Эвел 15 - Гирами Китаб

Заанури Ибрамдихъди йикьрар йитӀуб

¹ Гьаму гьядисйирин кьяляхъ Ибрамдиз аьжайиб улупбар шулу ва дугъаз РАББИЙИН гафар ерхьуру: – ГучӀ мапӀан, Ибрам. Узу уву уьрхру Гъалхан вуза. Увуз зурба пешкеш хьибдивуз.

² Ибрамди кӀуру: – Йиз Аьхюр, я РАББИ! Гьаз ву йиз Яв багъишар, эгер узухъ велед хъадарш? Йиз хал Дамаскдиан вуйи Элезерин хилиъ абхъра.

³ Уву узуз насил тутруви, магьа, йиз хулаъ лихурайи гъараваш йиз ирсчи шула.

⁴ Хъа дугъаз гьамци кӀури РАББИЙИН гаф шулу: – Ваъ, думу яв тухум давам апӀрур хьидар, увкан гъахьир хьиди яв ирсчи.

⁵ РАББИЙИ Ибрам чӀатинди адаъну кӀуру: – Завуз лиг, хядар кудух, эгер увхьан дурар ктухуз шулуш! – Хъа давам апӀуру. – Гьадму хядаркьан увухъ наслар хьиди!

⁶ Ибрам РАББИЙИХЪ хъугъру, ва гьадму хъугъʼвал РАББИЙИ дугъан гьякьлувал вуди гьисаб апӀуру.

⁷ Хъа РАББИЙИ дугъаз кӀуру: – Уву Халдея уьлкейин Ур шагьриан гьаму жил увузди тувуз адау РАББИ Узу вуза.

⁸ Ибрамди гъапи: – Йиз Аьхюр, я РАББИ! Думу жил йизуб шлуб узуз фици аьгъю хьибди?

⁹ РАББИЙИ дугъаз гъапи: – Узухьна шубуд йисаъ айи личӀна, шубуд йисаъ айи цӀигьна, шубуд йисаъ айи якъна, къукъу луфна жигьил луф хьади гъач.

¹⁰ Ибрамди духну дурар вари кьюб йишваз пай апӀуру ва думу паяр чиб-чпиз гъаншарди дивру. Амма дугъу ничхрар кьюб йишваз пай гъапӀундайи.

¹¹ Пай дапӀну дивнайи йиккариин вягьши ничхрар алархьуйи, хъа Ибрамди дурар ултӀурккуйи.

¹² Ригъ алабхъурайи вахтна Ибрамдиин ижми нивкӀ алабхъуру. Сабпну жилиина ижми мучӀушин абхъру ва Ибрам зурба гучӀʼвалиъ ахъру.

¹³ РАББИЙИ Ибрамдиз кӀуру: – Аьгъю йибхьки, яв наслар жара жилиин юкьудварж йисан лукӀʼвалиъна гъагъишнаъ хьиди.

¹⁴ Аммаки, дурар аьзабариъ иту халкьдиз Узу жаза адабтӀидиза, хъа гьадмуган дурар душвʼан девлетлу духьну удучӀвиди.

¹⁵ Хъа уву яв абйирихьна мясляаьтниинди гъягъидива – лап кьаби гъахьиган накьвдик кивдиву.

¹⁶ Увлантина вуйи юкьубпи наслин девриъ яв наслар мина кьяляхъ хътакиди, фицики амореярин гуннагь сабан чан кьадарнахъна дуфнадар.

¹⁷ Ригъ алабхъну мучӀу гъабхьиган, дернин кумна цӀа дуфну, кьюб швур гьацӀ дапӀну дивнайи йиккарин арайиантина гъябгъюру.

¹⁸ Гьадму йигъан РАББИЙИ Ибрамдихъди йикьрар йитӀуру ва кӀуру: – Узу египтарин нирхъан гъадабгъуб тап машгьур Ефратдихъна гъягъяйизкьан вуйи:

¹⁹ кенеярин, кенезеярин, кедмонеярин,

²⁰ хеттарин, перизеярин, рефаимарин,

²¹ амореярин, ханаанеярин, гиргашеярин ва евусеярин – вари жилар увлантина вуйидариз тувдиза.