Эвел 1 - Гирами Китаб

Дюнья арайиз хуб

¹ Сифте Заанури завна жил арайиз хуру.

² Жил къайдасузди ва ичӀиди вуйи. КӀан ккадру штарин зиин мучӀушин алийи. Заанурин Рюгь штариин шуйи.

³ Заанури гъапну: «Гъит, акв ибшри!» Ва акв шулу.

⁴ Заануриз акв кьабул шулу ва думу мучӀушнахьан жара апӀуру.

⁵ Заанури аквназ «йигъ» кӀуру, хъа мучӀушназ – «йишв». Хябяхъ шулу, хъа гвачӀин шулу: му сабпи йигъ вуйи.

⁶ Заанури гъапну: «Гъит, штун кьялаъ ижмишин ибшри, ва ижмишну зиин али шид кӀанакк ккайи шидхьан жара апӀри».

⁷ Заанури ижмишин апӀуру ва зиин али шид кӀанакк ккайи штухьан жара апӀуру. Ва гьаци гъабхьну.

⁸ Заанури ижмишназ «зав» кӀуру. Хябяхъ шулу, хъа гвачӀин шулу: му кьюбпи йигъ вуйи.

⁹ Заанури гъапну: «Гъит, завун кӀанакк ккайи шид саб йишваз уч ибшри ва гъит къурамат ккитӀибгъри». Ва гьаци гъабхьну.

¹⁰ Заанури, къураматдиз «жил» кӀуру, хъа уч гъаши штариз – «гьюлер». Заануриз му кьабул шулу.

¹¹ Дугъу гъапи: «Гъит жили чрушин туври: тум айи укӀар ва бегьер тувру гьубкьу жюрейин гьарар». Ва гьаци гъабхьну.

¹² Жили чрушин хуру: тум айи гьубкьу жюрейин укӀар ва бегьер тувру гьубкьу жюрейин гьарар. Заануриз му кьабул шулу.

¹³ Хябяхъ шулу, хъа гвачӀин шулу: му шубубпи йигъ вуйи.

¹⁴ Заанури гъапну: «Гъит завун ижмишниин акв тувру мутмйир ишри. Дурари йигъна йишв жара апӀиди ва вахтар, йигъар, йисар улупиди.

¹⁵ Гъит дурари завʼан акв туври ва жил аку апӀри». Ва гьаци гъабхьну.

¹⁶ Заанури завуъ кьюб зурба акв тувру мутмйир арайиз хуру. Дугъу, йигъ тяйин апӀуз, ригъ арайиз хуру, хъа йишв тяйин апӀуз ваз арайиз хуру. Дугъу хядарра арайиз хуру.

^17-18 Заанури дурар, жилиз акв тувуз, йигъʼинна йишвʼин аьхювал апӀуз ва акв мучӀушнахьан жара апӀуз, завун ижмишниин дерккру. Заануриз му кьабул шулу.

¹⁹ Хябяхъ шулу, хъа гвачӀин шулу: му юкьубпи йигъ вуйи.

²⁰ Заанури гъапну: «Гъит штар чӀивишнари ацӀри. Хъа жилин зиин зав вуйибси ничхрар тӀирхури ишри».

²¹ Заанури гьюлерин зурба гьяйванатар, штуъ аьхючӀвеъ гьубкьу жюрейин чӀивишнар, ва хлинццар хьайи гьубкьу жюрейин ничхрар арайиз гъахи. Заануриз му ужуйи рябкъюру.

²² Заанури гьамци кӀури дурар ужувлакк ккаъру: «Артухъ йихьай, артмиш йихьай, гьюлер ацӀай. Хъа ничхрари жил алабцӀри».

²³ Хябяхъ шулу, хъа гвачӀин шулу: йигъ хьубпиб.

²⁴ Заанури гъапну: «Гъит жили гьубкьу жюрейин чӀивишин хури: мал-къара, гьяшаратар ва гьубкьу жюрейин вягьши гьяйванатар». Ва гьаци шулу.

²⁵ Заанури гьубкьу жюрейин вягьши гьяйванатар, мал-къара ва аьхючӀвеъ гьяшаратар апӀуру. Заануриз му ужуйи рябкъюру.

²⁶ Заанури гъапну: «Ухьусир, Ухьуз ухшар айи адми апӀидихьа. Адмийи гьюлин балугъариин, завун ничхрариин, мал-къарайиин, вари жилиин ва вари гьяшаратариин агъавал апӀиди».

²⁷ Заанури, Чавсир, адми арайиз хуру, Заанурсир Дугъу арайиз хуру; Жилижви ва дишагьли арайиз хуру.

²⁸ Заанури, дурар ужувлакк ккаъну, кӀуру: «Артухъ йихьай, артмиш йихьай, жил алабцӀай, думу хиликк ккапӀай. Гьюлин балугъариин, завун ничхрариин ва жилин вари гьяйванатарин зиин агъавал апӀинай».

²⁹ Заанури гъапи: «Узу учвуз, жилиин алибкьан гьарсаб укӀан тум, ва тум айи гьарсаб гьарин бегьер хурагди тувназа.

³⁰ Хъа жилин гьяйванатариз, завун ничхрариз ва жан али гьарсаб жилин чӀивишназ Узу укӀан чрушин хурагди тувназа». Ва гьаци шулу.

³¹ Заанури, Чав арайиз гъабхибдилан ул илбицуру – вари гизаф ужуйи вуйи. Хябяхъ шулу, хъа гвачӀин шулу: йигъ йирхьубпиб.