Эстер 4 - Гирами Китаб

Мярдягьяйи Эстерикан кюмек тӀалаб апӀуру

¹ Мярдягьяйиз му ляхникан хабар гъабшиган, дугъу чаин али палтар чӀяргъюру, дерднан лишанси ирин палтар алахьну, биширугра алабхьну, гьарай-фигъан ипну, шагьриантина гъягъюру.

² Паччагьдин дараматдин раккнарихъ дийигъуру, фицики мицдар палтар алди паччагьдин дараматдиъ учӀвуз ихтияр адайи.

³ (Паччагьдин му къарар фуну вилаятдиз хъубкьишра, жугьтари, дерин хажалатнаъ ади, ушвар дисури, ишуб – убгъуб апӀури, ирин палтар алахьну, биширугдиъ дахъри гъахьну.)

⁴ Эстерин лукӀар ва гъаравашар дугъахьна гъюру ва гъабшибдикан ктибтуру. Гъалабулугъ гъабхьи паччагьдин хпири Мярдягьяйиз ирин палтарин ерина жарадар гьаъру, амма Мярдягьяйи дурар кьабул апӀдар.

⁵ Гьадмуган Эстери паччагьдин гъаравашарикан сар вуйи Хатахдиз чахьна дих апӀуру ва дугъаз, Мярдягьяйихьан, фу гъабхьнуш ва гьаз, аьгъю апӀуз, табшурмиш апӀуру.

⁶ Хатах паччагьдин дараматдин багахь хьайи шагьрин майдандиин али Мярдягьяйихьна удучӀвуру.

⁷ Мярдягьяйи Хатахдиз гъабхьи варибдикан ктибтуру ва Аманди, жугьтар терг апӀбан гьякь вуди, паччагьдин хазнайиз аьхю чӀвеъ арс тувуз гаф тувнайиваликанра кӀуру.

⁸ Ва гъаравашдихьна Сузыйиъ адабгънайи жугьтар терг апӀбан гьякьнаан вуйи къарар кайи кӀажра тувру. Дугъу Эстериз гьаму кӀаж улупуб ва варибдикан ктибтуб тӀалаб апӀуру: гъит думу паччагьдихьна гъарахри ва чан халкь бадали тӀалаб ва миннат апӀри.

⁹ Хатах кьяляхъ гъюру ва Эстериз Мярдягьяйи гъапи гафар кӀуру.

¹⁰ Хъа Эстери Хатахдиз Мярдягьяйихьна гьамцдар гафар пуб табшурмиш апӀуру:

¹¹ «Паччагьдиз багахь вуйидариз ва вари вилаятариъ айидариз аьгъя: эгер сар фуж – вушра, жилижви ясана дишагьли, чаз гъач дарпиди паччагьдихьна айтӀан гьяятдиъ учӀвиш, дугъаз адабтӀурайи жаза саб ву – аьжал. Анжагъ паччагьди дугъан терефназди гъизилин маргъ гьачӀабккиштӀан, думу чӀивиди гъитурдар. Хъа узуз паччагьдихьна дих дарапӀди сумчӀур йигъ ву».

¹² Мярдягьяйихьна Эстерин му гафар гъапнийи.

¹³ Ва Мярдягьяйи Эстериз гьамциб жаваб тувру: «Гьадму паччагьдин дараматдиъ жугьтарикан сар уву сагъди гъузру кӀури, фикир мапӀан.

¹⁴ Эгер уву мициб йигъан ккебехъну гъузишра, жугьтар уьрхру жара чара хьибди, хъа уву йикӀидива, увухъди вари яв тухумра. Шлиз аьгъя, белки, уву гьамциб йигъаз кӀури паччагьдин хпир гъахьуншул?»

¹⁵ Гьадмуган Эстери Мярдягьяйиз гьамциб жаваб хътапӀуру:

¹⁶ «Гъарах, Сузыйиъ айи вари жугьтар уч апӀин ва узу бадали ушвар дисай – шубуд йигъан ва шубуд йишван мипӀанай ва мубхъанай. Узура йиз гъаравашарихъди ушвар дисурза, хъасин, къанунди къадагъа апӀурашра, паччагьдихьна гъягъюрза. Эгер узу гъакӀиш – йикӀиди».

¹⁷ Мярдягьяйи, душну, вари Эстери гъапибси апӀуру.