Даниял 3 - Гирами Китаб

ЦӀин ялав

¹ Навухаднасар паччагьди, йирхьцӀур хъуршил ягълишин, йирхьуб хъуршил яркьушин ади, гъизилин дюшкюндар тикмиш апӀуру ва думу Вавилондиъ Дуир кӀуру дерейиъ дивуз амур апӀуру.

² Ва чав, Навухаднасар паччагьди, диву дюшкюндариз икрам апӀбан бадали вари вилаятарин гьюкумдрар, шагьрарин аьхюдар, кьадйир, мясляаьтчйир, хазнадарар, кьазйир, ва вари юрдарин имбу гьякимар уч апӀуру.

³ Гирамиламиш апӀбан серенжемдиз юрдарин гьюкумдрар, шагьрарин аьхюдар, кьадйир, мясляаьтчйир, хазначйир, кьазйир ва вари юрдарин имбу гьякимар уч гъахьиган ва дюшкюндарин улихь дийигъиган,

⁴ чавши аьхю сесниинди гъапи: – Хъебехъай, вари халкьар, тухмар ва миллетар!

⁵ Учвуз швутӀрамин, балабнин, пӀивнан, кьумуздин, саздин сесер ва жара алатариан йивурайи мукьмар гъеерхьубси, унтӀ жилиз йивну, Навухаднасар паччагьди диву гъизилин дюшкюндариз икрам апӀинай.

⁶ Хъа шли, жилʼина ккадакну, икрам дарапӀиш, думу дишлади цӀин ялвигъна гатӀахьиди.

⁷ Ва магьа швутӀрамин, балабнин, пӀивнан, кьумуздин, саздин сесер ва имбу алатарин мукьмар куркӀубси, вари халкьар, тухмар ва миллетар жилʼина ахьу ва Навухаднасар паччагьди диву дюшкюндариз дурари икрам гъапӀу.

⁸ Амма вавилонарин арайиан бязидари, дишлади душну, жугьтарикан шикаятвал туву.

⁹ Дурари Навухаднасар паччагьдиз гъапи: – Паччагь, уву сагъ ишри!

¹⁰ Уву, паччагьди, амур гъапӀнийваки, швутӀрамин, балабнин, пӀивнан, кьумуздин, саздин сесер ва имбу алатарин мукьмар гъеерхьу гьарсари, унтӀ жилиз йивну, гъизилин дюшкюндариз икрам апӀинай, кӀури.

¹¹ Хъа шли, жилиин дахъну, икрам дарапӀиш, думу цӀин ялвигъна гатӀахьиди кӀури.

¹² Амма Вавилондин ляхнар идара апӀуз уву буйругъ тувнайи жугьтар – Шадрагь, Мишагь ва Абид-Ниг увухъ, паччагь, хъпехъурадар, яв бутариз гъуллугъ апӀурадар ва уву диву гъизилин дюшкюндариз икрам апӀурадар.

¹³ Навухаднасар пис хъюлу ацӀу ва Шадрагьна, Мишагьна Абид-Ниг хъади гъюз амур гъапӀу. Дурар паччагьдихьна хъади гъафиган,

¹⁴ Навухаднасари гьерху: – Учву, Шадрагь, Мишагь ва Абид-Ниг, йиз бутариз гъуллугъ апӀурадар ва узу диву гъизилин дюшкюндариз икрам апӀурадар, кӀуруб кайиб вуйин?

¹⁵ Ари гьамус швутӀрамин, балабнин, пӀивнан, кьумуздин, саздин сесерихъди ва жара мукьмарихъди, унтӀ жилиз йивну, икрам апӀуз гьязур йихьай, ваяки, эгер икрам апӀурдаш, учву дишлади цӀин ялвигъна гатӀахьиди – ва думуган ичв Аллагьдира учву йиз хилариан адрагъур.

¹⁶ Амма Шадрагьди, Мишагьди ва Абид-Нигди паччагьдиз жаваб вуди гъапнийи: – Мидиз жаваб тувбан мяна адар.

¹⁷ Учу икрам апӀурайи ич Аллагьдихьан учу уьрхюз шулу, Дугъхьан учу, паччагь, цӀин ялвигъянра, яв хиларигъянра уьрхюз хьиди.

¹⁸ Хъа эгер дюрюрхишра – паччагь, аьгъю йибхьки: яв бутариз учу гъуллугъ апӀударча ва уву диву гъизилин дюшкюндариз икрамра апӀударча.

¹⁹ Думуган Навухаднасар артухъдиси гьюрсламиш гъахьи, Шадрагьдиз, Мишагьдиз ва Абид-Нигдиз ажугълуди гъилигу, айибтӀан ургуб ражари артухъди цӀа гужал апӀуз

²⁰ ва чан кьушмиан гужлистар эскрариз Шадрагьна, Мишагьна Абид-Ниг илитӀуз ва дурар убгурайи цӀин ялвигъна гатӀахьуз амур гъапӀу.

²¹ Дурар илитӀнийи ва, али палтарра, яни шалврарра, ккурттарра, пӀапӀхарра илмиди, цӀин ялвигъна гатӀахьнийи.

²² Паччагьдин пис буйругъниинди цӀа гьадмукьан гъизгъин гъапӀнийики, гьятта Шадрагьна, Мишагьна Абид-Ниг жазаламиш апӀурайи эскрар чиб, цӀин ялавну дургну, гъийихнийи,

²³ хъа тмуну шубрид: Шадрагьна, Мишагьна Абид-Ниг – илитӀну имиди, цӀин ялвигъ гъяхьнийи.

²⁴ Гьаму вахтна Навухаднасар паччагь мюгьтал духьну, гьялакди гъудужвну, чан гъуллугъчйирихьан гьерху: – Ухьу гьаму шубрид, илитӀну имиди, цӀиз гатӀахьундайин? Дугъаз: – Ав, шубрид гатӀахьунхьа, паччагь, – кӀури жаваб тувнийи.

²⁵ Паччагьдира гъапи: – Хъа узуз юкьур кас гьаци азадди, сагъди ва зарарра дархьиди цӀигъ лицури рякъюразуз; хъа юкьурпир малайикдиз ухшар ву.

²⁶ Навухаднасари, цӀихъна душну, дих гъапӀу: – ВаритӀан заан Аллагьдин лукӀар вуйи Шадрагь, Мишагь ва Абид-Ниг! Душвʼгъян гъюдучӀвай! Думуган Шадрагьна, Мишагьна Абид-Ниг цӀигъян гъюдучӀвуру.

²⁷ Мушвахьна юрдарин гьюкумдрар, шагьрарин аьхюдар, кьадйир, паччагьдин багахьна вуйидар уч гъахьи – ва цӀихьан му ксариз зарар тувуз дархьиб дурариз гъябкънийи: кушаркьан хъургнадайи, палатра сагъди имийи, ва дурарихъан гъубгубдин ниъкьан гъюрадайи.

²⁸ Ва Навухаднасар паччагьди баян гъапӀнийи: – Чан малайик гьаъну, Чахъ хъугъну имбу Чан лукӀар азад гъапӀу Шадрагьдинна, Мишагьдинна Абид-Нигдин Аллагьдиз аферин! Дурари паччагьдин амур тамам гъапӀундар, чпин уьмур гьяйиф гъапӀундар – аммаки, чпин Аллагь ктарди, сар бутдизкьан я гъуллугъ, ясана икрам гъапӀундар.

²⁹ Вари халкьариз, тухмариз ва миллетариз гьамциб амур вуйиз: шли Шадрагьдинна, Мишагьдинна Абид-Нигдин Аллагьдикан гьюрматсузди улхури гъахьиш, думу гъит тикйир-тикйир апӀри ва дугъан халра ккидипри. Гьаз гъапиш, му Аллагьди азад апӀруганси, сар бутдихьанра гьаци азад апӀуз даршул.

³⁰ Хъасин паччагьди Шадрагьна, Мишагьна Абид-Ниг Вавилондиъ ужудар гъуллугъарихь дерккру.

Навухаднасарин кьюбпи нивкӀ

³¹ «Навухаднасар паччагь – жилʼин аликьан вари халкьариз, тухмариз ва миллетариз. Ислягьвал ва хъуркьувалар ишричвуз!

³² ВаритӀанзаан Аллагьди узуз улупу керематарикан ва аьламатнан лишнарикан ктибтуз ккундузуз.

³³ Фукьан дарин зурба Дугъан керематар Ва кьудратлу ву Дугъан аьламатнан лишнар! Дугъан паччагьлугъ ву даима паччагьлугъ, Гьюкумра – вари вахтариз уьмурлугъ.