Ачмиш 9 - Гирами Китаб

¹ Хьубпи малайикди зурна гъиву, ва узуз завʼан жилиина хяд абхъри гъябкъзуз. Дидиз кӀан ккадру гъуйдин ачар тувнайи.

² Диди кӀан ккадру гъуйдикан жюлгер ктахьу ва душвʼан, зурба пичраанси, кум утӀубччву. КӀан ккадру гъуйдиан утӀубччву кумру ригъ ва гьава ккапӀу.

³ Кумруан жилиина елгнагарин гъварчар адахьу. Жилиин аькьрабариз айи гьюкум думу елгнагаризра тувнайи.

⁴ Елгнагариз, я чру укӀаз, я чрушназ, я гьарариз зарар тутрувди, унтӀʼин Аллагьдин печатдин лишан алдру адмийириз зарар тувуз, амур дапӀнайи.

⁵ Елгнагариз думу адмийир йихуз ваъ, хъа хьуб вазлин арайиъ сузайикк гъитуз буйругъ тувнайи. Хъа дурарин сузайин учӀврушин, аькьрабари кьацӀ гъапӀиганси, писуб вуйи.

⁶ Думу йигъари адмийир аьжал абгури хьиди, хъа бихъури хьибдар, дурар аьжалихъ мягьрум хьиди, хъа аьжал дурарихьан гьебгди.

⁷ Думу елгнагар дявдиз гьязур духьнайи эскрарин гьяйвнарси рякъюйи. Думу гьяйвнарин кӀулариин гъизилин тажарстар алийи, хъа машар адмийинстар,

⁸ кушар дишагьлийинси ярхидар, сппар асландин кӀанччарстар вуйи.

⁹ Дурариин, гар али гъюбариинси, рукьанстар, фукӀа ктидипру палтар алийи. Дурарин хлинццарин дих дявдиз ккажаргъурайи аьхючӀве гьяйвнарин аьрабйирин гъугъсиб вуйи.

¹⁰ Дурарин галамар айи рижвар аькьрабаринстар вуйи; адмийириз хьуб вазлиъ зарар тувру кьувват дурарин рижвариъ айи.

¹¹ Дурарин паччагь кӀан ккадрушван малайик ву; думу паччагьдиз жугьуд чӀалниинди Аббадан, хъа грек чӀалниинди Аполлион кӀуру.

¹² Сабпи дерд гьудубчӀвуру. Мегьел мидихъди кьюбсана дерд гъюри ими!

¹³ Йирхьурпи малайикдира зурна гъарабху. Узуз Аллагьдин улихь хьайи, гъизилин гъурбнар ургрушвʼин али юкьуб кӀарчнаан гъюрайи дих гъеебхьзуз.

¹⁴ Дихну зурна хьайи йирхьурпи малайикдиз гъапи: «Зурба вуйи Ефрат нирихъ дитӀнайи юкьрид малайикар дудурч».

¹⁵ Юкьрид малайикарра дудурчуру – дурар гьязурди, гьаму сяаьтназ, йигъаз, вазлиз ва йисаз (ккилигури), вари халкьарин шубубпи пай йибхбан бадали, дерккнайидар вуйи.

¹⁶ Гьяйвнин къушмарин кьадар кьюдварж миллион вуйи; му кьадар узуз гъеебхьунзуз.

¹⁷ Магьа йиз рякъбариан узуз гьяйвнарна дурариин элеънайидар фици гъяркънуш: дурариин али фукӀа ктрипру палат цӀаси уьруб, укӀуб ва гугутси гъатхуб вуйи; кӀулар асландин музмузарстар вуйи; дурарин ушвниан цӀа, кум ва гугурт утӀубччвурайи.

¹⁸ Гьаму шубуб бедбахтвали дурарин ушвниан удубчӀвурайи цӀихьан, кумрухьан ва гугуртдихьан вари адмийирин шубубпи пай гъийибхнийи.

¹⁹ Гьаз гъапиш гьяйвнарин кьувват дурарин ушвариъна рижвариъ айи, дурарин рижвар битӀариз ухшар вуйи, дурариин кӀулар алийи ва гьадму кӀуларихьди зарар тувуйи.

²⁰ Гьадму бедбахтвалариккан гъирмиш дархьиди ккудуччву адмийир, чпин хиларин ляхнарихьан, швумал духьну, гьудучӀвундайи: дурари шейтӀнаризна гъизиликанна, арсраканна, йифриканна, гъвандиканна, гакӀвликан дапӀнайи ва каънайи, я рябкъюз, я ерхьуз, я гъягъюз даршлу идолариз гьюрмат апӀуб дипундайи.

²¹ Дурар гьацира чпин я йивну йихувалар, я фалчивалар, я кьяппавалар, я тӀафалвалар дирчну, швумал гъахьундайи.