Ачмиш 6 - Гирами Китаб

Сабпи йирхьуб печать алдабгъбакан

¹ Ччилу ургуб печатдикан саб фици алдабгънуш, гъябкъзуз ва юкьрид гьяйванатарстарикан сари фици: «Мина гъач!» кӀури, завун гъугърумаринсиб чӀигъ гъапӀнушра, гъеебхьунзуз.

² Хъа лизи гьяйван гъябкъзуз. Дидʼин чӀимирра хьайи атлу алийи. Дугъаз таж тувнади шулу, ва думу гъалибвал гъадабгъуз, гъалиб гъахьирси, рякъʼин шулу.

³ Ччилу кьюбпи печать алдабгъиган, узуз, юкьрид гьяйванатарстарикан кьюрпири, мина гъач, кӀури, гъеебхьзуз.

⁴ Хъа цӀаси убгурайи уьру гьяйван удубчӀвури гъябкъзуз. Му гьяйвниин али атлуйиз, зурба ханжал тувну, адмийир чиб-чпигъ гъярхьну йихбан бадали, дюнʼяйиан мясляаьтвал адабгъуз шлу ихтияр тувнийи.

⁵ Ччилу шубубпи печать алдабгъиган, узуз юкьрид гьяйванатарстарикан шубурпири: «Мина гъач!» кӀури гъеебхьзуз. Хъа хъютси кӀару гьяйван гъябкъзуз, дидʼин элеънайирин хилиъ ярчврар айи.

⁶ Хъасин гьадму юкьрид гьяйванатарстарин арайиъ гьамци кӀурайи дихсиб гъеебхьзуз: «Ярхи йигъан гъилихубдихъ саб сеъ дяхинтӀан дяргърубси хьибди, ясана шубуб сеъ мухтӀан дяргърубси хьибди! Аммаки я ччимдиз, я чяхриз зарар мутуван!»

⁷ Дугъу юкьубпи печать алдабгъиган, юкьрид гьяйванатарстарикан юкьурпири кӀурайи дих гъеебхьунзуз: «Мина гъач!»

⁸ Хъа узуз, зяиф-гъатху рангнан гьяйван гъябкъзуз. Дидʼин элеънайирин ччвур Аьжал вуйи, дидихъди вари жегьеннем гъюрайи. Мидиз дюнʼяйин юкьубпи пайниин ханжлиинди, гашʼвалиинди, уьзрариинди ва юкьбиб вягьши гьяйванатариинди адмийир йихуз шлу гьюкум тувнайи.

⁹ Дугъу хьубпи печать алдабгъиган, узуз гъурбнар апӀрушван кӀанакк Аллагьдин Гафналантина ва дурари гъапӀу шагьидвалилантина гъийиху адмийирин рюгьяр гъяркъзуз.

¹⁰ Дурари зурба гьарай идипу: «Гирами ва Гьякьлу Гьюкумдар! Уву гьаз гьамусра дюнʼяйин адмийирин суд апӀурадарва ва дурариз, ич удубзу ифдихъанди, жаза гьаз гьадабтӀурадарва?»

¹¹ Гьадмуган дурарикан гьарсариз лизи палат тувнийи ва сацӀибсана сабур апӀуб ккун гъапӀнийи, гьаз гъапиш дурарин кьадар гьуркӀну шайиз, чписи, Месигь Аллагьдин гъуллугънаъ айи гъардшарра йихайиз, ккилигну ккундийи.

¹² Узуз Дугъу йирхьубпи печать алдабгъури гъябкъзуз. Гьадмуган лап яманди жилар гъутӀурччву; ригъ – маллайин чухаси кӀару, хъа вари ваз ифиси гъабхьи,

¹³ гужал микӀ хъивну гъядябхъру дурубжу инжирси, хядар, завариан адахьну, жилиина ахьу.

¹⁴ Зав кагъазси илбижну дубгу; вари дагъларна островар чпин йишварихьан гьудучӀву.

¹⁵ Дюнʼяйин паччгьарра, гьякимарра, кьушмарин аьхюдарра, девлетлу ва кьудратлу адмийирра, лукӀарра ва азадди уьмур хъапӀрударра – вари дагълариъ айи гъарзаригъ ва дюрхъяриъ гьитӀикӀнийи.

¹⁶ Хъа дурари дагъларизна гъарзариз кӀуйи: «Учʼина ахьай, тахтниин Деънайирихьан ва Ччилан хъял кайивалихьан учу гьитӀикӀай.

¹⁷ Дурарин хъял алдабгъру Йигъ дуфна. Шлихьан мидккан ккадархьуз хьиди?!»