Эвел 10 - Гирами Китаб

Халкьар арайиз гъюб

¹ Магьа Нюгьдин баяр – Сим, Хам ва Яфетдилантина бабкан гъахьи насларикан вуйи ихтилат. Дюнʼя шту ккапӀбалан кьяляхъ дурариз бицӀидар шулу.

Яфетдин наслар

² Яфетдин баяр: Гомер, Магог, Мадай, Яван, Тувал, Мешех ва Тирас.

³ Гомерин баяр: Ашкеназ, Рифат ва Тогарма.

⁴ Явандин баяр: Элиша, Таршиш, Киттим ва Доданим.

⁵ Явандин баярин наслар гьюлерихъди хъайи жилариин артмиш гъахьнийи. Яфетдин насларикан чпин чӀалар, чпин тухмар, чпин мулкар ади, жа-жара халкьар арайиз гъафнийи.

Хамдин наслар

⁶ Хамдин баяр: Куш, Мицраим, Пут ва Ханаан.

⁷ Кушдин баяр: Сева, Хавила, Савта, Раама ва Савтеха. Раамдин баяр: Шева ва Дедан.

⁸ Кушдиз Нимрод кӀуру бай айи. Думу дюньяйиин сарпи кьувватлу адми вуйи.

⁹ РАББИЙИН улариъ думу кьувватлу хюрчабан вуйи. Гьаддиз кӀурира а: «Гъит РАББИЙИН улариъ уву кьувватлу хюрчабан Нимродсир ишри!»

¹⁰ Сифте думу Вавилон, Эрех ва Аккад шагьрарин паччагь вуди гъахьну. Дурар вари Шинар уьлкейиъ айи.

¹¹ Гьаму жиларилан думу Ассирияйиз удучӀвну гъягъюру. Дугъу душваъ Ниневия, Реховот-ир ва Калах шагьрар дивнийи

¹² Ниневияйинна Калахдин арайиъ Ресен шагьур айи. Дурарикан Калах шагьур аьхюбсиб вуйи.

¹³ Мицраимдикан лудияр, анамеяр, лехавеяр, нафтухеяр,

¹⁴ патрусеяр, каслухеяр ва кафтурияр, хъа мурарикан – филистимар гъахьну.

¹⁵ Ханаандикан сарпирди Сидон, хъасин Хетт гъахьну,

¹⁶ Ханаандикан гьацира евусеяр, амореяр, гиргашеяр,

¹⁷ хиввеяр, аркеяр, синеяр,

¹⁸ арвадеяр, цемареяр, хаматеяр арайиз гъафну. Кьяляхъна ханаанеярин халкьар гъарагънийи.

¹⁹ Дурарин ругар Сидондихъан Герарин терефназди – Газайихъна вуйи, хъа Содомдинна, Гоморрайинна, Адмайинна, Цевоимдин терефназди – тап Лашайихъна рукьурайи.

²⁰ Хамдин насларикан чпин чӀалар, чпин тухмар, чпин мулкар ади, жа-жара халкьар арайиз гъафнийи.

Симдин наслар

²¹ Яфетдин аьхюну гъардаш Симдизра баяр айи. Симдикан Эверин тухум арайиз гъафну.

²² Элам, Ашшур, Арфакшад, Луд ва Арам Симдин баяр ву.

²³ Уц, Хул, Гефер ва Маш Арамдин баяр ву.

²⁴ Арфакшаддикан Шелах, Шелахдикан Эвер шулу.

²⁵ Эверикан кьюр бай шулу, сарин ччвур Пелег («пай апӀуб») вуйи, гьаз гъапиш думу вахтна жил пай апӀурайи. Дугъан чвуччвун ччвур Иоктан вуйи.

²⁶ Алмодад, Шалеф, Хацармавеф, Ярах,

²⁷ Гадорам, Узал, Дикл,

²⁸ Овал, Авимаил, Шева,

²⁹ Офир, Хавила ва Иовав Иоктандин баяр вуйи. Вари гьаму баяр Иоктандиндар ву.

³⁰ Дурарин мулкар Мешайихъан ригъ гьудубчӀвру дагъларин Сефарайихъна вуйи.

³¹ Симдин насларикан чпин чӀалар, чпин тухмар, чпин мулкар ади, жа-жара халкьар арайиз гъафнийи.

³² Магьа гьамцдар ву Нюгьдин баярин тухмар ва дурарикан гъахьи халкьар. Гьамрарилантина, дюнья шту ккапӀбалан кьяляхъ, жилиин халкьар гъарагънийи.