Ачмиш 3 - Гирами Китаб

Сардисдин хъугънайидариз

¹ Сардисдиъ айи хъугънайидарин малайикдиз бикӀ: «Гьамци кӀура Аллагьдин ургуб рюгь ва ургуб хяд Хьайири: яв ляхнар Узуз аьгъязуз; гьеле уву чӀивидарин жергйириъ ашра, уву дукӀнайир вуйиб аьгъязуз.

² Уягъ йихь ва мюгькам апӀин уву имбу гьамус-хъа йибкӀру гьялнаъ айиб. Яв ляхнар Йиз Аллагьдиз хуш шлударстар вуди гъяркъюндарзуз.

³ Гьаци вуйиган, кӀваин апӀин, увуз фу гъурубкьнуш ва фу гъеебхьнуш! Гьадму тамам апӀин, яв ляхнар гъит ва швумал йихь! Хъа эгер уву уягъ дархьиш, Узу тӀафалси хабарсузди гъидиза. Уву, Узу увухьна фуну вахтна гъюруш, аьгъю хьибдарвуз.

⁴ Аммаки увуз Сардисдиъ чпин палтар ктрацӀу сакьюдар адмийир авуз, ва дурар Узухъди лизибдиъди гъягъиди, гьаз гъапиш дурар лайикьлу ву.

⁵ Гъалиб гъахьирра лизи палтар алахьну хьиди, ва Уьмрин китабдикан Узу дугъан ччвур ктӀубшвидарза, Узу думу, Йиз Адашдин ва Дугъан малайикарин улихь кьабул апӀидиза.

⁶ Шлик хъпехъру ибар каш, гъит, хъугънайидарин жямяаьтариз Рюгьну фу кӀураш, ебхьри!»

Филаделфияйин хъугънайидариз

⁷ Филаделфияйин хъугънайидарин малайикдиз бикӀ: «Гьамци кӀура Гирамири, Гьякьлури, Давудрин ачар Хьайири – Дугъу абццхъанмина, гьич сарихьанра хъябкьюз хьибдар, Дугъу хъябкьхъанмина, гьич сарихьанра абццуз хьибдар:

⁸ Узуз яв ляхнар аьгъязуз – магьа яв улихь Узу урчӀар арццунза ва гьич сарихьанра дурар хъяркьюз хьибдар, гьаз гъапиш, гьеле яв кьувват цӀибди вушра, уву Йиз Гаф гъюбхюнва ва Йиз ччвурнахьан гьудучӀвундарва.

⁹ Гьаддиз магьа, Узу увуз иблисдин мяракайиан жугьдар вуча кӀурайидар, амма дугъри дарудар, кучӀляхяр тувдизавуз – Узу дурар увухьна гъюруси ва яв ликарикк икрам апӀури дахьруганси апӀидиза. Хъа дурариз, Узуз уву ккуниб, аьгъю хьибди.

¹⁰ Узу увуз, мюгькамди гъуз, гъапиган, уву гьаци гъузунва, гьаддиз вари адмийир ахтармиш апӀуз дюнʼяйиина гъюру бедбахтваларин вахтна, Узу увура уьрхидизаву.

¹¹ Узу багарихьди гъидиза. Гьич сарихьанра яв паччагьвалин таж тадабгъуз даршлуси, увуз айибдихъан ижмиди хъичӀихну гъуз.

¹² Гъалиб гъахьирикан Узу Йиз Аллагьдин хулан мурхьул ктаидиза ва думу душваъ аьсрариз гъузди. Узу дугъак Йиз Аллагьдин ччвур, Йиз Аллагьдихьан завариан гъюру Йиз Аллагьдин шагьрин – цӀийи Ерусалимдин ччвур, ва Йиз цӀийи ччвур бикӀидиза.

¹³ Шлик хъпехъру ибар каш, гъит, хъугънайидарин жямяаьтариз Рюгьну фу кӀураш, ебхьри!»

Лаодикияйин хъугънайидариз

¹⁴ Лаодикияйин хъугънайидарин малайикдиз бикӀ: «Гьамци кӀура Амин ччвур алири, Дугъри ва Гьякь Шагьидди, Аллагьди халкь гъапӀу варибдин Аьхюри:

¹⁵ Узуз яв ляхнар аьгъязуз, уву я мичӀлир, я урцрур дарувалра аьгъязуз. Увуз ужу хьибди, эгер уву я мичӀлир, ясана урцрур вуди гъахьнийиш!

¹⁶ Хъа уву я мичӀлир, я урцрур дарди, хъа анжах мани вуди хьпаз дилигну, Узу уву Йиз ушвниан тутуси идипидизаву!

¹⁷ Уву: „узу девлетлу вуза, узу девлетлу гъахьунза, узуз сарун фукӀара ккимбуб имдариз“ – кӀураш, увуз, уву фукьан бахтсуз, аьжуз, касиб, кур ва гъяцӀал вуш, аьгъдарвуз.

¹⁸ Узу увуз саб насигьят тувраза: уву девлетлу хьуз, Узхьан цӀиъ марцц гъапӀу гъизил ва яв гъяцӀливалин нач ккебкуз алабхьру лизи палат гъадабгъ. Гьацира увуз уларикан ктатуз ва рябкъюри хьуз ччимра гъадабгъ.

¹⁹ Узу Узуз масан вуйи касариз жаза гьадабтӀурза ва дурарин жини ляхнар арайиз адагъурза, гьаци вуйиган, юкӀв хъип, ва швумал духьну, яв фурсар дирч.

²⁰ Магьа, Узу дийигъназа урчӀарихъ ва кучраза. Шлиз Йиз дих ебхьураш, гьадгъу Узуз урчӀар арццди, Узу гьадму касдихьна учӀвдиза ва учу, сатӀиди деъну, хябяхъдин уьл ипӀидича.

²¹ Гъалиб гъахьириз Узу Узухъди тахтниин деуз йишв улупидиза, гьаз гъапиш, Узура гъалиб гъахьунза ва Йиз Адашдин гъвалахъ Дугъан тахтниин деунза.

²² Шлик хъпехъру ибар каш, гъит, хъугънайидарин жямяаьтариз Рюгьну фу кӀураш, ебхьри!»