Эстер 6 - Гирами Китаб

Мярдягьяйиз гьюрмат апӀуб

¹ Думу йишван паччагьдиз нивкӀ гъафундайи. Дугъу тарихи гьядисйир дикӀурайи кӀажар хуз амур апӀуру, ва дурар паччагьдиз урхуру.

² Дурариъ Ахашʼверуш паччагь йивну йикӀуз кьаст ади гъабхьи паччагьдин дараматдин раккнар уьрхюрайи гъаравашар Бигтану ва Тереш Мярдягьяйи ашкар апӀуваликанра бикӀбар айи.

³ Паччагьди гьерхнийи: «Гьадму ляхин бадали Мярдягьяй фици лишанлу гъапӀунчва?» Паччагьдин гъуллугънаъ айи гьякимари жаваб тувнийи: «Дугъаз фукӀа пешкеш гъапӀундар».

⁴ Паччагьди гьерхру: «Гьатму гьяятдиъ айир фуж ву?» Паччагьдин дараматдин чӀатан гьяятдиъ айир, паччагьдикан чав дубсу буруздикк Мярдягьяй ккерхуб тӀалаб апӀури дуфнайи Аман вуйи.

⁵ Паччагьдин гъуллугънаъ айидари гъапи: «Гьяятдиъ дийигънайир Аман ву». Паччагьди амур апӀуру: «Гъит, гъюри».

⁶ Аман гъюру, ва паччагьди дугъхьан гьерхру: «Паччагьди чан гьюрмат улупуз ккуни инсандиз фу апӀуб лазим ву?» Аманди фикир апӀуру: «Паччагьди чан гьюрмат узуз дарди сарун шлиз улупидихъа?»

⁷ Ва жаваб тувру Аманди паччагьдиз: «Эгер паччагьдиз шлизкӀа чан гьюрмат улупуз ккунди аш,

⁸ гъит дугъаз паччагьдин палат ва паччагьдизси дабалгнайи, паччагь элеъру гьяйван хури.

⁹ Гъит гьадму палтар ва гьяйван паччагьдин вакиларикан сарихьна туври, хъа дугъу паччагьдиз чан гирамивал улупуз ккун гъабхьи кас гьадму гьяйвниин илитну, гьяйвнин улхьан дибисну, думу шагьрин майдандиина хъади гъюри ва мялум апӀри: „Паччагьди чан гьюрмат улупуз ккун гъабхьи инсандиз магьа гьамци апӀуру!“»

¹⁰ Гьадмуган паччагьди Амандиз амур апӀуру: «Кьан дарапӀди, уву гъапиганси, паччагьдин палат ва гьяйван гъадагъну, паччагьдин дараматдин раккнарихъ деънайи жугьуд Мярдягьяйихьна гъайих! Вари уву кӀурайиганси апӀин, фукӀа кӀваълан магьапӀан».

¹¹ Ва Аманди, палтар ва гьяйван гъадагъну, Мярдягьяйиин алахьуру ва, думу дабалгнайи гьяйвниин илитну, гьяйвнин улхьан дибисну, шагьрин майдандиина хъади гъюру ва мялум апӀуру: «Паччагьди чан гьюрмат улупуз ккун гъабхьи инсандиз магьа гьамци апӀуру!»

¹² Хъасин Мярдягьяй паччагьдин дараматдин раккнарихъна гъюру, хъа дерд гъабхьи Аман, дерднан лишан вуди кӀулра элебкну, хулаз гьялак шулу.

¹³ Аманди чан хпир Зерешдиз ва вари дустариз гъабхьибдикан ктибтуру. Ва гьамци кӀуру дугъаз фагьумлуйири ва дугъан хпир Зерешди: «Эгер думу яв аскканвалин багьна гъахьи Мярдягьяй жугьтарикан вуш, думу ккагъуз хьидарвухьан, дугъан улихь кӀул ис апӀидива!»

¹⁴ Дурари гьадму гафар дупну ккудукӀайизра, паччагьдин гъаравашар дуфну, Аман чкиди Эстери тешкил гъапӀу демраз хъади гъягъюру.