Ачмиш 20 - Гирами Китаб

Агъзур йис

¹ Хъа гьадмуган, кӀан ккадрушван ачар хьади ва хилиъ аьхю зунжур ади, завариан гъюрайи малайик гъяркъзуз.

² Дугъу аждагьа, дегь заманайин битӀ, яни иблис вая Сатана, дибисну агъзур йисазди йибтӀну,

³ кӀан ккадрушвазди ипру ва, халкьар алдатмиш дарапӀбан бадали, агъзур йис гъябгъяйизкьан, хъябкьну, зиълан печать йивуру. Хъасин думу сацӀиб вахтназ деебтуб лазим вуйи.

⁴ Хъа узуз, суд апӀуз гьюкум тувнайидар деънайи тахтар ва, Исайикан шагьидвал дапӀну ва Аллагьдин Гафналантина ккахъну, кӀулар алдатӀу рюгьяр гъяркъзуз. Мурар вягьши гьяйванатдиз, я дидин суратназ икрам дарапӀдар ва унтӀʼин, ясана хилʼин дидин лишан капӀуз гъидритдар ву. Дурар чӀиви гъахьнийи, ва дурари Месигьдихъди агъзур йисан паччагьвал апӀиди.

⁵ Хъа имбу дийихнайидар, агъзур йис гъябгъяйиз, чӀиви хьидар. Му сабпи чӀиви хьувал ву.

⁶ Хушбахтаврар ва гирамидар ву сабпидарди чӀиви гъашидар! Мурарин зиин кьюбпи аьжализ гьюкум адар. Дурарикан Аллагьдин ва Месигьдин гъуллугъчйир хьиди, ва дурари Гьадрарихъди агъзур йисан паччагьвал апӀиди.

Иблисдиз жаза

⁷ Агъзур йис гъубшиган, иблис дустагъдиан деебтиди,

⁸ ва диди, дюнʼяйин юкьуб терефназ дубшну, яни Гогдинна Магогдин йишвариз дубшну, халкьар алдатмиш апӀури, дурар дявдиз уч апӀиди. Дурарин кьадар гьюлихъ гъумкьан ву.

⁹ Вари жил дибисну дуфну, дурари Аллагьдин гирами халкьар айишв ва Аллагьдин ккуни шагьур кьялаъ тӀапӀу. Хъа, завариан цӀа дубгъну, Иблисдин кьушум вари тӀанкь гъапӀу.

¹⁰ Дурар алдатмиш гъапӀу Иблис гугурт убгурайи цӀин дагризди – вягьши гьяйванатна кучӀлин пайгъамбар айи йишвазди – ипру. Дурарикан йишвди – йигъди, аьсрариан аьсрариз зивзивар кчӀюкьюри хьиди.

Гъийихдарин суд

¹¹ Хъа узуз, зурба лизи тахт ва дидʼин Деънайир гъяркъзуз. Дугъан машнахьан вари жил ва зав гьергнийи, дурар дихъури имдайи!

¹² Узуз гъийихдар, машгьур ва цӀиб вуйидар тахтнан улихь дийигъну гъяркъзуз. Китабар арццу, хъасин сабсана китаб абццу. Му Уьмрин китаб вуйи. Хъасин гъийихдарин суд, китабариъ дибикӀнайиси, чпин ляхнариинди гъапӀу.

¹³ Гьюлери чпиъ айи дийихнайидар тувнийи, аьжали ва жегьеннемди чпиъ айи дийихнайидар тувнийи, ва гьарсар касдин, чав гъапӀу ляхнариз дилигну, суд гъапӀу.

¹⁴ Хъасин аьжална жегьеннем цӀин дагризди ирчнийи. Ари гьаму кьюбпи аьжал ву – цӀа алди, убгурайи дагар.

¹⁵ Уьмрин китабдик дидикӀну адрудар цӀин дагризди гатӀахьнийи.