Эфес 6 - Гирами Китаб

Абйир-бабар ва бицӀидар

¹ БицӀидар, Агъайихъди гъягърудариз лайикь вуйиси, ичв абйир-бабарихъ хъпехъури апӀинай – му дюзвал ву.

^2-3 «Уву бахтлу хьпан ва жилиин ярхи уьмур хъапӀбан бадали, яв адаш-дадайиз гьюрмат апӀин» – му Аллагьди гаф тувнайи сабпи табшуругъ ву.

⁴ Адшар, ичв бицӀидарик хъял макапӀанай, хъа Агъайин тербияйихъдина насигьятарихъди ижмиди вердиш апӀинай.

Эйсйир ва лукӀар

⁵ ЛукӀар, учву Месигьдиз мютӀюгъ шлуси, вари юкӀв хъипну, гьюрмат ади ва гучӀ кади жилин ичв агъйириз мютӀюгъ йихьай.

⁶ Дурариз учву ккун хьпан бадали, зиълан апӀруси мапӀанай, хъа юкӀв хъипну, Аллагьдин ният тамам апӀурайи Месигьдин лукӀарси лихай.

⁷ Адмийирихъ лихурайиси ваъ, хъа аьршарин Агъайихъ лихурайиси юкӀв хъади лихай.

⁸ Учвуз аьгъюганси, учв лукӀ вушра – даршра, шли ужуб ляхин гъапӀиш, гьарсаб ляхниз Агъайи пешкеш тувди.

⁹ Учвура, агъйир, лукӀарихьна гьаци йихьай. ГучӀар ккауб гъибтай. Учвуз аьгъюганси, ичвра, дураринра сар Агъа ву аьршариъ Айир, хъа Думу гьич саринра тереф бисрур дар.

Аллагьдин рукьан палат алабхьай

¹⁰ Аьхирки, Агъайиъ саб хьувалиъ, Дугъан удукьувалиъ ва кьувватнаъ ижми йихьай.

¹¹ Аллагьди учвуз тувнайи вари яракъ, иблисдин тӀулариз къаршу дугъужвуз, алабхьай.

¹² Фицики ухьу дяви йиккканна ифдикан вуйи адмийирихъди гъабхурадархьа, хъа аьхюдарихъдина гьюкумдрарихъди, гьаму мучӀушнан дюнʼя хилиъ дибиснайидарихъди ва завариъ писвалин рюгьярихъди гъабхурахьа.

¹³ Ари гьаддиз, писвал алжабгъуз хъюбгъю йигъан учвхьан къаршу дийигъуз, ва кӀул адабгъну гъузуз, Аллагьдин вари яракъ учвухьна бисай.

¹⁴ Юкьвнаан гьякьвал идибтӀну ва дюзвалин рукьан палатдиъ учӀвну, ижмиди дийигъай.

¹⁵ Ичв ликариин алахьрударра, дюнʼяйиз Ужувлан хабар гъабхуз, гьязурди ишри.

¹⁶ Варибдилан гъайри, иблисдин цӀа кайи чӀимрар ктӀуршвуз, хъугъвалин гъалхан ижмиди бисай.

¹⁷ Уьрхрувалин рукьан баккара улубкӀай ва Рюгьнан ханжалра, яни Аллагьдин Гаф гъадабгъай.

¹⁸ Гьубкьу жюрейиинди ккарагай ва Рюгьнаъди учвуз ккуни вахтна Аллагьдикан тӀалаб апӀинай. Гьаци хьуз гьязурди ва Аллагьдин вари гирами халкьдихъан гьаммишан ккарагури гъузай.

¹⁹ Узу ушв абццубси, лазим гафар тувбан бадали ва Ужувлан хабарнан сир улихь гучӀ ктарди ктибтбан бадали, узхъандира ккарагай.

²⁰ Узу гьеле гьаму зунжрариъ ашра, гьаддин гьякьнаан гьаънайир вуза. Узу лазим вуйибси дирбашди дидкан хабар дебккбан бадали, узхъан ккарагай.

²¹ Узу гьапӀраш, Агъайиз дугъривалиинди гъуллугъ апӀурайи йиз ккуни гъардаш Тихикди узкан вари пидичвуз.

²² Думу гьаддиз учвухьна, ич ляхнарикан ктибтуз ва ичв юкӀварик аьшкь капӀуз гьаърайир вуйиз.

²³ Гъит, гъардшар, мясляаьт, масанвал ва хъугъвал Адаш Аллагьдихьан ва Агъа Иса Месигьдихьан ибшричвуз.

²⁴ Зат аьхир адарди ихь Агъа Иса Месигь ккуни варидариз ужʼвал ибшри.