Ачмиш 4 - Гирами Китаб

Югьандиз аьршариъ гъябкъюб

¹ Гьамдин кьялхъян узуз завариъ урчӀар арццну гъяркъюнзуз ва гьадму сифте гъеебхьу зурнайинсиб дих гъеебхьунзуз. Дих узухъди, гьамци кӀури, улхуз хъюбгъю: «Мина удучӀв, Узу увуз багарихьди хьуз ккайиб улупурзавуз».

² Узу гьадму сяаьт Рюгьну ацӀунзу. Фу лигурва, аьршариъ тахт дебккна, хъа тахтниин Деънайир ал.

³ Хъа Деънайирилан сердоликна яшма кӀуру багьа гъванариланси нур рабгъурайи, ва тахт вуйибси заъланмина изумруддин рангарин дерккучӀимирсиб илбицнайи.

⁴ Гьадму тахтнахъди, илтӀикӀну, къабна юкьуб тахтсана хъайи. Дурариин кьарна юкьур аьхюр, лизи палат алабхьну, деънайи; дурарин кӀулариин гъизилин тажар алийи.

⁵ КӀулинуб тахтнахьан кьюркьлин цӀийир, гьарйир ва завар рахрустар сесер гьудучӀвуйи. Думу тахтнан улихь цӀа алди ургурайи акв тувру ургуб алат хьайи – мурар Аллагьдин ургур рюгь вуйи.

⁶ Тахтнан гъаншариъ хрусталсиб гюзгдин гьюлиз ухшар вуйи фу-вуш айи. ГьацӀна – гьацӀ кьялаъ, тахтнан юкьуб тереф вуйибси илтӀикӀну, улхьандира ва кьялхъяндира кьадар адрубкьан улар айи, гьяйванатарстар юкьур чӀивидар айи.

⁷ Сарпи гьяйванатсир – аслансир вуйи; кьюрпир – жигьил йицсир; шубурпирин маш адмийинсиб вуйи, хъа юкьурпир завуъ уьбхнайи люкьраз ухшар айир вуйи.

⁸ Гьадму юкьрид гьяйванатарстарик гьарсардик йи-йирхьуб хлинцц кайи. Хлинццар вари терефарихъанди: айтӀандира, зиъландира – уларихьди алацӀнайи. Юкьрид гьяйванатарстари, зат дийийигъди, йишвнура ва йигънура гьарйир апӀурайи: «Гирами, гирами, гирами ву Агъа Аллагь вари хилиъ Дибиснайир, гьарган Айир, Гъахьир ва Гъюрур!»

⁹ Гьадму юкьрид гьяйванатарстари тахтниин Деънайириз – гьарган яшамиш Шулайириз, чухсагъул кӀури имиди, Дугъан ад апӀури имиди ва заанвал улупури имиди,

¹⁰ къарна юкьур аьхюри тахтниин Деънайирин улихь, ис алахъури, гьарган яшамиш Шулайириз икрам апӀуйи ва, тахтнан улихь чпин тажар диври, гьамци кӀуйи:

¹¹ «Уву лайикь вува, Агъа, ич Аллагь, ад, заанвал ва кьувват кьабул апӀуз, гьаз гъапиш, Уву вува вариб арайиз Гъабхир; Яв амриинди вари гъабхьну ва арайиз гъафну!»