Ачмиш 22 - Гирами Китаб

Уьмрин нир

¹ Хъасин малайикди узуз хрусталси нур туврайи уьмрин штун нир улупзуз. Думу нир Аллагьдинна Ччилан тахтнаккан ккудубчӀвурайи

² ва кӀулин кючейиансина гъябгъюрайи. Нирин кьюбиб гъирагъарихъди уьмрин гьар хъайи. Дидигъ йисан йицӀикьюб ражари йимишар гъиршру, гьар вазли мейва хуру, дидин кӀажар халкьар сагъ апӀуз вуйидар ву.

³ Мушваъ агь-суза кайибра гьич фукӀара хьибдар. Гьаму Шагьриъ хьибди Аллагьдинна Ччилан тахт, ва Дугъан гъуллугъчйир Гьадгъан гъуллугънаъ хьиди.

⁴ Дурариз Аллагьдин маш рябкъиди, ва Дугъан ччвур дурарин машниин хьибди.

⁵ Душваъ сарун мучӀу шлуб дар, дурариз сарун акв тувру алатдин акв, я ригъдин акв лазим хьибдар, гьаз гъапиш дурариз акв Агъа Аллагьди апӀиди. Дурари паччагьвал аьсрариан аьсрариз апӀиди.

⁶ Малайикди гъапизуз: «Му гафар дугъридар ва гьякьлудар ву. Чан Рюгь пайгъамбрариз тувру Агъа Аллагьди Чан гъуллугънаъ айидариз багарихьди хьуз ккайиб улупуз Чан малайик гьаъну».

Гъюрур – Иса

⁷ «Магьа, Узу багарихьди гъидиза! Хушбахтавар ву гьаму китабдин пайгьамбарвалин гафар тамам апӀрур!»

⁸ Узуз, Югьандиз, гьаму вари гъябкъюнзуз ва гъеебхьунзуз. Узуз гъеебхьиган ва гъябкъиган, узуз гьаму вари улупу малайикдин ликариккна, дугъаз икрам апӀуз кӀури, ис алахъза.

⁹ Хъа малайикди гъапизуз: «Лиг, мици мапӀан! Узура гьаму увуси, яв гъардшарси, пайгъамбрарси ва гьаму китабдин гафар тамам апӀрударси, лукӀ вуза. Аллагьдин улихь икрам апӀин!»

¹⁰ Хъа дугъу гъапизуз: «Гьаму китабдин пайгъамбарвалин гафар мииликан! Гьаз гъапиш вахт сарун хъудубкьна.

¹¹ Гъит, ахмакь адми чан ахмакьʼвалар апӀури гъузри, гъит, алчагъри чан алчагъвалар апӀри, гъит, ужури ужувлар апӀри, ва гирами вуйир гирамиди гъузри».

¹² «Магьа, Узу багарихьди гъидиза! Ва гьардиз, чав гъапӀу ляхнариз дилигну, тувру Йиз кьимат Узухьди хьазухь.

¹³ Узу вуза Альфа ва Омега, Сарпир ва КкудубкӀрур, Эвел ва Аьхир».

¹⁴ Хушбахтаврар ву чпин палтар урччурайидар! Дурариз уьмрин гьарихьна ихтияр а, дурарихьан Шагьриъ урнарианмина учӀвуз шулу.

¹⁵ Амма хуйир, фалчйир, кьяппйир, йивну йихрудар, идолариз икрам апӀрудар, кучӀал ккунидар ва думу арайиз хрудар вари Шагьрин чӀатинди гъузди.

¹⁶ «Узу, Исайи, учвуз гьаму шагьидвал тувну, жямяаьтарин улихь ктибтуз Йиз малайик гьаунза. Узу вуза Давудрин Ччив ва Кюл. Узу вуза гвачӀиндин аку Хяд».

¹⁷ Рюгьнура ва швушвура кӀура: гъач! Хъпехъурайирира, гъит, йипри: гъач! Дахаргнайирра, гъит, гъюри! Шлиз ккундуш, гъит, уьмрин шид чӀанади гъадабгъри!

¹⁸ Гьаму китабдин пайгъамбарвалин гафар ерхьурайидариз узу улихьмиди кӀураза: эгер шли гьаму гафариин фукӀа-мукӀа иливиш, дугъʼин Аллагьдира гьаму китабдиъ ктитурайи бедбахтвалар иливиди;

¹⁹ хъа эгер шли гьаму пайгъамбарвалин китабдикан фукӀа-мукӀа ктабгъиш, гьаму китабдиъ ктитурайи уьмрин гьаркан ва Гирами Шагьрикан Аллагьди дугъан пай ктабгъиди.

²⁰ Шли гьамдикан шагьидвал апӀураш, Дугъу кӀура: «Ав, Узу багарихьди гъидиза!» Ав гьаци ибшри, гъач, Агъа Иса!

²¹ Агъа Исайин ужʼвал варидариз ибшри!