Эвел 19 - Гирами Китаб

Лут ккадауб, Содом ва Гоморра ккидипуб

¹ Хябяхъган Лут шагьрин урнарихъ деънайиган, Содомдиз гьадму кьюр хялижв – кьюр малайик гъюру. Лутдиз дурар рякъюру. Лут гъудужвну дурарихьна гъягъюру ва жилиинакьан дурариз икрам апӀуру,

² хъа кӀуру: – Йиз аьхюдар! Ичв лукӀран хулазди гъачай, йишвазди гъузай, ичв ликар жикӀай, хъа гвачӀнинган гъудужвну, ичв рякъ давам апӀарчва. Хъа дурари: – Ваъ, учу йишв чӀат, шагьрин раццаъ, адапӀидича, – кӀуру.

³ Лутди дурарикан чан хулаз гъюб ижмиди тӀалаб апӀуру, гьаддиз дурар Лутдихъди дугъан хулаз гъягъюру. Лутди дурариз ипӀруб гьязур апӀуру, лавшар уржуру, дурари ипӀуру.

⁴ Хялар ахуз дахъайиз Содомдин вари жилижвувари, жигьилилан ккебгъну кьабириинакьан, дугъан хулар кьялаъ тӀаъру.

⁵ Дурари Лутдиз дих дапӀну гъапнийи: – Наши гьадму увухьна йишвазди дуфнайи адмийир? Адаъ дурар учухьна, дурариина аьрвалар хуз ккундучуз.

⁶ Лут дурарихьна удучӀву ва, чан кьяляхъди урчӀар хъяркьну,

⁷ гъапи: – Йиз дустар, мапӀанай мициб писвал.

⁸ Хъебехъай, узуз зат жилижвувахъди духьну адру кьюр риш азуз, узу дурар учвухьна адаарза, гьадрарикан учвуз ккуниб апӀинай, хъа му адмийириз фукӀара мапӀанай, фицики дурар йиз хулан гъваиккна дуфнайи йиз хялар ву.

⁹ Дурари Лутдиз жаваб тувру: – Дургун йихь ич уларихьан! Хъасин дурари кӀуру: – Му гъурабайиз лигайчва, гьамус мугъаз ич диванчи хьуз ккунди а! Учу увʼин дурариинтӀан пис аьрвалар алапӀидича. Дурар, Лут гьутӀурккну, раккнар уьргъюз ккунди, багахь улучӀвуз хъюгъру.

¹⁰ Гьадмуган хялари Лут чӀатан айитӀинди хуру ва урчӀар хъяркьру.

¹¹ Хъасин малайикари, чӀат айи жигьил-кьабирин – варидарин уларин акв гьадабгъру, гьаддиз дурар, Лутдин хулазди учӀврушв дибрихъди гъаллаж шулу.

¹² Хялари Лутдиз кӀуру: – Яв му шагьриъ сарун фуж аяв: баяр, шубар, язнийир – дурар вари мушвʼан адаъ,

¹³ гьаз гъапиш учу му йишв тӀанкь апӀуз ккача, фицики му адмийирилан РАББИЙИХЬНА душнайи агьузар зурбаб ву, гьаддиз РАББИЙИ учу му йишв ккидипуз гьаъначу.

¹⁴ Лут душну, чан язнийир хьуз ккайи, чан шубар хъирснайидариз гьамци кӀуру: – Гьяракат дапӀну мушвʼан удучӀвну гъарахай! РАББИЙИЗ му шагьур тӀанкь апӀуз ккунди а. Хъа язнийири, мугъу зарафатар апӀура кӀури, фикир апӀуру.

¹⁵ ГвачӀиндин ахсрар кивган, малайикари Лут гьамци кӀури гьялак хьуз гъитру: – Гьяракат апӀин! Шагьрин жаза ккаъну учву дийикӀуз, яв хпирна кьюрид шубар мушвʼан адаъ.

¹⁶ Лутди гьеле фикир апӀури имийи, аммаки малайикари Лутдинра, дугъан хпиринра ва дугъан шубарин хилхъан дидисну, му шагьриан дурар хъади гъягъюру, фицики РАББИЙИЗ Лутдин язухъди вуйи.

¹⁷ Шагьриан удучӀвбалан кьяляхъ малайикарикан сари гъапи: – Гьергай гьамушвхьан! Кьяляхъ миилдицанай ва му дерейиъ энгел махьанай! Дагъларизди гьергай, дарш йихидичву!

¹⁸ Лутди дурариз гъапи: – Ваъ, йиз аьхюдар!

¹⁹ Учву узухьна, ичв лукӀрахьна, гьацира рягьимлу вучва! Узухьна вуйи ичв рягьим гизаф аьхюб ву: узу аьжаликкан ккадаунчва! Дагълариз гьергуз хьибдарзухьан. Узу дагълариз жаргъайиз думу бала узухъ хъубкьди ва узу йикӀиди.

²⁰ Магьа гьатму шагьур багахь ву, дина жаргъуз хьибди, думу бицӀиб ву. Узу гьадму багахь хьайи бицӀи шагьризди жаргъидиза, душваъ узуз фукӀара хьибдар!

²¹ – Ибшри сарун, – гъапи малайикди, – уву бадали гьадмура апӀарза: уву кӀурайи шагьур ккидипидарза.

²² Аммаки гьяракат дапӀну дина жаргъ. Уву дина дурукьди, узхьан йиз ляхнихъ хъюгъюз хьибдар. Гьаддиз думу шагьриз Цуар («бицӀиб») кӀура.

²³ Ригъ гьудубчӀвиган, Лут Цуариз хъуркьнийи.

²⁴ Лут хъуркьумитӀлан, РАББИЙИ Содомдиинара Гоморрайиина, аьршариан мархьси гугуртна цӀа гьапӀру.

²⁵ Му кьюбиб шагьрар ва думу йишварин гъирагъ-бужагъ, адмийир, жилиин алиб вари цӀи тӀанкь апӀуру.

²⁶ Думу арайиъ Лутдин хпир кьяляхъ илдицуру ва думу кьилан буруздиз илтӀикӀуру.

²⁷ ГвачӀнин ухди Ибрагьим, цӀиб ухдиси учв накь РАББИЙИН улихь дийигъну гъахьи йишвахьна гъюру.

²⁸ Думу Содомдиз ва Гоморрайиз – чан уликк ккайи вари дерейиз – лигуру, фу лигурва, душвайишв дернин айитӀишвси ву; дубгну-хъудубгну, жилихьан завузкьан гъалин кумар удучӀвура.

²⁹ Гьамци, дерейин шагьрар тӀанкь апӀурайи Заанури Ибрагьим кӀваин гъапӀнийи ва Дугъу Лут, думу яшамиш шулайи шагьрар ккидирчну, думу балайиккан гъюрхнийи.

Лутдин хизан

³⁰ Цуариан Лут, чан кьюрид шубарра хъади, дагълариз гъягъюру. Дугъаз Цуариъ гъузуз гучӀуйи. Думу, чан кьюрид шубарра хъади, дюрхъяъ яшамиш шулайи.

³¹ ЦӀиб вахтналан аьхюну шуру бицӀинуриз гьамци кӀуру: – Адаш кьаби шулайихь. Сарун жилариин аьдат вуйиганси ухьухъди яшамиш духьну ккуни жилижви илимдар.

³² Ихь адашдиз чяхир тувдихьа ва дугъахъди дахъдихьа. Гъит, жвуван адашдикан вушра, ухьухъ веледар ишри ва ихь тухум давам ибшри!

³³ Йишвну дурари адашдиз чяхир тувру ва аьхюну риш дахънайирихьна дуфну, учвра дугъахъди дахъру. Лутдиз, аьхюну риш чахъди фила дахънуш ва фила гъудужвнуш, хабаркьан гъабхьундайи.

³⁴ Хъа йигъан аьхюну чуччу чан бицӀину чуччуз кӀуру: – Сан узу ихь адашдихъди дахъунза. Ахълира дугъаз чяхир тувну пиян апӀидихьа, хъа гъи душну увура дугъахъди дахъ. Жвуван адашдикан вушра, ухьухъ веледар духьну, ихь тухум давам ибшри!

³⁵ Хъана дурари чпин адаш, чяхир тувну пиян апӀуру. БицӀину ришра дуфну адашдихъди дахъру. Лутдиз, чан риш чахъди фила дахънуш ва фила гъудужвнуш, хабаркьан гъабхьундайи.

³⁶ Гьамци Лутдин кьюрид шубарра чпин адашдикан гъагъдиъ шулу.

³⁷ Аьхюнуриз бай шулу ва дугъаз Муав («адашдикан вуйир») кӀуру ччвур тувру. Гъахьи бицӀирикан гьамусдин муаварин аьхю аба шулу.

³⁸ БицӀинуризра бай шулу ва дугъаз Бен-Амми («йиз халкьдин бай») кӀуру ччвур тувру. Гъахьи бицӀирикан гьамусдин аммунарин аьхю аба шулу.