Эвел 3 - Гирами Китаб

Гуннагь арайиз гъюб

¹ РАББИ Заанури гъапӀу гьяйванатаригъ варитӀан аьмалдаруб битӀ вуйи. Диди дишагьлийихьан гьерхру: – Му багъдин сабкьан йимиш мипӀанай кӀури Заанури дугъридан гъапнийинхъа?

² Хъа дишагьлийи битӀраз гъапи: – Заанури гъапунчуз: йимишар итӀуз шулучвхьан,

³ амма багъдин кьялаъ айи гьаргъян учву дарчӀиди гъузбан бадали, митӀанай ва дурарик кучуз мукучанай.

⁴ Хъа битӀру дишагьлийиз: – Ваъ, йикӀидарчва, – кӀуру.

⁵ – Думу йимишар гъитӀу йигъан ичв улар арццди ва учвузра ужʼвална харживал аьгъю хьибдичвуз. Заанурси хьидичва. Мидкан Заануризра аьгъя.

⁶ Дишагьлийиз гьарин йимишар, итӀуз ужудар, уччвудар ва аькьюл туврудар вуди, рякъюру. Дугъу гьаргъян йимиш гъюдубтӀуру, ипӀуру, жилиризра тувру ва дугъура ипӀуру.

⁷ Дурарин улар арццру, ва дурариз чиб гъяцӀалди айиб рябкъюру. Хъа жилирина хпири инжирин кӀажарикан чпиз юкьвнаан идитӀрудар апӀуру.

⁸ Хъябяхъган жилиризна хпириз багъдиъ РАББИ Заанур лицурайиб ебхьуру, ва дурар гьарарихъ гьитӀикӀуру.

⁹ РАББИ Заанури адмийиз дих апӀуру: – Наан ава?

¹⁰ Дугъу гъапи: – Багъдиъ Уву лицурайиб гъеебхьунзуз. ГучӀ гъабхьунзуз, фицики гъяцӀалди айза, ва гъитӀикӀунза.

¹¹ – Шли гъапунвуз яв гъяцӀливаликан? – гьерхру РАББИ Заанури. – Узу увуз гъадагъа гъапӀу гьаргъян йимишар гъитӀнийва?

¹² Адмийи гъапи: – Уву узуз туву дишагьлийи дурар тувунзуз, хъа узура гъитӀунза.

¹³ РАББИ Заанури дишагьлийихьан гьерхру: – Уву мици гьаз гъапӀунва? Дишагьлийира жаваб туву: – БитӀру алдатмиш гъапӀунзу ва гъитӀунза.

¹⁴ Хъа РАББИ Заанури битӀраз гьамци кӀуру: – Яв гъапӀубдиз дилигну, балайикк ккабхъдива: мал-къарайин ва гьяйванатарин арайиан идипну хьибдива – уву яв фунʼинди гъябгъюри йибкӀайизкьан бишируг ипӀури хьивдива.

¹⁵ Увуна дишагьли душмнар апӀидизачву, ва ичв насларра чиб-чпиз душмнар хьиди: дугъан насли яв кӀул уьбгъидияв, ва уву думу наслин швякьраз галам йивидива.

¹⁶ РАББИ Заанури хпириз кӀуру: – Уву гъагъдиъ гъахьиган, яв аьзиятар Узу артухъ апӀидизаяв, аьзабариъди бицӀидар апӀидива. Яв жилирихьна яман тямягь хьибдияв, хъа дугъу увʼин аьхювал апӀиди.

¹⁷ Хъа адмийиз РАББИ Заанури кӀуру: – Хпирихъ хъебехъну, Узу увуз гъадагъа гъапӀу йимиш гъипӀунва! Уву багьна духьну жил балайикк ккабхъну. Вари яв уьмриъ жилин бегьер аьзиятниинди гъазанмиш апӀури хьидива.

¹⁸ Зазарна чӀуру укӀар диди увуз тувди, хутӀлин укӀ ипӀури хьидива.

¹⁹ Уву жиликан ктаур вува, ва думу жилиз кьяляхъ хътакидива. Думу вахт улубкьайиз, амкӀуъди уьл ипӀури хьидива. Уву жилин биширугтӀан дарва, ва хъана биширугдиз илтӀикӀидива.

²⁰ Адамди чан хпириз Гьава кӀуру, фицики дугъкан вари инсаниятдин баб шулу.

²¹ РАББИ Заанури Адамдизна дугъан хпириз гъидкьин палтар апӀуру ва дурариин алахьуру.

²² Хъа РАББИ Заанури кӀуру: – Магьа адми Ухьусир гъахьну – ужубна харжиб аьгъюр. Гьамус уьмрин гьаргъян, аьжал хътрур дархьуз, дугъу йимиш гъюдудубтӀри гьа!

²³ РАББИ Заанури думу, учв ктау ругдихьна жил тартиб апӀуз, Эдем багъдиан адауру.

²⁴ Адми утӀурккну, уьмрин гьарихьна вуйи рякъ уьбхюз, Эдем багъдин ригъ гьудубчӀвру терефнаъ кьудратлу малайикар-херувимар дерккру ва илтӀибкӀурайи цӀин тур дубсру.