Даниял 1 - Гирами Китаб

Даниял ва дугъан дустар Вавилондиз адахъуру

¹ Йихуякимди Иудеяйиъ паччагьвал апӀури шубудпи йис вуйи. Вавилондин паччагь Навухаднасар алархьну, Иудеяйин меркез Ерусалим гьялкьайиъ тӀапӀнийи.

² Раббийин амриинди Навухаднасарин хилиъ Иудеяйин паччагь Йихуяким ва Аллагьдин хулан гъаб-гъажагъдин саб пай абхънийи. Навухаднасари гъаб-гъажагъ Шинар уьлкейиз, чан бутдин хулаз гъубхнийи (дугъу думу хазнаханайиъ дивнийи).

³ Паччагьди чан аьхюну гъуллугъчи Ашпиназдиз Израилин халкьдигъян, паччагьдин тухмиан ва девлетлуйирикан

⁴ бедендин нукьсанар кадру, уччвуб къаш-къамат айи, фикрин удукьувалар айи, варибдин гъавриъ ахъру, паччагьдин дараматдиъ гъуллугъназ ярамиш вуйи жигьил баяр гъядягъюз ва дурариз вавилон халкьдин чӀал ва урхуб-бикӀуб улупуз амур апӀуру.

⁵ Паччагьди гьацира дурариз гьар йигъандин ипӀруб паччагьдин суфрайихъан тувуз ва чав убхъурайибсиб чяхир тувуз, шубуд йисандин арайиъ дурар тербияламиш апӀуз, хъасин паччагьдин саб гъуллугънахъ хъауз табшурмиш апӀуру.

⁶ Дурарин арайиъ Ягьудайин тухмиан вуйи Даниял, Ананай, Мисаил ва Азари айи.

⁷ Аьхюну гъуллугъчийи дурариз жара ччвурар тувру: Даниялиз – Билтишасар кӀуру ччвур, Ананайиз – Шадрагь, Мисаилиз – Мишагь, хъа Азарийиз – Абид-Ниг.

⁸ Даниял чаз гьярам вуйибдик сабдиккьан: я паччагьдин хурагнак, я паччагьдин чяхирик – ниъкьан кадрапӀбанди гъаши. Ва дугъу аьхюну гъуллугъчийикан гьярам вуйиб дирипӀуз чаз ихтияр тувуб тӀалаб гъапӀнийи.

⁹ Аллагьди Даниялиз аьхюну гъуллугъчийин терефнаан хайир ккунивал ва ужуб аьлакьа багъиш апӀуру,

¹⁰ ва гъуллугъчийи Даниялиз кӀуру: – Узуз йиз паччагьдихьан гучӀурзуз; учву фу ипӀурушна убхъуруш, дугъу чав дупнаки. Нагагь, дугъаз ичв яшнан имбу баяртӀан учву усалди гъяркъиш, учву себеб духьну, паччагьди йиз кӀул алдабтӀиди.

¹¹ Думуган Данияли чпихъ аьхюну гъуллугъчийи хъитнайириз кӀуру:

¹² – ТӀалаб вуйиз увкан, учу, яв лукӀар, имтигьян апӀина: йицӀуд йигъандин арайиъ учуз анжагъ мейвйирна шидтӀан тутруври.

¹³ Хъасин, учу фици рякъюруш ва паччагьдин суфрайихъан ипӀурайидар фици рякъюруш, лигарва. Лигарва – ва учу, яв лукӀар, увуз фици ужуди рякъюруш, гьаци дерккарва.

¹⁴ Думура рази гъахьи ва, дурари ахтармиш апӀузди, йицӀуд йигъ тяйин гъапӀу.

¹⁵ Хъа йицӀуд йигълан, лигуруш, паччагьдин суфрайихъан ипӀурайи вари баяртӀан гьамрар ужуди ва сагъди айи.

¹⁶ Гьаддихъанмина гъуллугъчийи, дурариз вуйи ипӀрудар ва чяхир гьадабгъури, дурариз анжагъ мейвйиртӀан тутруври гъахьнийи.

¹⁷ Аллагьди му юкьур бализ фагьум, билиг ва вари илмарихьна удукьувалар, хъа Даниялиз – гьацира жюрбежюр нивкӀаринна улупбарин гъавриъ тӀаъру удукьуваларра тувнайи.

¹⁸ Паччагьди тяйин дапӀнайи вахт улубкьнийи, ва аьхюну гъуллугъчийи баяр Навухаднасарихьна хъади гъафнийи.

¹⁹ Паччагьди дурарихъди гаф-чӀал гъапӀу, ва, лигуруш, тмуну баярикан сарра Даниялинна, Ананайинна, Мисаилинна Азарийин дережайиз багахькьан шуладайи – гъаддиз мурар паччагьдин гъуллугъчйирди кьабулра гъапӀнийи.

²⁰ Фуну илмикан ва аьжайиб ляхникан паччагьди гьерхишра, паччагьлугъдиъ айи вари фалчйирна сюгьюрчйиртӀан дурар йицӀуб ражари артухъди аьяндрар вуйиб аьгъю шулайи.

²¹ Даниял душваъ Кир паччагьдин гьюкмин садпи йисазкьан гъузнийи.