Эстер 3 - Гирами Китаб

Аманди жугьтар терг апӀуз кьаст апӀуру

¹ СацӀиб вахтналан Ахашʼверуш паччагьди агагеянжви Хаммедатайин бай Аман заан гъуллугъниин дерккру, дугъаз чан жара гьякимаризтӀан заан йишв тяйин апӀуру.

² Ва паччагьлугъдиъ вари Амандин улихь кьамкьариина ис шули гъахьну, гьаз гъапиш паччагьди гьаци амур гъапӀнийи. Анжагъ Мярдягьяй дугъан улихь кьамкьариина ис гъахьундайи.

³ Паччагьлугъдиъ айидари Мярдягьяйихьан гьерхнийи: «Гьаз уву паччагьдин амур тамам апӀурадарва?»

⁴ Дурари гьар йигъан Мярдягьяйиз гьадму гафар текрар апӀури гъахьну, амма думу хъпехъури адайи. Гьадмуган, Мярдягьяй чав гафниин дийигъуруш аьгъю апӀуз метлеб айи дурари варибдикан Амандиз ктибтнийи. Хъа Мярдягьяйи дурариз чав жугьуд вуйиваликан дупнайи.

⁵ Амандиз Мярдягьяй чан улихь кьамкьариина ис даршулайивал рябкъюру ва дугъак гъизгъин хъял кубчӀвру.

⁶ Амма сар Мярдягьяйиз жаза адабтӀуб дугъу чан зяифвалси гьисаб апӀуру. Хъа дугъаз Мярдягьяй фуну халкьдикан вушра гъапнийи. Ва Аманди Ахашʼверушдин вари паччагьлугъдиъ Мярдягьяйин халкь, вари жугьтар терг апӀуз ният апӀуру.

⁷ Ахашʼверуш паччагь духьну йицӀикьюд кӀуру йисандин сабпи ваз нисан улубкьнийи. Гьадму вазли, чан кьаст кӀулиз адабгъуз фуну ваз ва йигъ дюз гъюруш, Амандин амриинди тпут (пурим) ипнийи. Тпутну йицӀикьюбпи адар вазлин йицӀишубудпи йигъ улупну.

⁸ Аманди паччагь Ахашʼверушдиз гъапну: «Яв паччагьлугъдин вари вилаятарин халкьарин арайиъ сабсан халкь а. Думу халкьдин къанунар вардаринстар дар, мидланра савайи дурари паччагьдин къанунарра тамам апӀурадар. Паччагь му аьгьвалатнахъди рази духьну ккундар.

⁹ Эгер паччагьдиз ккун гъабхьиш, дугъу думу халкь терг апӀуз къарар адабгъиди, гьадмуган паччагьдин хазнайиз узу шубудварж агъзур кило арс хибдиза».

¹⁰ Паччагьди чан тӀубхъан мугьур али тӀублан хъадапӀну, агагеянжви Хаммедатайин бай Амандихьна, жугьтарин душмнихьна, тувру.

¹¹ Ва кӀуру паччагьди Амандиз: «Арс увуз гъибт, хъа гьадму халкьдикан фу ккундушра апӀин».

¹² Гьаци сабпи вазлин йицӀишубудпи йигъан паччагьди кагъзар дикӀрудар уч апӀуру, Аманди гъапигансиб къарар адабгъуру ва гьарсаб вилаятдиз, гьарсаб халкьдиз ерли чӀалниинди дидикӀнайи къарар кайи кӀажар хътауру. Къарар паччагь Ахашʼверушдин ччвурнахъ адабгъуб ва дугъан мугьриинди тасдикь дапӀнайиб вуйи.

¹³ Паччагьлугъдин вари вилаятариз жугьтар, бицӀидарилан гъадабгъуб кьабидариинакьан, дишагьлийирра, бицӀидарра, саризра инсаф дарапӀди, вари сад йигъан, йицӀикьюб кӀуру вазлин йицӀишубубпи йигъан йивну йикӀуб, яни тӀанкь, хъа мулк тӀараш апӀуб амур апӀурайи къарар хьади чархачйир гьаънийи.

¹⁴ Гьадму къанундин кьувват айи кӀажар вари вилаятариъ, вари халкьариз дурхну, вари гьадму йигъахьна гьязур духьну ккундийи.

¹⁵ Чархачйир паччагьдин амриинди чкиди рякъюъ учӀвнийи. Му къарар Сузы гъалайиъра гъубхнийи. Сузы шагьриъ зурба гъалабулугъ абхънийи, хъа паччагьна Аман ипӀуз-убхъуз деънийи.