Эвел 18 - Гирами Китаб

Ибрагьимдихьна гъафи шубур хялижв

¹ Ибрагьим ригъ атӀабгнайи вахтна, Мамрейин мяхъяр кӀурушваъ, чадризди учӀврушвахь деънайиган, дугъаз РАББИ ачмиш шулу.

² Ибрагьимди улар за дапӀну лигуру ва дугъан улихь ярхла дарди шубур жви дийигънади шулу. Чан чадризди учӀврушвхьан гъедергу Ибрагьим дурарихьна жаргъури гъягъюру, дурариз жилиинакьан икрам апӀуру ва кӀуру:

³ – Я аьхюдар! Узухьна рягьимлу йихьай, ичв лукӀран улхьантина гьудучӀвну мягъянай.

⁴ Гъит сацӀиб шид хри, ичв ликар жикӀуз. Гьаму гьарикк эргʼвал йивай.

⁵ Учву сарун ичв лукӀрахьна гъафихъантина, ихтияр тувай учвуз уьл хуз. ИпӀруб дипӀну, эргʼвал гъивиган, ичв рякъ давам апӀуз рягьят хьибдичвуз. – Уву кӀурубси ибшри сарун, – гъапи дурари.

⁶ Хъа Ибрагьимди, чадризди гьялакди душну Сарайиз кӀуру: – Тяди шубуб луху ужубсиб хю китӀибшну лавшар урж.

⁷ Ибрагьим лижягъна жаргъуру ва ужуб таза кӀари дубхну дугъу лукӀрахьна убккуз тувру. ЛукӀру думу гьяракатниинди гьязур апӀуру.

⁸ Гьязур дапӀнайи кӀардин йиккра, никкна хах дурарин улихь дивру, ва дурари ипӀайиз Ибрагьим гьарикк дийигъуру.

⁹ Хъа дурари Ибрагьимдихьан гьерхру: – Яв хпир Сара наан аяв? – Гьамушваъ, чадрикк кка, – жаваб тувру дугъу.

¹⁰ РАББИЙИ кӀуру: – Хъайисан гьаму вахтна Узу увухьна хъана гьидиза, ва яв хпир Сарайиз бай шулу. Хъа Сара, Дугъан кьяляхъди чадризди учӀврушвахъ дийигъну, хъпехъурайи.

¹¹ Ибрагьимна Сара кьаби, яшлу инсанар вуйи. Сара сарун палтарикан шули имдайи.

¹² Сара чав-чакди гьамци гъяаьлхънийи: «Кьаби духьнайи узхьан йиз жилирихъди ккунивалар апӀуз шулинхъа? Узуси йиз аьхюрра кьаби духьнадарин!»

¹³ Хъа РАББИЙИ Ибрагьимдиз кӀуру: – Кьаби духьнайи узхьан бицӀир хуз шулин кӀури Сара гьаз гъяаьлхъю?

¹⁴ Айинхъа РАББИЙИХЬАН апӀуз даршлуб? Улупнайи вахтна хъа йисан Узу увухь хьидиза. Сарайихъ бай хьиди.

¹⁵ Сарайи учв гъяаьлхъюб кӀулʼин гъадабгъундайи ва: – Узу гъяаьлхъюндайза, – гъапнийи, фицики Сарайиз гучӀ гъабхьнийи. Хъа РАББИЙИ: – Ваъ, гъяаьлхънийва, – гъапнийи.

Содом ккидидипбан бадали вуйи Ибрагьимдин тӀалаб

¹⁶ Хъа хялар Содомдин терефназди гъилигну. Хялар гьаъри, дурарихъди Ибрагьимра гъушу.

¹⁷ Хъа РАББИЙИ гъапи: – Узуз апӀуз ккундайиб Узу Ибрагьимдихьан гьитӀибкӀуринхъа?

¹⁸ Ибрагьимдикан гьякьди зурба ва кьувватлу халкь арайиз гъибди, ва гьадму халкьдилантина дюнʼяйин вари имбуну халкьаризра ужʼвал хьибди.

¹⁹ Фицики Узу Ибрагьим, чан баяриз ва дурарин вари наслариз, РАББИЙИ гъапиб улупбан бадали кадагъназа. Ибрагьимдиз РАББИЙИ туву гаф кӀулиз удубчӀвбан бадали дугъан баярна дурарин вари наслар РАББИЙИН рякъюъди душну ккунду. Дурари чпин апӀурайиб вари гьякьди ва дугъриди дапӀну ккунду.

²⁰ РАББИЙИ гъапи: – Содомдинна Гоморрайин агьалйирин тахсрарин Узухьна гъурубкьу агьузар гьадмукьан зурбаб вуки, ва дурарин гуннагь гизаф гъагъиб ву.

²¹ Узу дурарихьна гъягъидиза ва Узухьна гъюрайи агьрарна агьузарар дугъридар вуш лигидиза. Эгер дици даршра, Узуз аьгъю хьибди.

²² Думу хяларикан кьюр жви Содомдихьинди гъушнийи, хъа РАББИ, Чан улихь дийигънайи Ибрагьимдихъди гъузнийи.

²³ Ибрагьим Дугъаз лап багахь улучӀву ва гъапи: – Уву гуннагькрарихъди гьякьлударра тӀанкь апӀидивахъа?

²⁴ Му шагьриъ хьуцӀур гьякьлу кас ади гъабшиш, гьадрар бадали Уву му йишв ккидидипди гъибтидарва?

²⁵ Уву дици дарапӀарва – гуннагькрарихъди гьякьлударра пуч апӀуб, гуннагькриз гъабхьиб гьякьлуризра хьуб мумкин дар. Уву дици дарапӀарва! Вари дюньяйин Диванчийи гьякь дарапӀди гъибтринхъа?

²⁶ РАББИЙИ гъапи: – Эгер Узуз Содом шагьриъ хьуцӀур дугъри касар гъидихъиш, гьадрар бадали Узу му йишв ккидипидарза.

²⁷ Ибрагьимди сабансана гъапи: – Магьа, гьеле узу рюкъна биширугтӀан даршра, йиз Аьхюрихьан гьерхуз кӀубанвал апӀураза:

²⁸ хьуцӀур кас хьуз хьурсан гьякьлу кас гьудруркӀри гъашиш, Уву вари шагьур ккидипуривахъа? – Эгер Узуз душваъ ягъчӀвурна хьур гъидихъиш, – гъапи РАББИЙИ, – душвайишв ккидипидарза.

²⁹ Ибрагьимди Дугъахъди улхуб давам апӀуру ва кӀуру: – Белки душваъ ягъчӀвур дихъур? – ЯгъчӀвур бадалира дици дарапӀарза, – гъапи РАББИЙИ.

³⁰ Хъа Ибрагьимди кӀуру: – Узу кӀура кӀури йиз Аьхюриз хъял дарифри: белки душваъ сумчӀур дихъур? – Ккидипидарза, эгер Узуз душваъ сумчӀур гъидихъиш, – гъапи РАББИЙИ.

³¹ Ибрагьимди гъапи: – Магьа, йиз Аьхюрихьан гьерхуз кӀубанвал апӀураза: белки душваъ къар дихъур? – Къар бадалира ккидидипарза, – гъапи РАББИЙИ.

³² Ибрагьимди гъапи: – Аьхиримжи ражарисана узу гьерхиш, гъит йиз Аьхюриз хъял дарифри: белки душваъ йицӀур дихъур? – ЙицӀур бадалира ккидидипарза, – гъапи РАББИЙИ.

³³ РАББИЙИ Ибрагьимдихъди улхуб ккудубкӀиган, Думу гъягъюру, хъа Ибрагьим кьяляхъ хътакуру.