Ачмиш 7 - Гирами Китаб

Израилиан 144000 кас

¹ Хъасин узуз дюнʼяйин юкьбиб терефариъ дийигънайи юкьур малайик гъяркъзуз. Дурари, я жилиина, я гьюлʼина, я гьарариина хъивуз гъидритди, дюнʼяйиина хъивру юкьуб микӀ дидиснайи.

² Узуз ригъ гьудубчӀвру терефнахъан чӀиви Аллагьдин печать дибиснайи сарсана малайик за шули гъяркъюнзуз. Дугъу зурба дихниинди жилизна гьюлериз бедбахтвалар хуз гьюкум тувнайи юкьбиб малайикариз гъапи:

³ «Сабан я жилариз, я гьюлериз, я гьарариз, ухьу ихь Аллагьдин гъуллугънаъ айидарин машар печатдиинди жара дарапӀкьан гагьди, зарар мутуванай!»

⁴ Ва узуз, печать йивну жара гъапӀдарин кьадар варжна ягъчӀвурна юкьуд агъзур кас вуйиб, гъеебхьунзуз. Израилин баярин вари тухмариан печатдихьди жара гъапӀдар гьадмукьан вуйи.

⁵ Ягьудайин тухмиан печатдихьди лишанлу гъапӀдар йицӀикьюд агъзур кас вуйи; Рувимдин тухмиан – йицӀикьюд агъзур; Гаддин тухмиан – йицӀикьюд агъзур;

⁶ Ашерайин тухмиан – йицӀикьюд агъзур; Нефталимдин тухмиан – йицӀикьюд агъзур; Манасдин тухмиан – йицӀикьюд агъзур;

⁷ Симеондин тухмиан – йицӀикьюд агъзур; Левийин тухмиан – йицӀикьюд агъзур; Исахардин тухмиан – йицӀикьюд агъзур;

⁸ Забулундин тухмиан – йицӀикьюд агъзур; Юсуфдин тухмиан – йицӀикьюд агъзур; Вениаминдин тухмиан – йицӀикьюд агъзур.

⁹ Хъасин узуз сарихьанкьан ктухуз даршлукьан гьар жюре халкьарикан, миллетарикан, тухмарикан ва чӀаларикан вуйи адмийирин зурба гъварч, тахтнан ва Ччилан улихь лизи палтарикди ва пальмайин кюлер хилиъ ади дийигъну, гъяркъзуз.

¹⁰ Дурари аьхю дихариинди гьарай ипнайи: «Уьрхювал тахтниин деънайи ихь Адашдин ва Ччилан хилиъ а!»

¹¹ Хъа тахтналан, аьхюдарилан ва юкьрид гьяйванатарстарилан илтӀикӀнайи вари малайикари, тахтнан улихь жилиина ахьну, Аллагьдиз икрам гъапӀу.

¹² Дурари варидари гьамци кӀуйи: «Амин! Дугъриданна ужʼвал ва ад, аькьюл, чухсагъулвал, заанвал, кьувват ва кьудрат гьарсариз аьсрариан аьсрариз ихь Аллагьдихь хьа. Амин».

¹³ Думу аьхюдарикан сари узхьан гьерхнийи: «Гьаму лизи палат али адмийир фужар ву ва наънан гъафидар ву?»

¹⁴ «Йиз аьхюр, думу увуз ужуди аьгъявуз!» – жаваб тувза. Дугъу гъапизуз: «Мурар зурба бедбахтвалариккан ккудучӀвдар ву. Дурари чпин палтар, Ччилан ифдиъ дурччну, лизи гъапӀну,

¹⁵ гьаддиз дурар Аллагьдин тахтнан улихь хьа ва Дугъан Хулаъ дурар йишвди-йигъди Дугъан гъуллугънаъ а, хъа тахтниин Деънайири дурарин зиин Чан чадур алтӀабцциди,

¹⁶ ва дурариз гьич зат я къурагьвал, я гашʼвал аьгъю хьибдар, я ригъди дурар ургидар, я пис манишнан ялавну ккагъидар,

¹⁷ гьаз гъапиш тахтниин али Ччилу дурар уьрхиди, ва уьмур хру штун булагъарихъна гъахиди. Аллагьди дурарин уларилан гьарсаб нивгънан цӀадал марцц апӀиди».