! – кӀуру дурари чиб-чпиз.

²⁰ – Гъачай, думу йивну йикӀидихьа ва деебццнайи гъуйдизди ипдихьа, хъа думу вягьши гьяйванатди гъипӀну, пидихьа. Гьеле лигурхьа, дугъан нивкӀарикан фу шулуш.

²¹ Мицдар гафар гъеерхьу Рувим Юсуфдихъанди хъюгъру ва дурариз гьамци кӀуру: – Ваъ, думу йивну йикӀидархьа.

²² Дугъу давам гъапӀу: – Ифи муудубзанай. Думу гьамушваъ, къуру чюллериъ айи гьатму гъуйдиъ, итай, аммаки дугъʼина хил за мапӀанай. Рувимдиз, Юсуф дурарин ниятариккан ккадаъну, чпин адашдихьна кьяляхъ гьауз ккунди айи.

²³ Юсуф чвйирихьна хъуркьиган, дурари Юсуфдилан гьадму багьади дабалгну дибирхнайи ккуртт уьлчӀюбгъюру

²⁴ ва думу учв гъуйдизди ипру. Гъуйи шид адарди ичӀиб вуйи.

²⁵ Дурариз, уьл ипӀуз деубси, Галааддианмина гъюрайи исмаиларин (дурариз мидьянарра кӀури гъахьну) ариш-веришчйирин девйирин сюри рябкъюру. Дурарин девйир Египетдиз гъахурайи ицци ниар хъайи укӀарин, мялгьямарин ва аьтрарин гъагъарихьди алацӀнайи.

²⁶ Ягьудайи чвйириз гъапи: – Ухьуз ихь гъардшин ифи удубзну, думу йивну йикӀуб жиниди гъибтбакан фу хайир ахъа?

²⁷ Ариш-веришчйириз масу тувиш ужу шул, дугъʼина хил за апӀубра рубкьидар; фици вушра думу ихь гъардаш дарин, ихь йикк ва ифи дарин. Гъардшар дугъахъди рази гъаши.

²⁸ Ариш-веришчйир багхьантина гъярайиган, гъардшари Юсуф гъуйдиан адагъну, къаб шекел арсрахъ ариш-веришчйириз масу тувру. Ариш-веришчйири думу Египетдиз гъахуру.

²⁹ Гъуйдихьна кьяляхъ хътаку Рувимдиз Юсуф душваъ имдарди рябкъюру ва дугъу чаин али палтар чӀяргъюру.

³⁰ Думу чвйирихьна гъюру: – Бай душваъ имдар! Гьамус гьапӀзакӀан? – кӀуру.

³¹ Дурари, Юсуфдин гьадму ккуртт гъадабгъну, цӀигь дубккну, ккуртт дидин ифдиан апӀуру.

³² Хъа ифдиан дапӀнайи, багьади дабалгну дибирхнайи думу ккуртт адашдихьна гъабхуру ва кӀуру: – Магьа фу учуз гъибихънуш. Лиг, гьаму яв балин ккуртт дарин?

³³ Дугъаз аьгъю шулу ва гьарай апӀуру: – Му ккуртт йиз балинуб вуйиз! Думу вягьши гьяйванатди гъитӀну! Валлагь, Юсуф парчйир гъапӀну!

³⁴ Якьубди, дерднан лишан вуди, чаин али палтар чӀяргъюру, ирин парчи хъибиржну, гизаф йигъари балихъ ишуб-гъам зигури гъузру.

³⁵ Думу ккарцуз дугъан вари баяр-шубар гъюру, аммаки дугъаз чан дерд яваш апӀуз ккунди адайи. Дугъу кӀуйи: – Ваъ, узу йиз балихьна тму дюнʼяйиз гъягъяйизкьан дерд зигури хьидиза! Гьамци адашди чан балихъ дерд зигури гъахьнийи.

³⁶ Хъа ариш-веришчйири чпин нубатнаъ Юсуф Египетдин паччагь фяряуьн уьрхру эскрарин аьхюр вуйи Патифариз масу тувнийи.