Даниял 2 - Гирами Китаб

Навухаднасарин сабпи нивкӀ

¹ Навухаднасар паччагьдиз, чав гьюкум хъапӀри кьюдпи йисан, нивкӀар гъяркънийи; дугъак гъалабулугъ кабхъу, дугъан нивкӀра ултӀубччву.

² Чан нивкӀарин гъавриъ итуз кӀури, паччагьди фалчйир, сюгьюрчйир, фахрийир ва хядарихъди лигрудар хъади гъюз амур апӀуру. Дурар, дуфну, паччагьдин улихь дийигъу.

³ Паччагьди гъапи: – Узуз нивкӀ гъябкъюнзуз, ва гъалабулугъ кабхъназук, дидин гъаври хьуз ккундузуз.

⁴ Дурари паччагьдиз арамей чӀалниинди гъапи: – Паччагь, уву сагъ ишри! Учуз, яв лукӀариз, кидибт гьадму нивкӀ, ва учу дидин гъаврикк ккаъдичаву.

⁵ Паччагьди дурариз жаваб вуди гъапи: – Йиз кьаст фу вуш, мялум апӀуразачвуз! Эгер учву, узуз фу гъябкънуш ва дидин фици гъавриъ ахъруш, ктидибтиш, учву парчйир-парчйир апӀиди ва ичв хуларра дагъитмиш апӀиди.

⁶ Хъа эгер учву думу нивкӀ ктибтиш ва дидин мяна фу вуш, гъапиш, узхьан пешкешар хьидичвуз ва зурба гьюрмат. Гьан, узуз фу гъябкънуш ва дидин мяна фу вуш, йипай-ари.

⁷ Дурари хъана гъапи: – Паччагь, яв нивкӀ учуз, яв лукӀариз, кидибта, хъа учу дидин гъаврикк ккаъдичаву.

^8-9 Паччагьди гъапи: – Узуз рябкъюрайиси, учву вахт вахтнахъ хъибтӀрайидар вучва. Узу, йиз кьаст фу вуш, гъапунзачвуз, ва, узуз учву йиз нивкӀ ктидибтиш, учвʼин улубкьрубдикан аьгъячвуз. Магьа гьаддиз, белки фукӀа-мукӀа дигиш шул кӀури, кучӀлар апӀури, кӀулар ккадагъуз ккунди ачвуз. Хъа магьа кидибтайчва узуз йиз нивкӀ, ва думуган хъугъарза, учву дидин гъаврикк ккаур, кӀури.

¹⁰ Дурари паччагьдиз гъапи: – Жилин зиин сарихьанра паччагьдиз дугъу гьерхрайиб ктибтуз даршул: сар паччагьдира, я сар заан агъайира фалчйирихьан, сюгьюрчйирихьан, вая хядарихъди лигрударихьан мицдар гьерхри гъахьундар.

¹¹ Паччагьди гьациб читин месэла хъипраки, гьятта сарихьанра дугъаз жаваб тувуз шлуб дар, анжагъ гирами бутарихьантӀан, хъа дурар инсанарин арайиъ яшамиш шулайидар дар.

¹² Мицдар гафарикан паччагь писди ажугълу шулу ва, хъял кубчӀвнайири, Вавилондиъ айикьан вари аьяндрар аьжализ тувуз амур апӀуру.

¹³ Магьа аьяндрар аьжализ тувуз паччагьди буйругъ туву. Даниялна дугъан дустарра аьжаликк ккахъуз къурху айи.

¹⁴ Амма Данияли Вавилондин аьяндрар йивну йихуз гьаънайи Ариухдихъди – паччагьдин гъаравларин аьхюрихъди аькьюллуди ва фагьумлуди гаф-чӀал апӀуру.

¹⁵ Данияли Ариухдиан итӀихуз хъюгъру: – Паччагьдин заан гъуллугъчи! Паччагьди мициб яман буйругъ гьаз тувнийкӀан? Ва Ариухди Даниялиз, мидин себеб фу вуш, ктибту.

¹⁶ Даниял паччагьдихьна гъушу ва, паччагьдин нивкӀ фу вуш хътипуз, чаз сацӀиб вахт тувуб тӀалаб гъапӀу.

¹⁷ Хулаз гъафиган, дугъу чан дустар Ананайиз, Мисаилиз ва Азарийиз вари ктибтуру –

¹⁸ Даниялна дугъан дустар Вавилондин имбу аьяндрарихъди аьжализ тутрувруси, гъит дурари Заварин Аллагьдикан чпиз рягьим апӀуб ва му сир чпиз ачмиш апӀуб ккун апӀри.

¹⁹ Йишвну Даниялиз аьян апӀру улупбар гъяркънийи, ва дугъаз сир ачмиш гъабхьнийи. Думуган Данияли Заварин Аллагьдиз шюкюр гъапӀу.

²⁰ Данияли гъапи: – Аллагьдин ччвур адлу вугьа эвелиан аьхириз! А гьа Дугъаъ аьяндарвал ва кьувват.

²¹ Вахтарихъди хура гьюдюхюз вахтар, ултӀуккура паччгьар Дугъу, дерккра паччгьар, Аьяндарвал тувра аьяндрариз, Зигьимлуриз билиг тувра.

²² Дюгьнйир, сирар Дугъу ачмиш апӀура, Ашкар апӀура жин дубхьнайиб мучӀушнаъ; Аллагьдихъди шулу гьарган акувал.

²³ Увуз, Йиз абйирин Аллагьдиз, шюкюр апӀураза, Уву вува узуз тувур аьяндарвал ва кьувват! Учу тӀалаб гъапӀуб узуз улупва: Паччагьди фу гьерхраш, аьян гъапӀунва.

²⁴ Мидин кьяляхъ Данияли, паччагьди Вавилондин аьяндрар йихуз гьаънайи Ариухдихьна душну, дугъаз гъапи: – Вавилондин аьяндрар мийихан! Узу паччагьдихьна хъади гъарах, дугъан нивкӀун мяна ачухъ апӀурза.

²⁵ Гьадмусяаьт Ариухди Даниял паччагьдихьна хъади гъафи ва мидкан паччагьдиз мялумат туву: – Узуз яв нивкӀун мяна ачухъ апӀру кас гъидихъунзуз, думура – Иудеяйиан кюч гъапӀдарикан.

²⁶ Думуган паччагьди, Даниялихьинди (вая, жараси кӀуруганси, Билтишасарихьинди) илдицну, гъапи: – Увхьан дугъриданра узуз гъябкъю нивкӀ ктибтуз ва дидин мяна ачухъ апӀуз хьибдинухьан?

²⁷ Данияли паччагьдиз жаваб вуди гъапи: – Паччагьди хъипнайи сир дугъаз я хядарихъди лигрудари, я сюгьюрчйири, я фалчйири, ясана фахрийири – гьич сарира ачмиш апӀурдар.

²⁸ Амма завариин Аллагь ал, сирар ачмиш АпӀрур, – ари Гьадму ву Навухаднасар паччагьдиз, замана аьхирихъна гъюруган фу шулуш, гъапир. Уву яв ахникк даахнайиган, увуз гъябкъюб магьа.

²⁹ Яв фикрар, паччагь, гележегдикан вуяв – ва сирар ачмиш АпӀрури увуз гъюз ккимбуб улупунвуз.

³⁰ Хъа узуз му сир гьаддиз ачмиш гъабхьнуки, узу му дюнʼяйиъ варитӀан аьяндарур ву кӀури ваъ, хъа узу думу паччагьдиз ачмиш апӀбан бадали, – ва фти уву гъалабулугъдикк ккитраш, гьаддин гъавриъ хьидива.

³¹ Паччагь, увуз гъябкъюб магьа гьаму ву: дийибгъна яв улихь тикмиш гъапӀу дюшкюндар – зурба дюшкюндар, диди аку нур тувра, ва дидин саб рябкъювали къурху гучӀ капӀра.

³² Думу дюшкюндарин кӀулра – марцци гъизиликан, мухурна хилар кӀуруш – арсракан, фун ва жвукьар – йифрикан ву.

³³ Кьамкьарихъан зизкьарихъна – рукькан, хъа зизкьарихъан асина – саб пай рукькан, тмуну пайра ругдикан ву.

³⁴ Хъасин гъябкъвуз: наънан-вуш чав-чаланди, инсандин хил кадарди, саб гъарз кадабхъну, дюшкюндариина, дидин рукьканна ругдикан вуйи ликариина абхъру, ва дурар тикйир-тикйир апӀуру.

³⁵ Сабпну рукь, руг, йиф, арс ва гъизил, сабишвʼинди жилиина абхьну, хьадну раццаъ айи нахъвси шулу; микӀлу дурар гъахуру, гьятта дурарин шилкьан гъубзундар. Хъа дюшкюндариина абхъу гъарз, кӀуруш, зурба дагъдиз дюнмиш шулу ва диди вари жил бисуру.

³⁶ НивкӀ гьамциб ву. Хъа гьамус, дидин мяна фу вуш, паччагьдиз ктибтурухьа.

³⁷ Уву, паччагь, паччгьарин паччагь вува, увуз Заварин Аллагьди паччагьлугъ, кьудратлувал, кьувват ва адлувал тувнавуз,

³⁸ инсанар, жилиин лицрукьан нахшрар ва заварилан тӀирхрукьан ничхрар, наан ашра, Дугъу дурар яв гьюкмиз тувна ва увуз табигъ дапӀна. Гъизилин кӀул – му уву вува.

³⁹ Яв кьяляхъ жара паччагьлугъ хьибди, явубси кьувватлу дару. Хъасин гъюру шубубпи паччагьлугъди, чавра йифрин, вари жилиин агъавал апӀиди.

⁴⁰ Хъа юкьубпи паччагьлугъ, рукьси, мюгькам вуйиб хьибди. Рукьу вари фици чабхьуруш ва тикйир-тикйир апӀуруш, фици вари дагъитмиш апӀуруш, дидира вари чархьиди ва дагъитмиш апӀиди.

⁴¹ Увуз гьацира саб пай гъабар апӀру ругдикан кадаънайи, тмуну пайра рукькан вуйи ликар гъяркънийвуз – миди кӀураки, паччагьлугъ пай хьибди. Дидиъ рукьан мюгькамвалин пай хьибди, гьаддиз гъябкъюб вувуз гьацӀ рукь ва гьацӀсана – руг.

⁴² Зизкьарин асина ликар гьацӀпай рукьандар, тмуну гьацӀпайра ругдиндар – миди улупураки, паччагьлугъ сабдиъ мюгькамди вуш, тмунубдиъ бушди хьибди.

⁴³ Увуз гъябкъю рукь ругдихъди дибикьнайиб вуй – гьаци халкьарра саб тмунубдихъди гъидикьиди, аммаки, рукь ругдик фици кпикьударш, гьаци дурарра саб хьидар.

⁴⁴ Думу паччагьлугъарин вахтари Заварин Аллагьди даима паччагьлугъ тикмиш апӀиди, сарун ккададабхъруб, имбу халкьарихьан рабгъуз даршлуб. Диди вари гьаму паччагьлугъар ккидирчиди ва дагъитмиш апӀиди, хъа учв гьаммишандиз гъубзди.

⁴⁵ Гьаддиз, чав-чаланди, инсандин хил кадарди, дагъдикан гъарз фици ктабхънуш ва диди рукьна, йифна, ругна, арсна гъизил фици гъачабхьнуш, гъябкънийвуз. Гьамци Зурба Аллагьди паччагьдиз гъюз ккимбуб улупу. НивкӀ дюзуб вуйи, мянара кайиси ачухъ гъабхьнийи.

⁴⁶ Мушвахь Навухаднасар паччагь, унтӀ жилиз йивну, Даниялиз икрамдиз гъушу, ва пешкешарииндина ицциб ниъ хъайи зигрудариинди дугъаз гьюрматар апӀуз амур гъапӀнийи.

⁴⁷ Паччагьди Даниялиз гъапи: – Дугъриданра, ичв Аллагь вари гирами бутартӀан зурба Аллагь ву, паччгьарин Рабби, сирар ачмиш АпӀрур ву, фицики увʼан му сир ачухъ апӀуз удукьунвуан.

⁴⁸ Мидхъан паччагьди Даниял заан апӀуру, дугъаз хайлин багьалу пешкешар тувру, думу вари Вавилондин гьюкумдарди ва Вавилондин вари аьяндрарин аьхюрди дерккру.

⁴⁹ Даниялин тӀалабниинди Шадрагьдизна, Мишагьдизна, Абид-Нигдиз Вавилондин ляхнар идара апӀуз гьюкум тувру, хъа Даниял учв, кӀуруш, паччагьдин дараматдиъ имиди гъузру.