Даниял 4 - Гирами Китаб

¹ Узу, Навухаднасар, жвуван хулаъ, гъайгъура ктарди, яшамиш шулайза, жвуван ужагъариъ ужуди йигъар адаурайза.

² Амма нивкӀ гъябкъзуз ва диди гучӀ кипзук; ахру йишвʼин нивкӀукди гъябкъюбди къурхулу гъапӀзу.

³ Ва, йиз нивкӀун мяна ачухъ апӀбан бадали, Вавилондин аьяндрар вари хъади гъюз амур гъапӀза.

⁴ Дуфну хъуркьний сюгьюрчйир, фахрийир, хядариз лигрудар ва фалчйир; узу ктибтза дурариз йиз нивкӀ, амма дурарихьан дидин мяна тувуз гъабхьундайи.

⁵ Аьхирки Даниял гъафи (йиз бутдин гьюрматнаан дугъаз Билтишасар кӀура) – дугъаъ гирами бутарикан вуйи марцци рюгь а. Узу дугъаз нивкӀ ктибтза. Узу гъапиза:

⁶ – Билтишасар, сюгьюрчйирин аьхюр! Увуъ гирами бутарикан вуйи марцци рюгь айиб аьгъязуз ва уву, фуну сир вушра, рягьятди ачмиш апӀурва. Ари гьамус, фициб нивкӀ узуз дябкънаш, хъебехъ ва, диди фу улупураш, йип узуз.

⁷ Йиз ахникк дахънайиган, узуз гъябкъю нивкӀ магьа: Жилин кьялʼин кудубчӀвура саб ягъли гьар –

⁸ Дурумлу гьар, зурба гьар, Ягълишин айиб завуккнакьан, Рябкъруб жилин тлихъан кӀулихънакьан;

⁹ кӀаж алиб гъалин, йимиш хруб, чавра вари тухъ апӀруб. Дидин сирникк кка жилин нахшрар, кюлеригъра апӀури мукьар завун ничхрар, ва тухъ шула вари чӀивишин дидкан.

¹⁰ Ва, йиз ахникк даахнайиган, гъябкъзуз хъана нивкӀукди – ис шула завариан Марцци Гъаравул

¹¹ ва аьхю сесниинди кӀура: „Гьар алдабтӀай, кюлер вари кутӀурччвай, кӀаж алдабхьай, йимишарра гъидирчай. КӀанккан дидин гъит гьергри вари нахшрар, Кюлеригъян тӀирхну гъютӀурччври ничхрар.

¹² Анжагъ кьабуч, ччивар ккайи, чюлин укӀар-кӀажаригъ, йибтӀну рукьна йифрихьди, жилик сабди гъит чав гъубзри. Гъит думу жибкӀри заварин чиграхъди, гъубзри жилин укӀаригъ нахшрарихъди.

¹³ Хьибди мягьрум фагьмихьанна инсандин, Фагьум тувну хьибди дидиз нахшрарин, Ва гьамци, ав, ургуд йискьан гъябгъиди.

¹⁴ Гьаму амур – къарар ву Гъаравларин, Жаза гьаму – гафра ву Марццидарин! Гьар жилиин чӀивириз ибшри хабар: Инсаниятдин паччагьлугъдиин ву гьюкумдар ВаритӀанзаанур. Шлиз тувну ккунш, Дугъу паччагьлугъ тувра, паччагьвализ аскканурра адаура“.

¹⁵ Магьа фициб нивкӀ гъябкънуш узуз, Навухаднасар паччагьдиз; хъа уву, Билтишасар, дидин фици гъавриъ ахъруш, йип ари. Фицики йиз паччагьлугъдиъ сар аьяндрарихьанра мидин жини сир ктибтуз шуладар, хъа увхьан шидивухьан, гьаз гъапиш увуъ гирами бутарикан вуйи марцци рюгь авуъ».

Данияли нивкӀун мяна ачухъ апӀуру

¹⁶ Даниял, дугъаз Билтишасарра кӀура, саб вахтнан арайиъ, гъах духьну, дийигъу – дугъаз кюллу гучӀ гъабхьи. Паччагьди гъапи: – Билтишасар! Гьаму нивкӀу ва дидин мянайи уву къурхуллу дарапӀри. Думуган Билтишасари жаваб вуди гъапи: «Йиз агъа! Ужу шлийи, яв хайир даккнидариз гъябкънийиш дициб нивкӀ, яв душмнариз ибшри дидин мяна.

¹⁷ Увуз гъябкъю гьар, дурумлу ва зурба, завариккнакьан ягъли ва жилин тлихъан кӀулихънакьан рябкъру,

¹⁸ гъалин кӀаж али, бегьер хру, вари тухъ апӀру, кӀанакк жилин нахшрар ккади шлу, хъа кюлеригъ завун ничхрар гъяди шлу, –

¹⁹ му уву вува, я паччагь! Уву зурба вуйир ва къудратлур вува; яв зурбавал гьадмукьан за дубхьнаки, гьятта завухьна рубкьура, хъа гьюкумра яв жилин тлихъан кӀулихъна дарабгъна.

²⁰ Паччагьдиз, заварилан исина Марцци Гъаравул дуфну, дугъу гьамци кӀури, гъябкъну: „АлдабтӀай гьар, тӀанкь апӀинай, анжагъ ччивар хъайи кьабуч гъубзри жилик, чюлин укӀаригъ, рукьан ва йифрин зунжрари йибтӀну, гъит думу заварин чиграхъди жибкӀри ва, ургуд йис ккудубшайизкьан гагьди, вягьши гьяйванатарихъди гьаци гъубзри“.

²¹ Миди улупура, я паччагь, ВаритӀанзаанури йиз гьюкумдриз, паччагьдиз, фициб пай кьисмат дапӀнаш.

²² Инсанарин арайиъ яшамиш хьидарва, хъа вягьши гьяйванатарихъди; укӀ ипӀидива, малариси, ва завун чигру кьяши апӀидиву. Гьамци ургуд йис гъябгъидияв – ва инсаниятдин паччагьлугъдиин ВаритӀанзаанурин гьюкум алибдин гъаври хьидиву: Дугъу думу Чаз ккунирихьна тувра.

²³ Амма кьабучна гьарин ччивар гъитуз амур дапӀна – гьаци вуйиган паччагьлугъ увухьна кьяляхъ тувиди, гьадмура – вари гьюкум Заваринуб вуйибдин уву гъаври гъахьиган.

²⁴ Гьаддиз, паччагь, йиз мясляаьтнахъ хъпехъуб ккун апӀураза: яв гунгьар хайирлу ляхнариинди ккерк, хъа яв гьякьсузвал – касибарихьна вуйи рягьимлувалиинди; ва гьадмуган, белки, яв ужудар вахтар ярхи шул».

НивкӀ тамам шулу

²⁵ Гьаму вари Навухаднасариин улубкьнийи.

²⁶ ЙицӀикьюб вазлилан Навухаднасари Вавилондиъ чан дараматдиин ккабалгнайи гъваариин сейир апӀурайи.

²⁷ – Зурба Вавилон, паччагьдин шагьур, магьа, – гъапи паччагьди, – йиз адлувализ ва гьюрматназ йиз кьувватниинди ва йиз кьудратниинди узу дивуб!

²⁸ Дугъан ушвниан му гафар удучӀвайизра завариан сес гъафи: – Хъебехъ, Навухаднасар паччагь! Гьамусдихъанмина паччагьлугъдихъ мягьрум вува.

²⁹ Инсанарин арайиъ ваъ, хъа вягьши нахшрарихъди яшамиш хьидива; малариси, чру укӀ ипӀидива. Гьамци ургуд йис гъябгъидияв – ва инсаниятдин паччагьлугъдиин ВаритӀанзаанурин гьюкум алибдин гъаври хьидиву: Дугъу думу, Чаз шлихьна ккундуш, гьадгъвахьна тувра.

³⁰ Ва гьадмусяаьт Навухаднасариин гьаму вари улубкьнийи. Дидхъанмина сарун думу инсанарин арайиъ имдайи, ва, малиси, дугъу укӀ ипӀуйи, завун чигру думу кьяши апӀуйи; дугъʼин, люкьран зирквсиб, куш илибшнийи ва шибарра – ничхрин бацарстар.

Навухаднасари Аллагь адлу апӀуру

³¹ Гьамци вахтар гъушу; узу, Навухаднасари, кӀул за дапӀну, завузди гъилигза – ва фагьум-фикрихъна гъафизу. Узу ВаритӀанзаануриз шюкюр гъапӀза, Даима Гъузруриз аферин гъапиза ва Дугъан адар гъапӀза: Гьюкум Дугъан вуда гьюкум даима, вари вахтариз – Дугъан паччагьлугъра.

³² ФукӀа-мукӀа дар жилиин али инсанар; Заварин кьувватар, инсанарра жилин, Фици ккунш Чаз, гьаци апӀиди идара. Дугъан хилхъан гьич сарира бисидар Ва: «ГьапӀрайир Вува?» – Дугъаз зат пидар.

³³ Гьадму герендиъ фикрихъна гъафиза; гъафизухьна паччагьвалин машгьурвал, ад ва кьудрат. Багахьна вуйидари ва везирари узу кьабул гъапӀу. Узу цӀийикӀултӀан паччагь гъахьиза, ва йиз кьудратра айибтӀан аьхю гъабхьнийиз.

³⁴ Ва гьамус узу, Навухаднасари, Заварин Паччагь адлу апӀураза, Дугъаз шюкюр апӀураза: Дугъан ляхнар ву дюзидар, Дугъан рякъяр ву гьякьлудар; Дугъан гьюкми асккан апӀур фурслудар.