Эфес 3 - Гирами Китаб

Аллагьсузарин арайиъ Павелин ляхнар

¹ Магьа гьаддиз узу, Павел, учву, аллагьсузар бадали, Месигь Исайиланмина дустагъдиъ аза.

² Учвуз, икибаштӀан, Аллагьди узуз Чан ужʼвал учвуз улупуз табшурмиш дапӀнайиваликан деебхьначвуз.

³ Дугъу узуз Чан сир ачухъ гъапӀунзуз, узу дидкан учвуз жикьиди гъибикӀнийза.

⁴ Гьаму гъурхиган, Месигьдин сирнакан узуз фу аьгъяш, йиз аьгъюваларикан учвхьанра аьгъю апӀуз шулчвухьан.

⁵ Му сир аьгъю хьуб гьамусдизкьан айи инсаниятдиз тувнайиб дайи. Хъа гьамус Рюгьну Аллагьдин гирами вакиларизна пайгъамбрариз думу аьгъю гъапӀну.

⁶ Думу сир магьа гьаму ву: жугьдарихъди сабси жугьуд дарударра, Ужувлан хабарнахъ хъугъну, Аллагьдин ужувлан ирсчйир ву ва дурарихъди сабси саб бедендик ктикьура. Иса Месигьдик ктикьрудариз тувнайи гафнакан гьадраризра ка.

⁷ Аллагьдин кьувватну узуз тувнайи ужувлиинди гьадму Ужувлан хабар рабгъру гъуллугъчи духьназукан.

⁸ Узуз, Аллагьдин халкьдин арайиъ варитӀан асккануриз, гьаму багъиш тувназуз: Аллагь аьгъдрудариз ебцуз удудубкьру Месигьдин девлетнакан Ужувлан хабар дебккуб.

⁹ Вари халкь гъапӀу Аллагьди сифте бинайиан жиниди уьбхюрайи гьадму ляхнин гьякьнаан варидариз аьгъювалар арццру багъиш тувназуз.

¹⁰ Гьадму ляхнин метлеб: гьарсаб жюрейиинди арайиз удубчӀвру Аллагьдин фагьум вари дюнʼяйиъ айи Месигьдихъ хъугънайидарилантина аьршариъ айи аьхюдариз ва гьюкмариз гьамус ачмиш дубхьну ккунду.

¹¹ Му Дугъан ихь Агъа Иса Месигьдиинди тамам гъапӀу гьаммишандин ният ву.

¹² Месигьдиъ саб духьну ва Гьадгъахъ хъугъну, ухьхьан, гучӀ ктарди ва саб шак адарди, Аллагьдихьна гъюз шулу.

¹³ Гьаддиз, учву бадали узу аьзабарикк ккахъна кӀури, ккун апӀураза, юкӀв макадабтӀанай, дурар ичв адлувализ ву.

Месигьдин масанвал

¹⁴ Гьаддин бадали узу Адашдин улихь, кьамкьариинди ккарагури, дийигъназа.

¹⁵ Гьадгъухьан завариин ва жилариин гьарсаб тухми ччивар дисура.

¹⁶ Узу, Аллагьди Чан аднан булвалиан Чан Рюгьниинди ичв рюгь кьувватлу апӀуз,

¹⁷ хъугъувалиинди ичв кӀваъ Месигь учӀвуз, ичв уьмрин ччивна шибритӀ масанвал хьуз,

¹⁸ Аллагьдин вари гирами халкьдихъди учвура Месигьдин масанвалин яркьушнан, ярхишнан, ягълишнан ва деринвалин гъавриъ ахъуз,

¹⁹ учвуз инсандин фагьмиъ удрубшру гьадму масанвал аьгъю хьуз, ичв уьмур Аллагьдин тамамвалихьди абцӀуз ккарагураза.

²⁰ Хъа, ухьуъ Чан кьувват гьяракатнаъ ипну, ухьу ккун апӀрубтӀан вая ккунийкӀан, кӀурубтӀан гизаф артухъ тувуз Шлуриз,

²¹ гъит, Иса Месигьдилантина ва вари дюнʼяйин хъугърударилантина гьаммишандиз наслариан наслариз ад ибшри! Амин.