Эвел 11 - Гирами Китаб

Вавилондин чӀвурд

¹ Вари дюньяйиин алиб саб чӀал ва садар гафар вуйи.

² Инсанар ригъ гьудубчӀвру терефнаан Шинар уьлкейин дюзенариз гъюру ва гьадушвʼин бина ккебгъру.

³ – Кирпчар апӀидихьа ва цӀигъ ургидихьа, – гъапи дурари чиб-чпиз. Дурари гъванарин ерина кирпчар, кьуршин ерина жилин къир ишлетмиш апӀури гъаши.

⁴ – Ихь ччвур машгьур апӀуз ва ухьу вари дюнʼя вуйибси дарарагъуз, ухьуз шагьур ва завариккна рубкьру чӀвурд дивдихьа, – гъапи дурари.

⁵ Инсанди тикмиш апӀурайи шагьриз ва чӀвурдаз лигуз, РАББИ исина ктучӀвуру.

⁶ – Саб халкь – саб чӀал. Сабан дурар ляхнихъ хъюгънутӀан адар, хъа гьапӀур дурари! – кӀуру РАББИЙИ. – АпӀуз ккун гъабхьиб – дурарихьан вари апӀуз хьибди!

⁷ Дурарихьна исина ктучӀвидихьа ва, сарин тмунур гъавриъ адрахъруси, дурарин чӀал гъибикьидихьа!

⁸ РАББИЙИ дурар, чпи диврайи шагьур ккудубкӀайиз, вари жил вуйибси гъарагънийи.

⁹ Гьаддиз му шагьриз Вавилон («гъидикьуб») кӀури гъаши, фицики РАББИЙИ душваъ дюньяйин вари инсанарин чӀал гъибикьнийи ва гьадушвʼан дурар вари жил вуйибси рагъуз гъитнийи.

Симдилан Ибрагьимдиинакьан вуйи наслар

¹⁰ Магьа Симдин тухмикан ихтилат: дюнья шту ккапӀбалан кьяляхъ кьюд йислан, Симдин варж йис вуйиган, дугъаз Арфакшад шулу.

¹¹ Арфакшад бабкан гъахьихъанмина Сим хьудварж йисансана яшамиш шулу. Дугъаз хъана баяр-шубар айи.

¹² Арфакшаддикан сумчӀурна хьуд йисаъди Шелах шулу.

¹³ Шелах бабкан гъахьихъанмина Арфакшад юкьудваржна шубуд йисансана яшамиш шулу. Дугъаз хъана баяр-шубар айи.

¹⁴ Шелахдин сумчӀур йис вуйиган, дугъаз Эвер кӀуру бай шулу.

¹⁵ Эвер гъахьихъанмина Шелах юкьудваржна шубуд йисансана яшамиш шулу. Дугъаз хъана баяр-шубар айи.

¹⁶ Эверин сумчӀурна юкьуд йис вуйиган, Пелег кӀуру бай шулу.

¹⁷ Пелег гъахьихъанмина Эвер юкьудваржна сумчӀур йисансана яшамиш шулу. Дугъаз хъана баяр-шубар айи.

¹⁸ Пелегдин сумчӀур йис вуйиган, дугъаз Реу кӀуру бай шулу.

¹⁹ Реу гъахьихъанмина, Пелег кьюдваржна урчӀвуд йисансана яшамиш шулу. Дугъаз хъана баяр-шубар айи.

²⁰ Реуйин сумчӀурна кьюд йис вуйиган, дугъаз Серук кӀуру бай шулу.

²¹ Серук гъахьихъанмина Реу кьюдваржна ургуд йисансана яшамиш шулу. Дугъаз хъана баяр-шубар айи.

²² Серукдин сумчӀур йис вуйиган, дугъаз Нагьор кӀуру бай шулу.

²³ Нагьор гъахьихъанмина Серук кьюдварж йисансана яшамиш шулу. Дугъаз хъана баяр-шубар айи.

²⁴ Нагьорин къадна урчӀвуд йис вуйиган, дугъаз Терагь кӀуру бай шулу.

²⁵ Терагь гъахьихъанмина Нагьор варжна йицӀиурчӀвуд йисансана яшамиш шулу. Дугъаз хъана баяр-шубар айи.

²⁶ Терагьдин ургцӀур йис вуйиган, дугъаз Ибрам (яни Ибрагьим), Нагьор ва Аран кӀуру баяр шулу.

Терагьдикан гъахьидар

²⁷ Магьа Терагьдин тухмикан ихтилат: Терагьдиз Ибрам, Нагьор ва Аран кӀуру баяр шулу. Арандиз Лут кӀуру бай шулу.

²⁸ Хъа Аран, чпин адаш Терагь чӀивиди имиди, чав бабкан гъахьи Халдея уьлкейин Ур шагьриъ йикӀуру.

²⁹ Ибрамдина Нагьори чпиз хпар гъадагъуру. Ибрамдин хпирин ччвур Сарай вуйи. Нагьорин хпирин ччвур Милка вуйи. Милкана Иска Арандин шубар вуйи.

³⁰ Сарай бицӀидар шлур дайи.

³¹ Терагь, чан бай Ибрам, Ибрамдин хпир Сарай, Терагьдин гъакӀи бай Арандин бай Лутра гъадагъну, Халдея уьлкейин Ур шагьриан Ханаан ругариина гъягъюз рякъюъ учӀвру. Аммаки дурар, Харрандихьна гъафиган, гьадушваъ дийигъуру.

³² Кьюдваржна хьуд йис гъабхьиган, Терагь Харрандиъ йикӀуру.