Эвел 14 - Гирами Китаб

Ибрамди Лут азад апӀуб

¹ Гьадму вахтна Шинариъ – Амрафел, Элласариъ – Ариох, Эламдиъ – Кедорлаомер, Гоимдиъ – Тидал паччгьар вуйи.

² Му паччгьар Содомдин паччагь Берихъди, Гоморрайин паччагь Биршайихъди, Адмайин паччагь Шинавдихъди, Цевоимдин паччагь Шевемерихъди ва Белин (гьамус мушваз Цуар кӀура) паччагьдихъди дявдиз удучӀвуру.

³ Му хьур паччагь Сиддим дерейиъ (гьамус Кьилан гьюл айишваъ) сабишвʼина уч шулу.

⁴ ЙицӀикьюд йисан мурар Кедорлаомерин зулмикк ккади гъахьну, хъа йицӀишубудпи йисан дурар дугъаз къаршуди гъудужвну.

⁵ ЙицӀиюкьудпи йисан Кедорлаомерина дугъан терефкар паччгьари Аштерот-Карнаимдиъ – рефаимар, Гамдиъ – зузимар, Шав-Кириатаимдиъ – эмимар,

⁶ чюлин гъирагъдихъ Ил-Паран рякъюхъ хъайи чпин дагъ Сеириъ – хорреяр дагъитмиш апӀуру.

⁷ Гьадушвʼан дурар Эн-Мишпат (гьамус душваз Кадеш кӀура) терефназди гъюру ва амалекарин вари жилар ва Хацацон-Тамариъ яшамиш шули гъахьи амореярин жилар ккидирчуру.

⁸ Содомдин паччагь, Гоморрайин паччагь, Адмайин паччагь, Цевоимдин паччагь, Белайин (гьамус Цуар) паччагь мурариз къаршуди удучӀвуру. Сиддим дерейиъ дурар

⁹ Эламдин паччагь Кедорлаомериз, Гоимдин паччагь Тидализ, Шинарин паччагь Амрафелиз, Элласарин паччагь Ариохдиз къаршуди дявдиз удучӀвуру. Юкьур паччагь – хьуриз.

¹⁰ Сиддим дерейиъ къир адабцӀру гизаф ичӀар айи. Хъа Содомдинна Гоморрайин паччгьарин гьерграйи эскрар гьадму ичӀаризди ахьру, хъа гъуздар дагълариз гьергру.

¹¹ Гъалиб гъахьидари Содомдинна Гоморрайин вари мал-мулк ва сурсат гъадабгъну гъягъюру.

¹² Дурар, Ибрамдин чвуччвун бай, Содомдиъ яшамиш шулайи Лутра дидисну, дугъан мал-мулкра тӀараш дапӀну, гъягъюру.

¹³ Дявдиъ сагъди гъузу сар кас, Мамре кӀуру аморей жвуван мяхъярин багахь яшамиш шулайи жугьуд Ибрамдихьна гъюру. Мамре жвувахъ Эшколна Анер кӀуру гъардшар хъайи. Ибрамдина дурари чиб-чпиз кюмекназ гъюру йикьрар дийитӀнайи.

¹⁴ Чан багахьлу дидисна кӀури хабар гъеебхьу Ибрам, дяви гъабхуз шлу шубудваржна йицӀимиржир кас хъади, душмнарихъ хъергру. Му ксар Ибрамдин мулкариин бабкан гъахьидар ва дугъахъ лихурайидар вуйи. Дан кӀурушван багахь,

¹⁵ йишвну, Ибрам дурариин алархьуру, кьялаъ тӀаъру ва Дамаскдихьан кафарийиъ айи Ховайихьнакьан хъергру.

¹⁶ Ибрамди душмнарихьан Лут, дугъан мал-мулк, дишагьлийир, йисир гъапӀдар ва тӀараш гъапӀуб вари тадабгъуру.

¹⁷ Кедорлаомериин ва дугъахъди хъайи паччгьариин гъалиб духьну, Ибрам кьяляхъ хътакурайиган, Содомдин паччагь, думу къаршуламиш апӀури, Шаве дерейиз (гьамус Паччагьдин дере) улихьна удучӀвуру.

¹⁸ Салим шагьрин паччагь Мелхиседек Ибрамдин улихьна чяхирна уьл хьади гъюру. Думу Первердигар Заанурин гъуллугъчи вуйи.

¹⁹ Дугъу Ибрамдиз РАББИЙИКАН берекет хьуб ккун апӀуру ва кӀуру: – Гъит Первердигар Заанури, жилна зав халкь ГъапӀури, Ибрам ужувлакк ккаъри!

²⁰ Яв хилиз яв душмнар туву Первердигар Заануриз шюкюр ибшри! Ибрамди Мелхиседекдиз чав тадабгъу мутмуйикан йицӀубпи пай тувнийи.

²¹ Содомдин паччагьди Ибрамдиз кӀуру: – Йиз адмийир кьяляхъ ча, хъа мутму увуз гъибт.

²² Ибрамди паччагьдиз гъапи: – Узу РАББИ вуйи Первердигар Заанурихьна, завна жил халкь ГъапӀурихьна, йиз хил за дапӀну ху апӀураза:

²³ яв мутмуйикан узу мурсулкьан, шаламарин гъахмакьан, гъадабгъидарза. Хъа уву узуз макӀан: «Ибрам девлетлу гъапӀур узу вуза», кӀури.

²⁴ Узуз йиз эскрари гъипӀубна узухъди гъафи Анеризна, Эшколизна, Мамрейиз рубкьру пайтӀан, фукӀара лазим дарзуз.