Эвел 28 - Гирами Китаб

¹ Исакьди Якьубдиз дих дапӀну, дугъаз ужʼвал ккун дапӀну, гьамциб насигьят тувру: – Ханаандин шубарикан фужкӀара швушвди магъадагъан.

² Паддан-Арамдиз, яв абайин – Бетуэлин – хулаз гъарах, ва яв халуйин – Лавандин – шубарикан увуз хпир кадагъ.

³ Гъит Кьудратлу Заанури ужувлакк ккаъриву! Гъит Дугъу яв тухум бегьерлу ва артухъ апӀри, увлантина гизаф халкьар артмиш ишри!

⁴ Гъит Дугъу увуз ва яв наслариз, Ибрагьимдиз туву ужʼвал тувривуз. Уву гъурабади яшамиш шулайи му жил, Заанури Ибрагьимдиз багъиш дапӀнайи жил яв хилиъ абхъди!

⁵ Исакьди бай рякъʼин апӀуру. Якьуб арамейжви Бетуэлин бай, Лавандихьна Паддан-Арамдиз гъюру. Лаван, Якьубдина Исавдин дада Ребекайин гъардаш вуйи.

⁶ Исавдиз, Исакьди Якьубдиз ужʼвал ккун дапӀну, думу чаз хпир ктагъуз Паддан-Арамдиз гьаъбакан, Якьубдиз хананей шубарикан швушв макадагъан пубкан

⁷ ва Якьуб чан адашдихъна дадайихъ хъебехъну Паддан-Арамдиз гъягъбакан аьгъю шулу.

⁸ Исавдиз, чан адаш Исакьдиз хананей шубарин маш ккадруваликан аьгъю гъабхьнийи.

⁹ Хъа гьадмуган Исав Исмаилихьна душну, чаз сарсана хпир – Неваютдин чи, Ибрагьимдин бай Исмаилин риш, Махалат гъахнийи.

Бет-Элиъ Якьубдин нивкӀ

¹⁰ Якьуб, Беэр-Шева гъибтну, Харрандиз рякъюъ учӀвнийи.

¹¹ Думу саб йишвахьнакьан гъафир, сарун йишв хьпаз дилигну, дийигъуру ва кӀуликк гъван ккивну ахуз дахъру.

¹² Дугъаз нивкӀукди, жилилан заварихьнакьан вуйи умбрар ва душвʼан асина-зиина Заанурин малайикар гъяри рякъюру.

¹³ РАББИ зиин дийигъну Якьубдиз кӀуру: – Узу, яв аба Ибрагьимдин Заанур ва адаш Исакьдин Заанур, РАББИ вуза. Уву дахънайи гьаму жилар Узу увуз ва яв наслариз багъиш апӀидиза.

¹⁴ Гъумкьан гизаф хьиди яв наслар. Дурар ригъ гьудубчӀву, ригъ алабхъру, кьибла ва кафари терефаризди рагъиди. Увлантина ва яв насларилантина дюнʼяйин вари халкьариз ужʼвал хьибди.

¹⁵ Аьгъю йибхь, Узу увухъди хьидиза. Уву наанди гъушишра, Узу уву уьрхюри хьидиза. Узу уву думу Ханаан уьлкейиз кьяляхъ апӀидизаву, уву ялгъузди гъитидарза. Йиз туву гафар вари тамам апӀидиза.

¹⁶ НивкӀʼан хъергу Якьубди: – Дугъриданра РАББИ гьаму йишвʼин ал; хъа узуз мидкан аьгъюдикьан дайзуз! – гъапи.

¹⁷ – Му йишв фукьан гучӀ шлу йишв ву! – гъапи гукӀни гъахьири. – Му йишв Заанурин хал, аьршарин урнар ву!

¹⁸ ГвачӀнин ухди Якьуб гъудужвну, чан кӀуликк ккиву гъван гъадабгъну, думу гирамиб ва лишанлуб вуди дубсру ва дидин зиин ччим улубзуру.

¹⁹ Дугъу думу йишваз, гьеле думу шагьриз Луз кӀури ашра, Бет-Эл («Заанурин хал») кӀуру ччвур тувру.

²⁰ Хъа Якьубди гьамци дупну ху апӀуру: – Эгер Заанур узухъди гъашиш ва узу гьаму рякъяриъ гъюрхиш, ипӀуз уьл ва жандиина палат тувиш,

²¹ узу мясляаьтниинди йиз адашдин хулаз кьяляхъ хътакуз кюмек гъапӀиш, РАББИ йиз Заанур хьиди.

²² Хъа му узу гирамибди гъван дубсу йишв Заанурин хал хьибди. Уву узуз багъиш апӀру варибдикан Увуз йицӀубпи пай туври хьидиза.