Даниял 11 - Гирами Китаб

Малайикди аьянвал тувуб давам шула

¹ Алабхъиган, Микаилихъанди узура гъахьунза, дугъаз Мидийирин паччагь Дарийин гьюкмин садпи йисан кюмекра гъапӀунза.

² Ва гьамус узу гьякьикьат кӀурзавуз. Персияйиъ хъана шубурсан паччагь хьиди, хъа вартӀан девлетлур юкьурпир хьиди. Девлетну думу къудратлу апӀиди, ва дугъу грекарин паччагьлугъдиз къаршуди вари гьяракатназ хиди.

³ Хъанара къудратлу паччагь гъиди, дугъу, хилиъ зурба гьюкум ади, чаз фу ккундуш, гьадму апӀиди.

⁴ Амма думу гъюблан кьяляхъ дугъан паччагьлугъ ккадабхъиди, ва юкьуб терефнахъинди жара хьибди, ва дугъан веледариз ккубкьидар, ва думу сарун муганайиз айигансиб хьибдар. Дугъан паччагьлугъ тадабгъиди ва жарадариз тувди.

⁵ Кьибла паччагь гужал хьиди, амма дугъан кьушмарин аьхюдарикан санур думутӀанна гужал хьиди, ва думу хъана артухъ ругар-жиларин эйси хьиди.

⁶ Йисар гъягъиди – ва сар-сариз кюмек хьубан йикьрар йитӀиди. Му йикьрар мюгькам апӀбан бадали, кьибла паччагьдин риш кафари паччагьдиз швушвди гъягъиди. Амма думу дишагьлийихьан гьюкум дибисну гъибтуз хьибдар, кафари паччагь чавра гъузидар: вахт улубкьиган, паччагьдихъди дугъан хпирра терг апӀиди, дугъахъди хъайидарра, дугъан веледра ва дугъаз кюмек туврайидарра.

⁷ Думу дишагьлийин ччиварикан сабуну цӀаб тахтниина гъибди. Думу кафари паччагьдин кьушмиз къаршуди гъягъиди ва дугъан гъалйириъ архьди – дурариин алархьиди ва гъалибвал гъадабгъиди.

⁸ Ва кӀалбиъ урзну дапӀнайи дурарин бутарна арсран ва гъизилин багьалу гъаб-гъажагъ дугъу тадагъиди ва Египетдиз гъахиди. Мидин кьяляхъ дугъу сакьюдар йисари кафари паччагьдик ктукьидар.

⁹ Хъасин кафари паччагь кьибла паччагьдин паччагьлугъдиъ архьди, амма чан вилаятдиз кьяляхъ хътакбакк ккуркьди.

¹⁰ Хъа дугъан баяри дяви ккебгъди ва зурба кьушум сатӀи апӀиди. Думу кьушум, селлерси ахмиш дубхьну, улихьна гъябгъиди ва душмнин гъалйирихьнакьан рубкьиди.

¹¹ Кьибла паччагь, бегьем хъял кубчӀвну, кафари паччагьдихъди женгназ удучӀвиди. Хъа кафари паччагьди зурба кьушмар уч апӀиди, амма дурар душмнин хилиъ ахьди.

¹² Му кьушмар ккагъиган, кьибла паччагь дамахлу хьиди. Агъзрариинди эскрар терг апӀиди дугъу, амма гъалиб хьидар.

¹³ Кафари паччагьди цӀийи кьушмар уч апӀиди, муганайиз айибтӀан гизаф. Йисар гъягъиди – ва думу алархьиди, хъана аьхю ва ужуди яракьламиш дапӀнайи кьушмарихъди.

¹⁴ Думу вахтари гизафдар кьибла паччагьдиз аькси гъудужвиди. Улупубдиъ айиганси, яв халкьдигъянра къаршу вуйидар гъудужвиди, дурар ккагъди.

¹⁵ Кафари паччагь гъиди, гъала вуйи шагьур, гургутум руг дабхьну, бисиди. Кьиблайин кьувватар ккагъди, гьятта ужударстар кьушмарихьанкьан къаршу дийигъну гъузуз хьидар.

¹⁶ Хъа дуфнайири, чаз фу ккундуш, гьадму апӀиди, ва сарихьанра дугъан улихь дийигъну гъузуз хьибдар; думу гюрчег вилаятдиъ къайд хьиди, думу дугъан гьюкмиъ абхъди.

¹⁷ Дугъаз вари паччагьлугъдин гьюкумдар агъа хьуз ккун хьибди, чан душмнихъди сабшвхъанди хьувалин йикьрар йитӀиди ва чан риш, думу душман терг апӀбан бадали, дугъаз хпирди тувди, амма думу кӀулиз удубчӀвидар – фукӀа апӀуз хьибдар.

¹⁸ Думуган думу гьюлерихъ хъайи вилаятаризди гъягъиди ва дурарикан гизафдар дисиди, амма жарадарин кьушмарин аьхюри дугъан писвалин аьхир дивди ва чан писвалин жаваб тувуз гъитди.

¹⁹ Думу чан вилаятдин гъалйириз кьяляхъ гъиди, аммаки ккагъди, паччагьвалилан ултӀуккиди ва шилкьан имдарди гъюдучӀвиди.

²⁰ Тахтниина жарар гъиди ва дугъу, паччагьлугъдин девлетар артухъ апӀуз, налукар уч апӀрур гьаъди. СацӀиб вахт гъябгъиди – думура терг апӀиди, амма ачухъди, ясана женгнаъ дарди, жараси.

²¹ Жарар гъиди тахтниина – алчагъ вуйир; дугъаз паччагьдин адлувал тувну хьибдар. Думу хабарсузди гъиди ва паччагьвал жинжалвалиинди бисиди.

²² Дугъан улихь кьушмар, улубчӀву штуси, фана апӀиди ва дагъитмиш апӀиди, Йикьрарин варитӀан заан гъуллугъчийихъди сабси.

²³ Сар-сарихъанди хьпан йикьрар йитӀну, дугъу дурар чӀюргъиди. Дугъан адмийир цӀидарди хьиди, амма думу кьувватлу хьиди.

²⁴ Думу хабарсузди вартӀан бул вилаятариз гъиди ва душвариъ я чан абйири, ясана чан абйирин абйири дарапӀуб апӀиди. Чаз ккубкьуб, тадабгъуб ва гьацира имбу девлетар, пай апӀури, харж апӀиди; мюгькам шагьрариз пис кьастар апӀиди – вахт хьайизкьан гагьди.

²⁵ Чан вари кьувват ва гъизгъин ялав дугъу кьибла паччагьдиина диш апӀиди, дугъʼина зурба кьушум хьади гъягъиди. Кьибла паччагьра гизаф кьувватлу, зурба кьушмихъди женгназ удучӀвиди, амма къаршу дийигъну гъузуз хьибдар: дугъхьан жиниди пис кьастнан йикьрар йитӀиди.

²⁶ Думу дугъан суфрайихъан ипӀурайидари терг апӀиди, дугъан кьушмар, штун селлериси, терг апӀиди, ва дявдиъ хайлиндар йихиди.

²⁷ Кьюр паччагь, чӀуру кьаст ади, саб суфрайихъ деъди ва чиб-чпиз кучӀлар апӀиди, амма дурарин фукӀа кӀулиз удубчӀвидар, гьаз гъапиш аьхирин вахт гьелелиг дуфну ади хьибдар.

²⁸ Кафари паччагь, аьхючвеъ тадабгъубра хьади, хулаз хътакиди, ва Гирами Йикьрариина чӀуру кьаст апӀиди, ва думу фикир гьяракатнак кипди. Хъасин думу чан вилаятдиз хъадакну гъиди.

²⁹ Тяйин дапӀнайи вахтна думу хъанара кьиблайизди гъягъиди, амма муганайиз гъабхьибсиб сарун хьибдар.

³⁰ Дина римлянарин гимйир гъиди, думу кӀуруш, гучӀ дубхьну, кьяляхъ хътаркиди. Думу Гирами Йикьрарикан вуйи хъюлан ялавну ургури хьиди ва гьяракатнаъ учӀвди – хъадакну гъюри айири, дугъу Гирами Йикьрарихъан хъадахънайидарихъди саб гаф апӀиди.

³¹ Дугъхьан гизаф кьушмар гъиди ва Гирами Хулан гъала кабцӀиди, гьар йигъандин гъурбан апӀувалар батӀул апӀиди ва душваъ Аллагь гьясбикк кадру алчагъʼвал хьибди.

³² Гирами Йикьрар масу тувдариз дугъу мелз йивру гафар апӀиди. Амма чпин Аллагь кӀваинди имбудар кьувватлу хьиди ва гьяракатнаъ учӀвди.

³³ Хъа фагьумлудари халкьдиз вягъз-насигьят тувди ва саб вахтназ дурар утӀурккури хьиди – турихьди ва цӀихьди, йисирвалиинди ва тӀарашʼвалиинди.

³⁴ Мидиъ дурариз сацӀиб кюмекра гъибди – гизафдар дурарик ктикьиди, амма кӀваантӀан дарди.

³⁵ Ва фагьумлударикан бязидар, читинвалар алдаури, лизи гьяксикьан марцц шули, аьхиримжи вахтаризкьан утӀурккури хьиди, фицики аьхирзамандин вахт гьелелиг дуфну хьибдар.

³⁶ Хъа паччагьди, чаз фу ккундуш, гьадму апӀиди. Думу дамахлу хьиди, ва вари бутартӀан чав зиина дисиди, ва вари бутартӀан зурба вуйи Аллагьдиз аьксиди ибариз асуллагь деребхьуб пуз хъюгъди. Ажугълу йигъар ккудукӀайизкьан дугъаз ккуниси хьибди. Гьаз гъапиш, шулу дупнайиб дубхьну ккундийи.

³⁷ Дугъу я чан абйирин бутарихьна, я дишагьлийирин Ккунирихьна, ясана фицибкӀа жара бутдихьна чан фикир жалб апӀидар, фицики дурартӀан чав заанди дисиди.

³⁸ Дурарин ерина дугъу гъалйирин бутдиз гьюрматар апӀиди – чан абйириз аьгъдру бутдиз, гьюрматар апӀиди гъизилиинди, арсриинди, багьалу гъванариинди ва девлетлу савкьатариинди.

³⁹ Жарадарин бутдин кюмекниинди дугъу ижми гъалйир рагъиди, хъа чав саймиш гъапӀдариз дугъу зурба гьюрматар апӀиди, дурар гизафдариин гьякимарди дерккди, ва дурариз пешкеш вуди жилар пай апӀиди.

⁴⁰ Аьхиримжи йигъар улуркьиди ва кьибла паччагь дугъʼина гъягъиди. Амма кафари паччагь дугъʼин тӀурфанси алархьиди, яракьлу аьрабйирихъди, атлуйирихъди ва гизаф кьадар гимйирихъди. Думу жюрбежюр вилаятарилан селси гъягъиди,

⁴¹ ва гюрчег вилаятдиз гъиди, ва йицӀдар агъзрариинди дугъу талаф апӀиди. Амма Эдум, Муав ва гизаф кьадар Аммундин агьалйир дугъан хиликк ккахьидар.

⁴² Дугъу чан гьюкум жара вилаятариинара рабгъиди, гьятта Египетра мициб кьисматнаккан ккудубчӀвидар.

⁴³ Дугъу багьалу девлетар дисиди – гъизил ва арс ва Египетдин вари девлетар; Лувимдинна Кушимдин халкьар дугъаз табигъ хьиди.

⁴⁴ Ригъ удубчӀвру ва кафари терефнахъанди гъюрайи хабрари дугъак бегьем гучӀ кипди, ва, пис хъял дуфну, гизафдар дагъитмиш ва терг апӀури, думу дина гъягъиди.

⁴⁵ Дугъу чан паччагьдин чадрар гьюлинна марцци йишв вуйи гюрчег дагъдин арайиъ гьатӀарцциди. Амма дугъан аьхир гъибди, ва дугъаз шликӀа кюмек апӀидар.