Эстер 8 - Гирами Китаб

Жугьтари чиб уьрхбакан паччагьдин амур

¹ Гьадму йигъан Ахашʼверуш паччагьди жугьтарин душман Амандин вари девлет Эстериз тувнийи. Ва Мярдягьяй паччагьдихьна хъади гъафнийи (Эстери думу чан фуж вуш ктибтнийи).

² Паччагьди Амандихьан гъадабгъу тӀублан тӀубхъан хътабгъуру ва Мярдягьяйихьна тувру. Хъа Эстери Мярдягьяйиз Амандин мулкнан гъайгъу зигуб табшурмиш апӀуру.

³ ЦӀийикӀултӀан Эстер паччагьдихьна илтӀикӀуру: дугъан ликарикк дахъну, дугъу паччагьдикан, Амандин пис фикир, жугьтар пуч апӀуб, тамам дарапӀуз миннат апӀуру.

⁴ Паччагьди Эстерин терефназ гъизилин маргъ гьачӀабккуру. Эстер гъудужвну, паччагьдин улихь дийигъуру

⁵ ва кӀуру: «Эгер паччагьдиз ккун гъабхьиш, эгер узу паччагьдин рягьимлувализ лайикь вуш, эгер паччагьдиз дюзди рябкъюраш, агагеянжви Хаммедатайин бай Аманди, паччагьлугъдин вари вилаятариъ жугьтар тӀанкь апӀуз адабгъу къарар гъит дугъу батӀул апӀри.

⁶ Йиз халкьдиина бедбахтвал фици гъюраш, узхьан архаинди лигуз шулинхъа, йиз багахьлуйир фици тӀанкь шулаш, узхьан рябкъюз шулинхъа?»

⁷ Паччагь Ахашʼверушди паччагьдин хпир Эстериз ва жугьуд Мярдягьяйиз кӀуру: «Амандин вари девлет узу Эстериз тувунза, хъа жугьтар тӀанкь апӀуз ккун гъабхьи думу буруздикк ккерхну.

⁸ Паччагьдин ччвурнахъан дибикӀнайи ва паччагьдин тӀубланин мугьур кайи фунубра къарар батӀул апӀуз шлуб дар. Гьамус учву паччагьдин ччвурнахъан лазим вуйибсиб жугьтарин гьякьнаан къарар бикӀай ва паччагьдин тӀубланихьди дидʼин мугьур дивай».

⁹ Гьадмуган, шубубпи вазли, яни сиван вазли, къанна шубудпи йигъан, паччагьдин бикӀрудариз дих гъапӀнийи ва, Мярдягьяйи гъапиганси, цӀийи къарар адабгънийи ва вари жугьтариз, паччагьдин гъуллугъчйириз, Индияйиан Эфиопияйизкьан, вари варжна къанна ургуб вилаятдин гьякимариз, гьарсаб халкьдиз чан чӀалниинди, жугьтариз чпин чӀалниинди ва бикӀбан къайдайиинди кагъзар хътауру.

¹⁰ Му Ахашʼверуш паччагьдин ччвурнахъан адагъу ва паччагьдин тӀубланиинди мугьур иливнайи къарар хьади, паччагьдин илхйиригъян ужударстар гьяйвнариин илитну, чархачйир гьаънийи.

^11-12 Ахашʼверушдин паччагьлугъдин вари вилаятариъ сад йигъан, йицӀикьюбпи адар вазлин йицӀишубудпи йигъан, гьадму къарариинди паччагьди гьарсаб шагьриъ яшамиш шулайи жугьтариз, уч духьну, жвувхъанди женг гъабхуз ихтияр тувру. Эгер хилиъ яракь айи инсанар, фуну вилаятдиъ вушра, фуну миллетдикан вушра, жугьтариин алархьиш, думуган жугьтариз, дурар чпин бицӀидарра, хпарра хъади, тӀанкь апӀуз, хъа дурарин мулк тӀараш апӀуз ихтияр тувра.

¹³ Гьадму къанундин кьувват айи кӀажарикан вари халкьариз, вари вилаятариз хабар дебккну ккундийи, жугьтар гьадму йигъахьна гьязур хьубан ва душмнариз кьисас апӀбан бадали.

¹⁴ Паччагьдин илхйиригъян вуйи гьяйвнариин али чархачйир дишла рякъюъ учӀвнийи, паччагьдин амриинди. Паччагьдин амрикан Сузы гъалайиъ мялумат тувнийи.

¹⁵ Паччагьдихьан Мярдягьяй беневш ва уьру хьайин ва багьа лизи гинбин палтар, гьацира кӀулʼин гъизилин аьхю таж алди удучӀвуру. Сузы шагьриъ шадвал абхънайи.

¹⁶ Жугьтарин хулариъ акв ва шадвал, машкврин гьевес, лайикьлувал айи.

¹⁷ Фуну вилаятдиз, фуну шагьриз паччагьдин амрикан мялумат тувубси, варишваъ жугьтари дем, шадвал, машквар ккергъри гъахьну. Ва му уьлкейин гизаф халкьари жугьтарин дин кьабул апӀуз хъюгънийи, фицики дурарик жугьтарикан къурхувал кабхънийи.