Даниял 7 - Гирами Китаб

Даниялиз юкьуб нахшир рякъюб

¹ Балтасарин, Вавилондин паччагьдин, гьюкмин садпи йисан Даниялиз, чан ахникк даахнайириз, нивкӀʼан гъябкънийи. Дугъу думу нивкӀ гъибикӀнийи. Мушвахь дугъан ихтилат ккебгъра.

² Данияли гьамци кӀура: йишвну даахнайиган, узуз гьациб нивкӀ гъябкъюнзузки, зурба гьюлиин, заварилан дуфну, юкьуб жюрейин микӀ-тӀурфан гъедебгнайи

³ ва гьюлиан юкьуб зурба вягьши гьяйванатар удучӀвурайи, чиб-чпиз ухшар дарудар.

⁴ Сабпиб аслансиб вуйи, ва дидик люкьран хлинццар кайи. Амма хъасин, дидин хлинццар кадатӀну, гъитӀибккну, думу, адмиси, ликри дебккну ва дидиз инсандин фагьум тувну, гъябкъюнзуз.

⁵ Гьатмуну гьяйванат кьялхъян ликариина за дубхьнайи швеъсиб вуйи. Дидин ушвниан, кӀираригъян, шубуб кӀураб гъитӀибгънайи. Ва дидиз: «Гъудубжвну, увуз ккунибкьан йикк ипӀин!» – кӀури, ихтияр тувнайи.

⁶ Хъасин узуз сабсана вягьши гьяйванат гъябкъзуз – думу пеленгсиб вуйи, ва дидин йирфарикна юкьуб хлинцц ктучӀвнайи. Муну гьяйванатдиин юкьуб кӀул алийи, ва дидиз гьюкум тувнайи.

⁷ Хъасин йиз йишвандин нивкӀукди узуз юкьубпи вягьши гьяйванат гъябкъзуз – ажугълу, къурхуллу, яман кьувват айи, дидиъ зурба рукьан силбар айи. Фу алабхъишра, диди «хъумпӀ» дапӀну, вари хътӀюбкъюйи ва дагъитмиш апӀуйи, хъа хъирибгъуб ликариккан апӀуйи. Думу гьатмуну вягьшийириз ухшар дайи, дидʼин йицӀуб кӀарч алийи.

⁸ Узу думу кӀарчарихъ ул хъипза – ва дурарин арайиъ сабсана бицӀи кӀарч кудубчӀвнади гъябкъзуз, ва, дидиз йишв апӀбан бадали, айидарикан шубуб кӀарч удугънайи. Думу кӀарч, инсандиъси, улар айиб вуйи ва заанвал кади улхру ушв алиб вуйи.

⁹ Хъасин узуз гъябкъзуз: Айи мушваъ дивну тахтар, тахтʼин Йисар Кюгьневуйир. Лизи йифси – Дугъан палтар, Кушар – ччилан лизи хьаси. Тахтра дугъан – ву цӀин ялав, Тахтнан чархар – мурз али цӀа.

¹⁰ Ахмиш духьна гъати селлер цӀин, удучӀвури Дугъʼан. Дугъан гъуллугънаъ а варжар-агъзрар, Гьязурра ву агъзрар-агъзрар. Деънийи Судйир, Ва арццнийи китабар.

¹¹ КӀарчлин ушвниан дамахлу гафар удучӀвхъанмина ккебгъну, та-а-ап думу вягьши йивну йибкӀайизкьан, хъа дидин жандак, цӀигъ гъипну, терг апӀайизкьан, фу гъабхьнуш, узуз вари гъябкъюнзуз.

¹² Имбу вягьшйирихьан гьюкум тадабгънайи, амма дурариз уьмур гъибтнийи – вяда хьайизкьан.

¹³ Ва гъябкъзуз йишвандин йиз нивкӀукди: Дифарихъди завʼан фуж-вуш сар шула багахь – инсансир ву думу. Хъади гъушний, хъуркьси, думу Йисар Кюгьне вуйирихьна.

¹⁴ Тувний дугъаз гьюкум, гьюрмат ва паччагьлугъ, Вари халкьар, тухмар ва миллетар хьиди дугъаз мютӀюгъ. Дугъан гьюкум, батӀул даршлу, ву даима, Аьхир адруб хьибди Дугъан паччагьвалра.

¹⁵ Узук, Даниялик, гъалабулугъ кабхъзук – узуз гъябкъюбди къурхулу гъапӀзу.

¹⁶ Узу, дийигънайидарикан сарихьна дуфну, гьамдин варибдин фици гъаври духьну ккундуш, дугъхьан гьерхза. Дугъу узуз, гъябкъюбдин мяна ачухъ апӀури, гъапи:

¹⁷ – Гьаму юкьуб зурба гьяйванат – жилиин шуз имбу юкьур паччагьлугъ ву.

¹⁸ Амма хъасин паччагьлугъ ВаритӀанзаанурин марццидарихьна тувди, ва дурари аьсрариинди ва гьаммишандиз паччагьвал апӀиди.

¹⁹ Думуган узуз имбударихъна гъубшуб дару, пис ажугълу, рукьан силбар айи ва йифрин бацар али, алабхъуб вари, «хъумпӀ» дапӀну, хътӀюбкъру ва дагъитмиш апӀру, хъа хъирибгъубсана ликариккан апӀру юкьубпи вягьшийин фици гъавриъ ахъруш, аьгъю апӀуз ккун гъабхьизуз.

²⁰ Гьацира дидин кӀулʼин али йицӀуб кӀарчли фу улупураш, ва аьхиримжи кӀарч, чаз йишв азад апӀбан бадали шубуб кюгьнедар адахьган удубчӀвуб – му улар айи ва заанвал кайи гафар апӀру ушв али кӀарч, имбудартӀан аьхюди рябкъруб – фу вуш, аьгъю апӀуз ккун гъабхьизуз.

²¹ Узуз гьаму кӀарч марццидарихъди дявдиъ ади ва дурар ккагъри ади гъябкъюнзуз,

²² та-а-ап чан Йисар Кюгьневуйир гъяйизкьан гагьди – ва думуган ВаритӀанзаанурин марццидарихьна гьякьʼвал гъурубкьнийи: вахт улубкьу, ва марццидар гьюкмихьна гъафи.

²³ Жаваб вуди дугъу гъапизуз: – Юкьубпи вягьшийин гьамци гъаври духьну ккунду: жилиин имбудариз ухшар дару юкьубпи паччагьлугъ хьибди, ва диди жилиин алибкьан вари абшвди, лик йивури ва дагъитмиш апӀури хьибди.

²⁴ Хъа йицӀуб кӀарчлин гьамци гъаври духьну ккунду: гьаму паччагьлугъдиъ йицӀур паччагь хьиди, хъасин – гъиди сарсана, муганаз айидариз ухшар дарур, дугъу шубур паччагь ултӀуккиди.

²⁵ Думу ВаритӀанзаануриз аьксиди улхури хьиди ва ВаритӀанзаанурин марццидариз гюн тутруври хьиди, машкврар ва Къанун батӀул апӀуз кьаст хьибди. Ва марццидарра дугъан гьюкмиз тувну хьибди – саб муддатназ, кьюб муддатназ ва гьацӀ муддатназ.

²⁶ Амма чпин тахтариина Судйир гъиди – ва дугъхьан гьюкум дючӀюбгъиди, думу чавра терг апӀиди ва гьаммишандиз тӀанкь апӀиди.

²⁷ Хъа ВаритӀанзаанурин марццидарин халкьдиз паччагьвална, гьюкумна заварин кӀанакк вари паччагьлугъарин кьудрат тувди. Дугъан паччагьлугъ даима паччагьлугъ ву, гьар фуну гьюкум дугъаз мютӀюгъ ва табигъ хьибди.

²⁸ Гьамдиинди ихтилат ккудубкӀура. Узук, Даниялик, зурба къурхулувал кабхъзук, машнан рангарра ккадатӀнийиз. Ва узу гьаму вари йиз кӀваъ сирси гъюбхюнза.