Ачмиш 5 - Гирами Китаб

Дибиржнайи кагъаз ва Ччил

¹ Тахтниин Деънайирин арччул хилиъ узуз китаб – турбаси дибиржнайи кагъаз гъябкъюнзуз. Дидин айтӀандира, зиъландира варишвар алацӀну, дибикӀнайи, ва думу ургуб печатдиинди хъябкьнайи.

² Аьхю дихниинди гьамци кӀурайи кьудратлу малайикра гъяркъзуз: «Фуж лайикь ву му китаб ачмиш апӀуз ва мидлан печатар алдагъуз?»

³ Гьич сарихьанра: я завариин, я жилариин, я жиларикк ккайидарихьан – китаб ачмиш апӀуз гъабхьундайи, гьеле дидихьинди лигузкьан дурарихьан удубкьундайи.

⁴ Китаб ачмиш апӀуз ужур, дидихьинди лигузкьан удубкьрур арайиз удудучӀвган, узу бегьем гъишза.

⁵ Хъасин гьадму аьхюдарикан сари гъапизуз: «Мишан! Лиг, Ягьудайин тухмиан Аслан гъалиб гъахьну, Давудрин машгьур вуйи насил! ГьадгъухьантӀан шулдар ургуб печать али китаб ачмиш апӀуз».

⁶ Узуз тахтнахь, гьацӀ кьялаъ, Ччил гъяркъюнзуз. Думу гъурбан апӀуз духнайирси айи. Дугълан гьадму юкьрид гьяйванатарстарна аьхюдар илтӀикӀнайи. Гъурбан апӀуз Духнайириз ургуб кӀарчна, ургуб ул айи – мурар Аллагьдин ургуб рюгь вуйи. Дугъан мурар дюнʼяйиина гьаърудар вуйи.

⁷ Дугъу, багахь духьну, тахтниин Деънайирин арччул хилиъ айи дибиржнайи китаб гъибису.

⁸ Дугъу думу гъибисган, юкьрид гьяйванатарстарна къарна юкьрид аьхюдар Ччилан улихь икрам апӀури дахьу. Дурарин гьарсарин хилиъ чюнгюр ва кӀулихьди ацӀнайи, ицци ниар хъайи ургру ччимар ади, гъизилин гъабар айи – му ччимар Аллагьдин гирами халкьдин ккарагбар ву.

⁹ Дурари цӀийи мяъли апӀурайи: «Уву лайикь вува китаб бисуз ва дидлан печатар алдагъуз, гьаз гъапиш, Уву духьну гъурбан, Яв ифдиинди Уву Аллагьдиз адмийир гъадагъунва гьарсаб тухмиан ва чӀалнаан, гьар жюре миллетарикан ва халкьарикан.

¹⁰ Уву гъапӀунва дурарикан ихь Аллагьдиз гирами гъуллугъчйир ва паччгьар – дурари дюнʼяйиинра паччагьвал апӀиди!»

¹¹ Узуз юкьрид гьяйванатарстаринна гьадму аьхюдарин тахтналан илтӀикӀнайи гизаф малайикар гъяркъзуз ва дурарин дихар гъеерхьзуз. Дурарин кьадар ктухузкьан шлуб дайи – агъзрар-агъзрариинди вуйи.

¹² Дурари аьхю дихниинди кӀуйи: «Гъурбан гъахьи Ччил лайикь ву кьувват, девлет, аькьюл ва кьудрат, заанвал, ад ва ужʼвал кьабул апӀуз!»

¹³ Узуз гъеебхьунзуз, вари арайиз дубхнайибди – завариинра, жилариинра, жилариккра ва гьюлериъра – варишвариъ варибди фици гьарай апӀуйиш: «Тахтниин Деънайиризна Ччилаз – ужʼвал, заанвал, ад ва кьудрат гьаммишандиз!»

¹⁴ Ва юкьрид гьяйванатарстарира кӀуйи: «Амин!» Аьхюдар жилиина ахьуйи ва икрам апӀуйи.