Эвел 2 - Гирами Китаб

¹ Гьамци завна жил ва завариъна жилариъ айиб вари арайиз хуру.

² Ургудпи йигъаз Заанури Чан апӀурайи ляхнар ккудуркӀуру. Ургудпи йигъан Дугъу Чан гъапӀу вари ляхнарихъан рягьятвал гъадабгъуру.

³ Заанури ургудпи йигъ ужувлакк ккапӀру ва гирами апӀуру, фицики думу йигъан Дугъу Чав арайиз гъахи вари ляхнарихъан рягьятвал гъадабгъурайи.

Эдем багъдиъ Адамдинна Гьавайин уьмур

⁴ Магьа, завна жил фици Заанури арайиз гъахидар вуш: РАББИ Заанури завна жил апӀурайи вахтна,

⁵ жилиин я саб рук, я саб укӀ алдайи, фицики РАББИ Заанури жилиинна мархь гьапӀнадайи, ва думу тартиб апӀуз инсан адайи.

⁶ Жилилан за шулайи бугъну жил кьяши апӀурайи.

⁷ РАББИ Заанури жилин биширугдикан адми ктауру, дугъан хъюхънин ппулариъ уьмрин нефес ибтру, адмийиин жан илибшуру.

⁸ РАББИ Заанури ригъ гьудубчӀвру терефнаъ айи Эдемдиъ багъ ибтру ва душваъ Чав ктау адми тӀаъру.

⁹ РАББИ Заанури душваъ кӀваз мани ва ицци бегьер хру гьубкьу жюрейин гьарар кивру. Багъдин кьялаъ уьмрин гьар ва ужубна харжиб улупру гьар айи.

¹⁰ Эдемдиан, багъдиз шид тувуз, нир удубчӀвура. Хъасин думу, юкьуб цирклиз пай шула.

¹¹ Сабдин ччвур Пишон ву. Думу, гъизил айи Хавила уьлкейилан илтӀибкӀура.

¹² Думу ругарин гъизил ужуб ву. Душваъ ицци ниъ хъайи гьарарин шириш ва оникс кӀуру багьа гъванар а.

¹³ Кьюбпи нирин ччвур Гихон ву. Думу Куш уьлке вуйибси илтӀибкӀура.

¹⁴ Шубубпи нирин ччвур Тигрис ву. Думу Ассирияйин ригь гьудубчӀвру терефнахьантина гъябгъюра. Юкьубпи нир – Ефрат.

¹⁵ РАББИ Заанури Эдем багъдиъ адми итру, багъ уьбхюз ва гъайгъу зигуз гъитру.

¹⁶ Дугъу адмийиз гъапи: «Увхьан багъдиъ гьарсаб гьарин йимишдикан ипӀуз шулвухьан,

¹⁷ аммаки ужубна харжиб улупру гьаркан мипӀан, гъипӀиш, якьин йикӀидиву».

¹⁸ РАББИ Заанури гъапи: «Сарди хьуб адмийиз ужу дар. Узу дугъаз чаз гъилигу юлдаш апӀидиза».

¹⁹ РАББИ Заанури жилин ругдикан гьар жюрейин гьяйванатарна ничхрар ктау. Дугъу дурар адмийихьна хуру ва фицдар ччвурар тувруш лигуру. Адмийи гьарсаб чӀивишназ фицдар ччвурар тувнуш, гьаци кӀури гъахьи.

²⁰ Адмийи вари мал-къарайиин, вари ничхрариин, вари гьяйванатариин ччвурар иливу – амма дугъаз чаз гъилигу юлдаш гъидихъундайи.

²¹ РАББИ Заанури адми ижми нивкӀуз гьаъру. Хъа дугъан гъвалʼан мурглин тӀул адабгъуру ва адабгъушв гьибкру.

²² РАББИ Заанури дугъан мурглин тӀуликан дишагьли яратмиш апӀуру ва думу жилижвувахьна хъади гъюру.

²³ Хъа жилижвуву кӀуру: «Магьа думу: кӀураб – йиз кӀурбарикан вуйир, йикк – йиз йиккарикан вуйир. Мугъаз дишагьли пиди, фицики жилижвувкан яратмиш дапӀнайир ву».

²⁴ Магьа гьаддиз жилижви, чан адашна дада гъитну, чан хпирихъди сатӀи хьиди, ва дурар саб беденси хьиди.

²⁵ Дурар кьюридра – адмира, дугъан хпирра – гъяцӀалди вуйи, амма дурариз начди дайи.