Ачмиш 21 - Гирами Китаб

ЦӀийи Ерусалим

¹ Хъа узуз цӀийи зав ва цӀийи жил гъябкъзуз. Гьаз гъапиш сифтейин заварна жилар гьаргандиз гъудургнийи ва гьюлер сарун имдайи.

² Узуз Гирами Шагьур – цӀийи Ерусалим гъябкъзуз. Думу завариан Аллагьдихьан, жилириз ккилигурайи швушвси кабалгну, ис гъабхьнийи.

³ Узуз тахтналан кӀурайи аьхю дих гъеебхьзуз: «Магьа Аллагь дуланмиш шлу йишв, Думу адмийирихъди сатӀиди яшамиш хьиди! Дурар Гьадгъан халкьди хьиди! Ва Аллагь гьадрарихъди хьиди, ва гьадрариз Думу Аллагь хьиди.

⁴ Дугъу дурарин уларилан гьарсаб нивгъ марцц апӀиди. Аьжал сарун хьибдар, сарун дердер, ишлар, иццрушнар хьидар, гьаз гъапиш, муганайиздинуб вари гьаргандиз гъубшну».

⁵ Тахтниин Деънайири гъапи: «Лиг, Узу вари цӀийиб арайиз хураза!» Хъа гъапи: «БикӀ, му гафар вари гьякь ва дугъри ву».

⁶ Дугъу гъапизуз: «Тамам гъабхьну! Узу – Альфа ва Омега, Эвел ва Аьхир вуза. Гъах духьнайириз уьмрин булагъдиккан Узу чӀанади шид убхъуз гъитдиза.

⁷ Гъалиб гъахьириз Узхьан гьаму вари ирсди рубкьиди. Гьацириз Узу Аллагь хьидиза, хъа думу Узуз бай хьиди.

⁸ Хъа гучӀбяхярин, масу туврударин, намуссузарин, йивну йихрударин, кьяппйирин, фалчйирин, идолариз икрам апӀрударин ва вари кучӀляхярин йишв цӀииндина гугутдиинди убгурайи дагар ву. Му кьюбпи аьжал ву».

⁹ Хъасин ккудукӀру ургуб бедбахтвалар айи захар хьайи ургур малайикарикан сар малайик гъюру ва узухъди улхуру: «Лиг, узу увуз швушв улупидизавуз – Ччилан шив!»

¹⁰ Хъа дугъу узу, Гирами Рюгьну ацӀнайир, зурба ягъли дагъдиина гъурху ва узуз завариан Аллагьдихьан ис шулайи Гирами Шагьур – Ерусалим улупу.

¹¹ Думу Аллагьдин адну нурлу дапӀнайи. Шагьрин крабчӀурайивал багьа гъванаринсиб, яшмайихъна гъубшубсиб, хрусталси марцциб вуйи.

¹² Дидлан, йицӀикьюр урар алди, зурба ягъли бару илтӀибкӀнайи. Хъа урнарихъ – йицӀикьюр малайик. Урнариин ччвурар дидикӀнайи – му ччвурар Израилин баярин йицӀикьюб тухмин ччвурар вуйи.

¹³ Шубуд урнар ригъ гьудубчӀвру терефнахъинди лигурайи, шубуд – кафарийихъинди, шубуд – кьиблайихъинди, шубуд – ригъ алабхъру терефнахъинди.

¹⁴ Шагьрин цал йицӀикьюб шибритӀиин дивнайи. Дурариин Ччилан йицӀикьюр марцци вакиларин ччвурар алийи.

¹⁵ Узухъди гафар апӀурайи малайикдихь, шагьур, дидин урнар ва цалар ерцуз гъизилин маргъ хьайи.

¹⁶ Шагьур юкьуб мурччвнануб вуйи, дидин ягълишинна яркьушин саб вуйи. Малайикди маргълихьди шагьур гъеебцу ва ярхишин кьюд агъзур километртӀан зиина удубчӀву, хъа дидин яркьушинна ягълишин, дидин ярхивалин кьадар айидар вуйи.

¹⁷ Дугъу цал гъеебцу, дидин ягъливал, малайикди ктухубси, инсанарин гьисабариинди, йирхьцӀур метр удубчӀвнийи.

¹⁸ Цал яшма кӀуру багьа гъвандикан дапӀнайи, хъа шагьур – чаантина рябкъру шюшесиб марцци гъизиликан.

¹⁹ Шагьрин шибритӀар гьамцдар гьар жюре багьа гъванарихьди дабалгнайи: сабпи багьа гъван – яшма, кьюбпиб – сапфир, шубубпиб – халцедон, юкьубпиб – изумруд,

²⁰ хьубпиб – сардоникс, йирхьубпиб – сердолик, ургубпиб – хризолит, миржибпиб – берилл, урчӀвубпиб – топаз, йицӀубпиб – хризопраз, йицӀисабпиб – бирюза, йицӀикьюбпиб – аметист.

²¹ ЙицӀикьюд урнар – йицӀикьюб жемчугдикан, гьарсар урнар сабди вуйи жемчугдикан дапӀнайи. Шагьрин кӀулин кюче чаантина рябкъру шюшеси марцци гъизиликан вуйи.

²² Узуз шагьриъ Аллагьдин Хал гъябкъюндарзуз, гьаз гъапиш Учв, Агъа Аллагь, вари хилиъ Дибиснайир ва Ччил – гьадрар Чпи Хал вуйи.

²³ Шагьур аку апӀуз я ригъдин, я вазлин акв лазим дайи, гьаз гъапиш шагьур Аллагьдин аднахьди аку дубхьнайи, ва Ччил – дидиз акв Туврур вуйи.

²⁴ Халкьар Дугъан аквнаъди гъягъиди ва дюнʼяйин паччгьари душваз чпин заанвал хибди.

²⁵ Дидин урнар вари йигъан арццну хьиди, хъяркьну хьидар – душваъ йишв мучӀу шлуб дар.

²⁶ Душваз халкьарин заанвал ва гьюрмат хибди.

²⁷ ФукӀара чиркинуб душвазди убчӀвидар, душвазди алчагъвал ва кучӀал апӀрур учӀвидар. Душваъ анжагъ Ччилахь хьайи Уьмрин китабдиъ дидикӀнайидартӀан учӀвидар.