Эстер 7 - Гирами Китаб

Аман буруздикк ккерхуб

¹ Эстерин демраз паччагь ва Аман гъафнийи.

² ЦӀийикӀултӀан дурари, улихьганси, чяхир убхъуру ва паччагьди Эстериз кӀуру: «Фу тӀалаб апӀурава, Эстер? Вари тамам апӀурза. ТӀалаб фу вуяв? ГьацӀ паччагьлугъ тӀалаб гъапӀишра – вари тувдизавуз».

³ Паччагьдин хпир Эстери жаваб тувру: «Эгер узу яв рягьимлуваликк ккаш, эгер паччагьдиз гьаци лазим вуш, йиз уьмур пуч дарапӀри – магьа йиз тӀалаб! Гъит йиз халкь пуч дарапӀри – магьа йиз аьрза! Гьаз гъапиш учу масу тувна – узура, йиз халкьра – урччвура, терг апӀура!

⁴ Эгер учу лукӀвализ туврайиш, учкан лукӀар апӀурайиш, узу ккебехъуйза – гьятта гьациб бедбахтвалиъра узу паччагь сикинсуз апӀдайза!»

⁵ Паччагь Ахашʼверушди Эстерихьан гьерхбар-хъерхбар апӀуз хъюгъру: «Шли? Фуж ву думу дициб ляхин гъапӀур? Наан а думу?»

⁶ Эстери жаваб тувру: «Думу къаршу душман – магьа гьаму инсафсуз Аман ву!» Паччагьдин ва дугъан хпирин улихь Амандик къурху кабхъру.

⁷ Хъял гъафи паччагьди чяхрин дем гъибтру, ва думу дараматдин багъдиз удучӀвуру, хъа Аман паччагьдин хпир Эстерикан, чан уьмур пуч дарапӀуб тавакъу апӀуз гъузру: дугъаз паччагьди чан кьисмат гьял гъапӀуб гъябкънийи.

⁸ Паччагь дараматдин багъдиан дем айишваз кьяляхъ гъафиган, дугъаз Аман, Эстер дуснайишвак унтӀ кабсну, рякъюру. Паччагьди чӀигъ апӀуру: «Йиз хулаъ, йиз улихь паччагьдин хпириина алжагъуб гьапӀруб ву!» Паччагьди гьаци гъапнийи – ва Амандин маш гъебкнийи.

⁹ Гьадмуган паччагьдин гъаравашарикан сар вуйи Харвонайи гъапну: «Гьякьикьатдиъра, Аманди чан гафариинди паччагь хатӀайихьан гъюрхю Мярдягьяйиз буруз гьязур апӀурайи, магьа гьамус думу къанна хьуб метр али буруз Амандин хуларин багахь дубсну!» Паччагьди амур гъапӀу: «Думу гьадушваъ буруздикк ккерхай!»

¹⁰ Мярдягьяйиз гьязур гъапӀу гьадму буруздикк Аман ккерхнийи. Ва паччагьдин хъял илцифнийи.