Эфес 4 - Гирами Китаб

Рюгьнан сабвал

¹ Узу, Агъайин тереф дибисна кӀури дустагъдиъ айири, миннат апӀуразачвуз: Аллагьди учвуз дих дапӀнайи гъуллугъназ лайикь вуйиси яшамиш йихьай.

² Дамагъсузди ва гъюдалди гъузай, чиб-чпихьна сабурлуди ва масанди йихьай.

³ Вари кьувват жалб дапӀну мясляаьтнахьди рюгьнан ичв сабвал йибтӀай.

⁴ Рюгь сар ву, Месигьдин беденра саб ву ва, гьадрарси, Аллагьди учвуз дих дапӀнайи умудра саб ву.

⁵ Сар Агъа, саб хъугъувал, ухьу вари штуан хьувалин метлебра саб ву.

⁶ Айир – сар Аллагь. Думу варидарин Адаш ву. Думу ихь варидарин зиин Алир ву, Дугъан ляхнар ухьʼинди варидариинди ву, ва Думу ухьуъ варидариъ яшамиш шула.

⁷ Месигьди улупнайи кьадарниинди ухьуз гьарсариз хъуркьувал гъазанмиш апӀуз шлу багъиш тувнахьуз.

⁸ Гьаддиз дибикӀнура а: «Чахъди кьадарсуз йисирар хъади, Думу гъалибвалиинди кӀакӀназ удучӀвну, ва Чан адмийириз багъишар тувну».

⁹ «КӀакӀназ удучӀвну» кӀуру гафну мугагьназ Думу исина, жилин кӀанакк йишвариз гъювал улупура.

¹⁰ Чахьди вари дюнʼя абцӀбан бадали аьршартӀан зиина за Гъашир, гьадму исина Гъушур ву.

¹¹ Ари Гьадму ву багъишар Тувур: фужариз – вакилар хьуб, фужариз – пайгъамбрар, фужариз – Ужувлан хабар ктибтрудар, фужариз – хъугърударин аьхюдар ва мялимар хьуб.

¹² Мици, Аллагьдин гирами халкь, Месигьдин беден артмиш апӀуз гъуллугъназ гьязур апӀбан бадали, гъабхьну.

¹³ Му мици, ихь хъугъувалиъ ухьу вари саб хьайизкьан, Аллагьдин Бай аьгъю апӀайизкьан, рюгьнаъ хъуркьувалихъна гъяйизкьан ва вари тамамвал Айириз – Месигьдиз ухьу ухшар шайизкьан хьибди.

¹⁴ Хъа думуган ухьу сарун лепйири ккалакьурайи ва гьар жюре каламарин микӀарихь гьитнайи, инсанар улдугуз гъитри, аьмалдар кучӀляхярикк ккахъру бицӀидарси хьидархьа.

¹⁵ Эгер ккунивалиинди гьякьʼвал кӀури гъабхьиш, варибдин кӀул вуйи Месигьдин хасиятназ ухшарди ухьу аьхю хьидихьа.

¹⁶ Гьадгъан кюмекниинди вари беден саб дубхьна ва гьар жюре аьлакьйири кибтӀна, дидин вари паяри гьарсабди чаз улупнайиб тамам апӀура. Гьамци вари беден аьхю ва масанвалиъ артмиш шула.

Йирси ва цӀийи уьмур

¹⁷ Гьаци вуйиган узу Агъайин ччвурнахъан кӀураза, тӀалаб апӀураза: ичӀи фикрар айи аллагьсузарси яшамиш хьуб дипай.

¹⁸ Дурарин фагьум рюгьнан курвалиан ва юкӀвар дициркънайивалиан мучӀу дубхьна, дурар Аллагьди тувру уьмрихьан гьадатӀна.

¹⁹ Дурар, инсанвалин лишан дудубгну, адрацӀди, гьубкьу чиркишнаъ арсри, кьяппавалиъ ахьра.

²⁰ Хъа учвуз Месигь дици аьгъю гъахьундарчвуз.

²¹ Саб шак адарди, Дугъкан учвуз гъеебхьунчвуз ва, Гьадгъан терефкрар вуйивализ дилигну, учвуз гьякьʼвал улупунчвуз, фицики гьякьʼвал Исайиъ а.

²² Ичв йирси табиаьтдиз хас вуйи, улар йитӀру кучӀлин тямягьяри пуч апӀурайи мугагьназдин уьмур гъибтуз учвуз улупнийи.

²³ Ичв фикир апӀбан саягъ цӀийи алапӀай,

²⁴ Аллагьдин хасият – гьякь вуйи дюзвал ва гирамивал улупурайи цӀийи табиаьт «алабхьай».

²⁵ Гъит гьарсари кучӀал дипри ва жвуван багахь хьайидариз дюзвал йипри, гьаз гъапиш ухьу вари саб бедендин паяр вухьа.

²⁶ Хъял кубчӀвнади гунагь мапӀанай. Гъит ичв хъял ригъ алабхъайиз ккядябхъри,

²⁷ ичв уьмриъ иблисдиз йишв мутуванай.

²⁸ Шли гьитӀибкӀуйиш, сарун мигьитӀибкӀан, жвуван хилари гъазанмиш апӀин ва адрудариз капӀ.

²⁹ Гьич сабкьан ахмакь гаф мапӀанай, ужуб рякъюхъ хъаъру ва хъпехърудариз хайирлу гафар йипай.

³⁰ Ккадаъру Йигъ гъяйиз учвʼин печать йивнайи Аллагьдин Гирами Рюгьназ гиран макадапӀанай.

³¹ КӀван гьарсаб кьутӀкьливалихьан, хъял гъювалихьан, тюнтвалихьан, чӀигъарихьан, люкьнар-агьрарихьан, гьар жюре хъял бисувалихьан азад йихьай.

³² Сар-сарихьна гьюрмат ади йихьай, учву Месигьдиъ саб гъахьиган Аллагьди учвлан фици хил алдабгънуш, учвура чиб-чпилан хил алдабгъури гъузай.