Эстер 1 - Гирами Китаб

Паччагьдин дем

¹ Му паччагь Ахашʼверушдин вахтари гъабхьиб ву – гьадму, варжна къанна ургуб вилаятдин, Индияйиан Эфиопияйизкьан, паччагь вуди гъахьи Ахашʼверушдин.

^2-3 Гьадму вахтна чав Сузы шагьрин гъалайиъ паччагьдин тахтниин алди шубуд кӀуру йисан Ахашʼверушди чаз багахь инсанариз ва гьякимариз аьхю дем апӀуру. Фарсарин ва мидийирин кьушмарин кӀулиъ айидар, бегзадйир ва вилаятарин аьхюдар паччагьдихьна гъафнийи,

⁴ хъа дугъу дурариз паччагьлугъдин девлет, хазна, чан гюрчегʼвал ва заанвалин нурлувал улупнийи. Гьамци варжна миржцӀур йигъан давам гъабхьнийи.

⁵ Гьаму йигъар гъушган, паччагьди Сузы шагьрин гъалайин вари халкьдиз, девлетлуйиризра, касибаризра, паччагьлугъдин дараматдин багъдиъ ургуд йигъан дем тешкил гъапӀнийи.

⁶ Душваъ багьа лизи гинбин ва беневш хьайин парча илипну, уьру хьайин ва гъашдин лизи тӀурнариинди кибтӀну, арсран дукьнар ккирчну, мармардашдин дунар дурсну, пажар гьязур гъапӀнийи. Деъру йишвар арсрандар ва гъизилиндар вуйи, хъа жиликк мармардаш ва нур туврайи багьа гъван ккабхьнайи.

⁷ Убхъруб жюрбежюр гъизилин гъабариъди туврайи, иллагьки паччагьдин чяхир кьадар адрубкьан айи.

⁸ Фукьан ккундуш убхъуз ихтияр тувнийи – паччагьди чан паччагьлугъ дараматдин вари гьякимариз амур гъапӀу: гъит инсанари чпиз ккунибкьан убхъри.

⁹ Хъа паччагьдин хпир Ваштийи Ахашʼверушдин паччагьлугъ дараматдиъ дишагьлийириз дем гъапӀнийи.

Вашти сарун паччагьдин хпир дар

^10-11 Ургуд кӀуру йигъан чяхир дубхъну гьевес ачухъ гъабхьи паччагь чан ургур дугъаз гъуллугъ апӀурайи гъаравашдихьна илтӀикӀуру – дурариз Мехуман, Биззета, Харвона, Бигта, Авагта, Зетар ва Къаркъас кӀуйи – ва, халкьдиз ва гьякимариз чан хпир Ваштийин успагьивал (хъа думу кьадарсуз гюрчегур вуди гъахьну) улупбан бадали, дурариз чахьна, паччагьдин тажра алабхьну, хпир хъади гъюб амур апӀуру.

¹² Гъаравашари Ваштийиз паччагьдин амрикан гъапнийи, амма думу гъюз рази гъахьундайи. Паччагьдиз яман хъял гъафнийи, дугъан ажугълувал кьадар адруб вуйи.

¹³ Паччагь вахтарин гъавриъ айи зигьимлударихьна илтӀикӀуру, – думу къанунар ва ихтиярар аьгъю инсанарихьан насигьят гъадабгърур вуйи.

¹⁴ Думуган дугъаз варитӀан багахьдар Каршена, Шетар, Адмата, Таршиш, Мерес, Марсена, Мемухан вуйи, фарсарин ва мидийирин му ургур гьякимдиз паччагьдихьна учӀвуз ихтияр айи ва паччагьлугъдиъ дурар садпи инсанар вуйи.

¹⁵ «Ахашʼверуш паччагьдин амур тамам дарапӀу паччагьдин хпир Ваштийиз къанундиинди гьапӀуб лазим ву?» – гьерху паччагьди.

¹⁶ Ва гъапи Мемуханди паччагьдиз ва гьякимариз: «Вашти неинки паччагьдин улихьси, Ахашʼверушдин паччагьлугъдиъ айи вари халкьарин ва гьякимарин улихьра тахсиркар ву.

¹⁷ Му ляхникан вари дишагьлийириз аьгъю хьибди ва чпин жилариз гьюрматсузвал улупиди. „Чав Ахашʼверуш паччагьди чахьна чан хпир Вашти хъади гъюб амур гъапӀну, хъа думу гъафундар“, – пиди дурари.

¹⁸ Фарсарин ва мидийирин мессеблу, адлу дишагьлийириз паччагьдин хпирин мициб гьюрматсузваликан гъеебхьну – гъи дурари гьякимариз дидкан ктибтиди, гьадмуган аьхир адру гъярхьувалар ва хъпебехъувалар арайиз гъиди.

¹⁹ Эгер паччагьдиз ккун гъабхьиш, гьамусдихъантина Вашти Ахашʼверушдихьна дарифри кӀуру, батӀул апӀуз даршлу мялумат адабгъри ва Персияйин ва Мидияйин къанунариъ бикӀри. Хъа чаз хпирди дугъу жара дишагьли, гьадмутӀан ужур, гъадагъри.

²⁰ Паччагьди адабгъу гьадму къарарнакан вари паччагьлугъдиз хабар тувган, дишагьлийири, девлетлуйирилан гъадабгъну касибариинакьан, чпин жиларин гьюрмат уьбхиди».

²¹ Му теклиф паччагьдиз ва гьякимариз кьабул гъабхьнийи.

²² Ва паччагьди, Мемухандин насигьят тамам апӀури, чан вари мулкариина, гьарсаб вилаятдиз, гьарсаб халкьдиз чан чӀалниинди кагъзар хътауру. «Гъит жилижви чан ужагъдиъ агъа ишри», – вари чӀалариинди гьамциб мялумат тувнийи.