Даниял 12 - Гирами Китаб

Бахтаврар ву ккилигури гъузуз удукьрудар

¹ Малайикди давам апӀуру: – Думуган Микаил, заан малайикарикан сар, яв халкь уьрхрур, дуфну хъуркьди, фицики гьич саб халкьдиинра гьелелиг улулуркьу бала-кьазйирин вахтар гъиди. Думуган яв халкь къутармиш хьибди – Китабдик кади гъахьидар вари.

² Ва накьвариъ даахнайидарикан уягъ хьиди гизафдар: даима уьмриз – садар, даима аьйибназ – гьатмундар.

³ Фагьумлудар нурлу хьиди – завун ахсрарси, Гьякь рякъюхъ хъаърудар – хядарси, гьаммишандиз, аьсрариз!

⁴ Хъа уву, Даниял, му гафар жиниди уьрх ва китаб, мугьур йивну, хъябкьну гъибт – аьхиримжи вахтаризкьан. Думуган гизафдари, рякъяр-чарйир агури, чпин аьгъювалар артухъ апӀиди.

⁵ Ва узуз, Даниялиз, гъябкъюнзуз: кьюрсана дийигънайи – санур нирин гьатму гъирагъдихъ, тмунурсана гьамуну гъирагъдихъ.

⁶ Ва дурарикан санури Аллагьдин гъуллугъчийиин шлустар лизи палтарра алди нирʼин дийигънайирихьан гьерхра: – Гьамусдиз ебхьузкьан деребхьу гьаму фила ккудубкӀидикӀан?

⁷ Ва узуз лизи палтар алди нирʼин дийигънайирин жаваб гъеебхьунзуз. Дугъу, кьюбиб хиларра завузди гьачӀарккну, Аьсрариинди ЧӀивириинди ху гъапӀу: саб муддатналан, кьюб муддатналан ва гьацӀ муддатналан – гьаму вахтналан, Гирамийишван халкьдин кьувват ккадрабгърубси гъабхьиган, вари ккудубкӀиди.

⁸ Узу хъпехъурайза, амма гъаври шуладайзу. Ва узу гьерхза: – Йиз агъа, хъа му вари фитʼинди ккудубкӀуйкӀан?

⁹ Дугъу жаваб туву: – Фикрар мапӀан, Даниял, гъарах! Му аьхиримжи йигъаризкьан жин дапӀнайиб ва, мугьур йивну, хъябкьнайиб ву.

¹⁰ Гизафдар марцц хьиди, нурлу хьиди ва имтигьяндиан адаиди, хъа гьякьсузари, кӀуруш, гьякьсузвалар апӀуб давам апӀиди. Ва гьякьсузар аннамишʼвалихъна гъидар, аннамишʼвалихъна фагьумлудар гъиди.

¹¹ Гьар йигъандин гъурбан апӀувалар дерккхъанмина ва Гирами йишваъ Аллагь гьяспикк ккадру алчагъʼвалар ккергъхъанмина агъзурна кьюдваржна урчӀвцӀур йигъ ккудубшиди.

¹² Бахтаврар ву, муддат улубкьиган, агъзурна шубудваржна сумчӀурна хьуд йигъ улдубчӀвайиз, ккилигури гъузрудар ва вафалуди гъузуз удукьрудар.

¹³ Хъа уву, аьхир гюзлемиш апӀури, яв рякъюъди гъарах. Уву яв вахтна архаин хьидиву, аммаки хъасин увуз рубкьруб гъадабгъуз гъудужвидива – аьхиримжи йигъан.