Эвел 34 - Гирами Китаб

Динайиз гъапӀу аьрвал

¹ Дина, Лияйикан вуйи Якьубдин риш, думу йишван шубарихьна гъушнийи.

² Думу уьлкейин аьхюр вуйи хиввейжви Хамурин бай Шехемдиз Дина рякъюру ва дидисну дугъʼина аьрвал хуру.

³ Думу балин юкӀв Динайик, Якьубдин шурак, кабсру. Думу дугъаз ккун шулу ва шураз уччвудар гафар апӀуру.

⁴ Хъа чпин адашдиз: – Му риш узуз швушвди ча йип, – кӀуру.

⁵ Якьубдиз, чан шурʼина аьрвал хуб аьгъю шулу. Думу вахтна дугъан баяр ятгъариъ малар-марччар уьрхюри ярхлаъ ади гъахьну. Дурар гъяйиз Якьуб ккебехъну гъузнийи.

⁶ Шехемдин адаш Хамур Якьубдихьна му ляхин албагуз гъюру.

⁷ Мидкан хабар гъеебхьу Якьубдин баяр хулаз гъюру. Дурарик яман хъял кубчӀвнайи, фицики Якьубдин шурʼина аьрвал хувал – му думуганра гьамусра Израилиъ зурба аьйиб ву: мици апӀуб зат хьуз мумкин вуйи ляхин дар!

⁸ Хамури гъапи: – Йиз бай Шехемдихьан яв риш дарди ктисуз шуладариз! Узу ичв риш ча кӀури дуфнайир вуза!

⁹ Учву учукди кдикьидичва. Ичв шубар учуз швушварди, ич шубар учу учвуз швушварди туври хьидихьа.

¹⁰ Учухъди сатӀиди яшамиш йихьай, ич ватан ичв улихь хьа: ккунишваъ яшамиш йихьай, азадди лицай, жил ичв хусусиятдиз илтӀибкӀай.

¹¹ Хъа Шехемди Динайин адашдизна гъардшариз гьамци гъапи: – Узухьна рягьимлу йихьай, учву гъапиб вари тувурзачвуз!

¹² ВаритӀан зурба кьимат ва варитӀан багьа багъишар йипай, учву гъапиб вари тувурзачвуз, анжагъ узуз риш швушвди чавай!

¹³ Хъа Якьубдин баяри Шехемдизна дугъан адаш Хамуриз аьмал ади гьамциб жаваб туву, фицики Шехемди дурарин чи Динайиин аьйиб илипнайи:

¹⁴ – Учхьан дици апӀуз хьибдарчухьан, – гъапи дурари. – Суннат дапӀну адру касдиз ич чи тувуз хьибдарчухьан, фицики думу учуз биябур хьувал ву.

¹⁵ Аммаки учу саб ляхнизтӀан рази хьидарча: учвура учуси хьузди, вари ичв жиларин суннат дапӀну ккунду.

¹⁶ Гьадмуган учу учвуз ич шубар швушварди туври ва ичв шубар учуз швушварди хури апӀидича, гьаци гъабхьиган учу учвукди кдикьидича ва учвухъди саб халкьди хьидича.

¹⁷ Хъа эгер учву учухъ хъпебехъиш ва ичв суннатар дарапӀиш, учу ич чи гъадагъну удучӀвну гъярча.

¹⁸ Хамуризна Шехемдиз мицдар тӀалабар кьабул гъахьнийи.

¹⁹ Жигьили шлубкьан ухди чан суннат апӀуз гьял гъапӀнийи – гьаци ижмиди дугъаз Якьубдин риш ккун духьнайи. Шехем чпин адашдин тухмиъ варитӀан гьюрматлу кас вуди гъахьну.

²⁰ Ва магьа, шагьрин урнарихъна дуфну Хамурина Шехемди халкьдиз гьамци гъапи:

²¹ – Думу адмийир мясляаьт ккуни адмийир ву. Гъит дурар ихь ругариин биналамиш ишри ва азадди лицри. Дураризра кади ккунибкьан жил ахьуз. Дурарин шубар ухьуз швушварди гъадагъидихьа ва ихь шубар – дурари.

²² Аммаки дурарин ухьухьна вуйи саб тӀалаб а: дурариси ухьура ихь варидарин суннат дапӀну ккунду.

²³ Дурарин лижар, дурарин мутму, дурарин мал-къара, эгер дурарин тӀалаб ухьу кьабул гъапӀиш – вари ихьуб хьибди, ва дурар ухьухъди сатӀиди яшамиш хьуз хъюгъди!

²⁴ Шагьрин агьалйир Хамурина Шехемди кӀурубдиз рази гъаши ва шагьрин вари жилари чпин суннат гъапӀу.

²⁵ Шубудпи йигъан, дурар иццури имиди, Якьубдин баяр вуйи, Динайин багъри гъардшар Симеонна Левийи чпин турар гъадагъну, саб манигъʼвалра адарди шагьриъ архьнийи ва саркьан гъидидипди вари жилар йивну гъийихнийи.

²⁶ Хамурна Шехемра туриинди дийихну, Шехемдин хулʼан Дина адагъну хъади гъягъюру.

²⁷ Хъасин Якьубдин баяри, шагьриз дуфну, думу тӀараш гъапӀнийи, фицики му шагьриъ дурарин чуччʼина аьрвал дубхнайи.

²⁸ Дурари, шагьриъ ва чӀурдиъ айи дурарин мал-марчч, дажйир,

²⁹ хиввеярин вари девлет, вари бицӀидар ва хпар йисирвализ гъадагъну, хулариъ айиб вари тӀараш дапӀну гъушнийи.

³⁰ Якьубди Симеондизна Левийиз гъапи: – Учву узʼин бала илипунчва! Му йишван халкьариз – ханаанеяризна перизеяриз узкан душман ктаунчва. Ухьуз цӀибтӀан адмийир адархьуз, хъа дурар сатӀи хьиди, узу йивну йикӀиди ва ихь вари тум ккадабхъиди!

³¹ Хъа Симеондина Левийи гьамциб жаваб тувнийи: – Дурариз шли ихтияр тувну ич чуччкан лицру дишагьлийикансдар апӀуз!