Даниял 8 - Гирами Китаб

Даниялиз якъ ва кьун рякъюб

¹ Балтасари паччагьвал апӀури шубудпи йисан узуз, Даниялиз, сабсана нивкӀ гъябкъюнзуз – гьатмунубдихьна, сабпибдихьна, аьлава вуйиб.

² Узу Элам уьлкейин Сузы кӀуру шагьрин гъалайиъ ади гъябкъюнзуз. Узу Улав кӀуру гъанавдихъ хъади гъябкъзуз.

³ Узу кӀул за гъапӀза ва гъябкъзузки: гъанавдин гъирагъдихъ саб якъ дийибгънайи. Дидʼин кьюб ярхи кӀарчар алийи, ва саб кӀарч, узуз рябкъюри, гьатмунубтӀан кьанди удубчӀвуб вушра, ярхиб вуйи.

⁴ Ва узуз гъябкъзузки, гьаму якъру, кьиблайиздина, кафарийиздина ригъ алабхъру терефназди кӀул йивурайи, ва дидин улихь вягьши гьяйванатарикан сабдихьанра дийибгъну гъубзуз шуладайи, ва сабдизра дидхьан мюгьлет адайи. Диди, чаз фу ккундуш, гьадму вари апӀурайи, ва дидин кьувватра гъюблан-гъюбаз артухъ шулайи.

⁵ Узу гьаму ляхнин фикрикк ккахъзу – ригъ алабхъру терефнахъанди, вари жил ккадапӀури, жиликкьан ктрубкӀри, кьун гъюрайи, ва дидин унтӀаъ зурба кӀарч айи.

⁶ Думу узуз гъанавдихъ дийибгънади гъябкъю кьюб кӀарч али якърахьна зигну гъюрайи, дидʼина зурба ажугълувал ади жабгъну гъюрайи.

⁷ Ва узуз гъябкъзузки, багахь гъабхьиган, хъана артухъди ажугълу дубхьну, диди якъраз йивуру ва дидин кьюбиб кӀарчарра улдушвуру. Якърахьан дидиъ удубкьну дугъубжвуз гъабхьундайи; кьуну думу алдабку ва ликариккан гъапӀу – якъраз аькси хьуз мумкинвалкьан гъабхьундайи.

⁸ Хъа кьун хъана гизаф кьувватлу гъабхьнийи – ва мушвахь, думу кьудратлу гъабхьиган, аьхю кӀарч дюбгъну, дидин ерина жара юкьуб кӀарч итӀигъу, дюнʼяйин гьарсаб терефназди.

⁹ Дурарикан сабдиин хъана сабсанра кӀарч илибшнийи; цӀийина думу бицӀиб вуйи, амма хъасин аьхю гъабхьи ва кьиблайиздина, ригъ удубчӀвру терефназдина гюрчег вилаятдихьинди гьачӀабкку.

¹⁰ БицӀи кӀарч заварин кьушмихьнакьан за гъабхьи, саб пай кьушум ва саб пай хядар диди жилиина ирчу ва дурар ликариккан гъапӀу.

¹¹ Диди, кьушмин Аьхюрихьнакьан за дубхьну, гьар йигъандин гъурбан апӀуваларихъ Думу мягьрум гъапӀу ва Дугъан Марцци Ужагъ кабцӀу.

¹² Ва гьар йигъандин гъурбан апӀувалихъди, кьушумра дидихьна аьрвалар хуз тувнийи. Диди гьякьикьат жилʼина гатӀабхьу; гьамци чан гьяракатариъ думу улихь гъубшу.

¹³ Ва узуз, санур малайикди кӀури, хъа гьатмунур малайикди кӀурайирихьан гьерхри, гъеебхьзуз: – Гьар йигъандин гъурбан апӀбакан, аьрвалар хуз ва ккидипуз тувнайи Марцци Ужагъдикан, аьжуз дапӀнайи кьушмикан улупдар вари гизаф вахтназ давам шули гъузуйкӀан?

¹⁴ Гьатмунури жаваб туву: – Кьюд агъзурна шубудварж гъурбнар апӀуз лазим шлу гвачӀниндизна хъябяхъдизкьан; хъасин Марцци Ужагъ цӀийи алапӀиди.

Жабраили нивкӀун мянайин гъаври аъру

¹⁵ Гьаму нивкӀ дябкъну, узу, Даниял, дидин мянайин гъаври хьуз чалишмиш гъахьунза – ва йиз улихь фуж-вуш, рякъбариан жилижвисир, дийигъдиз.

¹⁶ Ва узуз Улав гъанавдиин сес гъеебхьзуз – диди дих апӀурайи: – Жабраил! Улупдарин думу гъаври аъ.

¹⁷ Думу узу дугъужвнайи йишвахьна гъюз хъюгъю. Думу дуфну хъуркьган, узу, пис гучӀ кабхъну, машнахъди ккадакзу. Хъа дугъу узуз гъапи: – Аьгъю йибхьки, эй инсан: гьаму улупнайидари дюнʼяйин аьхиримжи вахтарикан аьян апӀура.

¹⁸ Дугъу узухъди гафар апӀурайи вахтна, узу, амриан душну, машкӀанаккди ккадакну дахънайза. Думу узук куркӀу, ликриина узу за гъапӀу

¹⁹ ва гьамци гъапизуз: – Гьамусяаьт узу увуз аьхириъ, ажугълу йигъари, ккудукӀру вахтари фу шулуш, хабар тувурзавуз.

²⁰ Увуз кьюб кӀарч али якъ гъябкъюнвуз – мурар паччгьар ву – мидийирин ва фарсарин.

²¹ Хъа кьун – му грек паччагь ву. УнтӀаъ айи аьхю кӀарчра – му сарпи паччагь ву.

²² КӀарч улдубшвну, ва дидин ерина юкьуб кӀарч удучӀвну – миди улупураки, думу халкьдин юкьуб паччагьлугъ хьиди, амма сабпибсикьан кьувватлу дарудар.

²³ Хъа му паччагьлугъарин аьхирихъна, нягьякьʼвалар тухъди гъахьиган, бичран улар айи, иблисвалиъ бажаранлу паччагьдин гьюкум хьибди.

²⁴ Думу гужлир хьиди – амма жвуван кьувватниинди ваъ. Дугъу зурба алархьбар-ккидирчбар апӀиди, гизаф писвалар апӀиди, кьудратлударра, марццидарин халкьра гъирмиш апӀиди.

²⁵ Зурба аьмалдар, думу чан иблисвалин гизаф ляхнар апӀуз хъуркьди – ва фурслу хьиди. Хабар хьайизра, дугъу гизафдар гъирмиш апӀиди, – ва Аьхюдарин Аьхюризра аьксиди удучӀвиди. Думу тӀанкь апӀиди – амма инсандин хилʼан ваъ.

²⁶ Хябяхъяриканна гвачӀинарикан вуйи улупнайидар кайидар ву. Амма увуз гъябкъю нивкӀ сабан жиниди гъибт; думу улуркьуз ккимбу ярхла йигъарикан ву.

²⁷ Узу, Даниял, гьадмукьан бизар духьнайзуки, гьятта швнуд-сад йигъан, кетӀерццну, дахънура гъахьунзу. Хъасин узу гъудужвза ва хъана паччагьдин гъуллугънаъ дийигъза. Узу нивкӀукди гъябкъюбдиан пис къурхувалиъ ади гъахьиза ва дидин гъаври гъахьундайзу.