Даниял 5 - Гирами Китаб

Балтасарин мярака

¹ Саб ражари Вавилондин паччагь Балтасари агъзур чан везирариз саб зурба мярака тешкил апӀуру ва дурарихъди чавра чяхир убхъуз хъюгъру.

² Пиян гъашиган, дугъан аба Навухаднасари Ерусалимдиъ айи Аллагьдин хулʼан гъахи гъизилин ва арсран гварар-гажнар хуз буйругъ тувру: паччагьди, дугъан хпари ва дугъан дишагьлийири, ва гьацира дугъан везирари гьадму гварар-гажнариан убхъуз хъюгъди.

³ Ерусалимдиъ айи Аллагьдин хулʼан духнайи гварар-гажнар хьади гъафиган, паччагьди, дугъан хпари ва дугъан дишагьлийири ва гьацира дугъан везирари гьадрариан убхъуз хъюгъю.

⁴ Дурари убхъуйи чяхир ва апӀуйи шюкюр чпин бутариз – гъизилинна арсран, йифринна рукьан, гвакӀликанна гъвандикан кадаънайидариз.

⁵ Саб дупну мушвʼина инсандин хил арайиз гъафи ва диди паччагьдин дараматдин лизиди дабснайи цалик, лампайин гъаншарнаъ, бикӀуз хъюгъю. БикӀурайи хил паччагьдиз гъябкъю –

⁶ ва дугъан машнан рангар ккадатӀу, дугъак къурхувал кабхъу, ликар гъюдли гъаши ва кьамкьар саб-сабдик йивуз хъюгъю.

⁷ Паччагьди, фалчйир, фахрийир, хядарихъди лигрудар хъади гъачай кӀури, гьарйир-чӀигъар апӀуз хъюгъю – хъасин Вавилондин му аьяндрариз гъапи: – Шли узуз гьаму дибикӀнайиб гъурхиш ва дидин мяна ктибтиш, дугъʼин уьру палат алабхьиди, дугъаз гардандикк ккабхъуз гъизилин зунжур тувди ва думу гьюкуматдиъ шубурпи кас хьиди.

⁸ Магьа гъафи паччагьдин гъуллугънаъ айи аьяндрар, аммаки я дибикӀнайиб урхуз, я дидин гъавриъ итуз дурарихьан гъабхьундайи.

⁹ Думуган Балтасар паччагьдиз бегьем гучӀ гъабхьи, дугъан машнан рангар ккадатӀу, ва дугъан везирарик гъалабулугъ кабхъу.

¹⁰ Паччагьдин дадайиз, паччагьна дугъан везирар фтикан улхураш, хабар гъабхьнийи. Дугъу, мярака гъябгъюрайи хулаз дуфну, гъапи: – Паччагь, уву сагъ ишри! Сабра дарди гучӀ гъабхьунвуз ва машнан рангар ккадатӀнияв.

¹¹ Яв паччагьлугъдиъ чаъ гирами бутарихьан вуйи марцци рюгь айи сар кас яшамиш шула. Гьеле яв абайин гьюкмин вахтарира кимиди дугъаз инсандиз хас дару учӀру фикир, аьяндарвал ва гирами бутаринубсиб фагьум айиб варидариз мялум дубхьна. Навухаднасар паччагьди, яв абайи, думу кас фалчйирин, сюгьюрчйирин, фахрийирин ва хядарихъди лигрударин аьхюрди дерккнийи – паччагьди чав, яв абайи!

¹² Дугъаъ, паччагьди Билтишасар ччвур тувнайи Даниялиъ, аламатнан рюгь а, гъяркъю нивкӀарин мяна ачухъ апӀуз хьувал ва зигьим а, сир айибдин гъаври хьувал ва дючӀюбгънайиб гъюдубчуз удукьувал а. Даниялиз дих апӀри – дугъу мяна ачухъ апӀидивуз.

¹³ Магьа паччагьдихьна Даниял хъади гъафи. Паччагьди дугъаз гъапи: – Иудеяйиан йиз абайи хъади гъафидарикан вуйи гьаму Даниял кӀурур уву вуна?

¹⁴ Увуъ гирами бутарикан вуйи марцци рюгь а, увуз учӀру фикир, аьяндарвал ва аламатнан фагьум а кӀури, деебхьназуз.

¹⁵ Гьаму дибикӀнайиб урхуз шулуш кӀури, ва узуз дидин мяна ктибтуз шулуш кӀури, магьа узухьна аьяндрарна сюгьюрчйир хъади гъафну, амма дурарихьан, дидин мяна фу вуш, ачухъ апӀуз шуладар.

¹⁶ Хъа узуз сир айиб ачухъ апӀуз ва дючӀюбгънайиб гъюдубчуз увʼан удукьуру кӀури, деебхьнайиз. Ари гьамус, гьаму дибикӀнайиб урхуз ва узуз дидин мяна ктибтуз увʼан удукьиш, увʼин уьру палат алабхьидивуин, гардандикк ккабхъуз гъизилин зунжур тувдивуз ва гьюкуматдиъ шубурпи кас хьидиву.

¹⁷ Данияли жаваб вуди кӀуру: – Пешкешар увуз гъитарва, гьюрматарра жарадариз апӀарва. Узу паччагьдиз дибикӀнайиб гьаци урхарза ва, диди фу улупураш, думура ктибтарза.

¹⁸ Паччагь! Навухаднасариз, яв абайиз, ВаритӀанзаан Аллагьди паччагьлугъ, гьяйбат, машгьурвал ва адлувал тувну.

¹⁹ Аллагьди дугъаз туву къудратлувалин улихь вари халкьар, тухмар ва миллетар гукӀуни дийигъну гъахьну: чаз ккунир паччагьди дариз зигуйи, хъа ккунириз рягьим апӀуйи, ккунир заан апӀуйи, ккунир асккан апӀуйи.

²⁰ Аммаки дугъу чав гизаф заанди дисуз хъюгъю, фурслу ва дамагълу гъахьи, ари гьаддиз думу паччагьдин тахтналан илдитнийи. Ва чан вари машгьурвалихъ мюгьтаж гъапӀнийи.

²¹ Дидхъанмина думу инсанарин арайиъ яшамиш шули гъахьундар ва фагьум-фикриинди нахшриз ухшар гъахьну; чӀуру дажйирихъди хъади, малиси, укӀ ипӀури гъахьну, завун чиграхъди жикӀури гъахьну – гьамци та-а-п инсаниятдин паччагьлугъдиин ВаритӀанзаан Аллагьдин гьюкум алибдин ва Чаз ккунир Дугъу паччагьвалиина за апӀуз удукьрубдин учв гъавриъ ахъайизкьан.

²² Хъа уву, Балтасар, дугъан бай, му вари увуз аьгъяшра, кӀваантӀан мютӀюгъ гъахьундара.

²³ Уву Заварин Раббийиз аькси удучӀвунва: Дугъан Хулʼан адагъну духнайи гварар-гажнариан яв везирарихъди, яв хпарихъди ва дишагьлийирихъди чяхир убхъурава. Уву арсранна гъизилин, йифринна рукьан, гакӀвликанна гъвандикан кадаънайи, фукӀа дярябкъру, фукӀа деребхьру ва фтинкӀа гъаври даршлу бутариз шюкюр апӀурава, хъа яв уьмурна яв кьадар-кьисмат Чан хилиъ айи Аллагьдиз шюкюр апӀурадара.

²⁴ Гьаци вуйиган Гьадгъухьан гьапӀну дуфнайиб ву думу хил ва дидикӀнайидар ву му гафар.

²⁵ Магьа мушвак дибикӀнайиб: МЕНЕ МЕНЕ ТЕКЕЛ У-ПАРСИН.

²⁶ Ва магьа миди улупурайиб: МЕНЕ – «Аллагьди яв паччагьвалин йигъар тяйин гъапӀну ва дидин аьхир дивну».

²⁷ ТЕКЕЛ – «Уву терезариин гъеерцну ва, лигуруш, пучӀу хьасир вува».

²⁸ ПЕРЕС – «Яв паччагьлугъ пай дапӀна ва медйиризна фарсариз тувна».

²⁹ Думуган Балтасари амур гъапӀу – ва Даниялиин уьру палат алабхьнийи, дугъан гардандиъ гъизилин зунжур абхънийи ва, гьюкуматдиъ думу шубурпи кас ву, кӀури, мялум гъапӀнийи.

³⁰ Гьадму йишван Балтасар, Вавилондин паччагь, йивну гъакӀнийи.

³¹ Паччагь Мидияйиан вуйи Дари кӀурур гъахьи, думуган Дарийин йирхьцӀурна кьюд йис вуйи.