Ачмиш 2 - Гирами Китаб

Эфесдин хъугънайидариз

¹ Эфесдин хъугънайидарин малайикдиз бикӀ: «Магьа арччул хилиъ ургуб хяд Дидиснайири ва гъизилин ургуб акв апӀру алатаригъ Лицурайири фу кӀураш:

² Яв ляхнар, яв гъагъи жафа ва яв сабурлувал Узуз аьгъязуз. Аьгъязуз, уву нягьякь ва чӀуру адмийир аьгь дарапӀруб; Исайин вакилар вуча кӀурайидар уву ахтармиш гъапӀунва ва дурар кучӀляхяр вуйиб аьгъю гъабхьунвуз.

³ Уву ижмир вува, Йиз ччвур бадали уву гизаф читинвалариъ ахъунва ва зяифвалиъ кӀул ипундарва.

⁴ Амма, Йиз увуз къаршуди кӀуру саб айиз: увуз яв сифтейин масанвал кӀваълан гьархнавуз.

⁵ КӀваин апӀин, уву фициб ягълишналан ахънуш, швумал йихь, ухдийин ляхнар давам апӀин. Эгер уву, швумал духьну, гьаци дарапӀиш, Узу увухьна гъидиза ва яв акв туврайиб йишвлан илдипидиза.

⁶ Хъа саб увуз авуз – Узуз даккни николитарин ляхнар дяркъну ккундарвуз.

⁷ Шлик хъпехъру ибар каш, гъит хъугънайидарин жямяаьтариз Рюгьну фу кӀураш, ебхьри! Гъалиб гъахьириз Узу Аллагьдихь женнетдиъ айи уьмрин гьаргъян йимишар итӀуз гъитдиза».

Смирнайин хъугънайидариз

⁸ Смирнайин хъугънайидарин малайикдиз бикӀ: «Гьамци кӀура Сарпири ва КкудукӀрури, ГъачӀири ва хъана яшамиш Шулайири:

⁹ Узуз яв аьзабарикан ва касибваликан аьгъязуз, хъа уву девлетлу вува! Аьгъязуз уву беябур апӀурайи, жугьдар вуча, кӀурайидариканра, хъа дугъридан дурар иблисдин мярака ву.

¹⁰ Увʼин улукьуз ккайи аьзабарихьан гучӀ мапӀан. Магьа багарихьди иблисди учвкан сакьюдар ахтармиш апӀуз, кӀури, дустагъдиъ ирчди, ва йицӀуд йигъан учву аьзабар зигидичва. ЙикӀайизкьан вафалуди гъуз ва Узу увуз уьмрин паччагьвалин таж тувдиза.

¹¹ Шлик хъпехъру ибар каш, гъит хъугънайидарин жямяаьтариз Рюгьну фу кӀураш, ебхьри! Гъалиб гъахьириз кьюбпи аьжал айиб дар».

Пергамдин хъугънайидариз

¹² Пергамдин хъугънайидарин малайикдиз бикӀ: «Гьамци кӀура кьюбиб мурзарра учӀру ханжал хьайири:

¹³ Узуз аьгъязуз, уву иблисдин тахт алишвʼин яшамиш шулайиб. Аммаки уву Йиз ччвурнахъан ижмиди хъичӀихнава. Уву Узухъ хъугъувалихьан иблис яшамиш шулайи ичв шагьриъ Йиз дугъри вуйи шагьид Антип гъакӀи йигъанра гьудучӀвундарва.

¹⁴ Гьаци вушра, Узуз увуз къаршу вуйибра азуз: увуъ Балам пайгъамбрин каламарихъди гъярайидар а. Думу каламари чан вахтна Валак паччагьди Израилин халкь гунагьарихъна хуз гъитнийи. Дугъу дурар, идолариз гъурбан гъапӀуб ипӀуз хъаънийи; дурариз намуссузвалиинди уьмур гьапӀуз улупнийи.

¹⁵ Увуз гьацира николитарин каламарихъди гъягърударра авуз.

¹⁶ Гьаддиз, швумал духьну, хъадакай! Эгер хътадакиш, Узу багарихьди гъидиза ва дурарихъди Йиз ушвнин ханжлихьди дяви гъабхидиза.

¹⁷ Шлик хъпехъру ибар каш, гъит хъугънайидарин жямяаьтариз Рюгьну фу кӀураш, ебхьри! Гъалиб гъахьириз Узу, гирамиди уьбхюрайи ва сир айи манна тувдиза, гьацира, ччвур кайи лизи гъван тувдиза. Душвак дибикӀнайи ччвур, думу гъурубкьурилан гъайри, сарун гьич саризра аьгъю хьибдар».

Фиатирайин хъугънайидариз

¹⁸ Фиатирайин хъугънайидарин малайикдиз бикӀ: «Гьамци кӀура Аллагьдин Бали, гъизгъин цӀаси улар айири ва крабчӀурайи рукьстар ликар ккайири:

¹⁹ Узуз аьгъязуз яв ляхнар ва масанвал, хъугъувал, гъуллугънаъ хьувал ва мюгькамвал. Яв аьхиримжи ляхнар сифтейиндартӀан гизаф вуйибра аьгъязуз.

²⁰ Хъа магьа увуз къаршуди Йиз фу аш: пайгъамбар вуза, кӀурайи Изавел кӀуру дишагьли аьгь апӀурава. Дугъу Йиз гъуллугънаъ айидар улдугуз гъитра: дурар кьяппавалихъинди илтӀикӀура ва идолариз багъиш гъапӀуб ипӀуз улупура.

²¹ Узу дугъаз чан тӀулар дирчуз вахт тувунза, хъа дугъаз чан намуссузвалиин швумал хьуз ккунди адар.

²² Гьаддиз Узу думу уьзрарихь гьахъуз гъитдиза, эгер чпин ляхнариин швумал духьну, хътадакиш, дугъахъди кьяппавал апӀури гъашидарра зурба бедбахтвалихь гьирчдиза.

²³ Дугъан бицӀидарра аьжалихь гьирчдиза. Гьадмуган вари жямяаьтариз аьгъю хьибди: ичв юкӀвариъ ва фагьмариъ жиниди уьбхюрайиб вари аьгъюр Узу вуйиб, ва гьарсариз Узу, чан ляхнариз дилигну, тувдиза.

²⁴ Хъа Фиатирайиъ имбудариз, гьадму каламарихъди дяргърудариз ва иблисдин фендигарвалар аьгъю дарапӀдариз Узу кӀураза: „Узу учвʼин артухъ гъагъ илипдарза“,

²⁵ эгер учву, тап Узу гъяйиз, ичв айибдиинди, гьадму уьбхюри гъузиш.

^26-27 Хъа аьхиризкьан, Узу кӀуруб вари тамам апӀури, гъалиб гъахьириз, халкьарин зиин Узуз Йиз Адашдихьан гъурубкьганси, гьюкум тувдиза. Гьацири дурарин зиин рукьан чумакъихьди гьюкум гъабхиди ва, ругдин гъабар фици тикйир шулуш, гьаци дурар уьргъиди!

²⁸ Гъалиб гъахьириз Узу гвачӀиндин хядра тувдиза.

²⁹ Шлик хъпехъру ибар каш, гъит, хъугънайидарин жямяаьтариз Рюгьну фу кӀураш, ебхьри!»