Ачмиш 19 - Гирами Китаб

Халкьди аьршариъ Аллагьдиз мяълийир апӀура

¹ Хъасин узуз аьршариъ зурба гъварч адмийирин шадвалин гьарайнан гъугъ гъеебхьунзуз: «Аллилуя! Уьрхювал, ад ва кьудрат ихь Аллагьдихь хьа,

² гьаз гъапиш, дугъридар ва гьякьлудар ву Дугъан жазйир: Дугъу Машгьур Кьяппайин, диван гъапӀну, вари дюнʼяйиин чан алчагъвал артмиш гъапӀиган; Дугъу дугъаз, Чан лукӀарин ифдиз дилигну, жаза адабтӀну!»

³ Хъанара адмийирин гъварчну гьарай гъапӀу: «Аллилуя! Думу алчагърин кум аьсрариан аьсрариз завариз удубчӀвури хьибди!»

⁴ Къарна юкьур аьхюр ва юкьрид гьяйванатарстар, Аллагьдиз икрам апӀури, тахтниин Деънайирин улихь гьамци кӀури, жилиина ис ахьу: «Амин! Аллилуя!»

⁵ Ва тахтналан гьамци кӀурайи дих гъабши: «Ихь Аллагьдин тяриф апӀинай, вари Дугъан гъуллугъчйир, вари Аллагьдиз гьюрмат апӀрудар, цӀиб вуйидар ва машгьур вуйидар!»

⁶ Узуз адмийирин зурба гъварчнан гъугъ, ясана урсрайи штарин гъугъ, ясана кьудратлуди завар рахурайи гъугърумарин гъугъсиб дих гъеебхьунзуз: «Аллилуя! Агъа, ихь Аллагь, вари хилиъ Дибиснайир, паччагьди дийигъну!

⁷ Шад хьидихьа ва шадвалин гьарай ипдихьа, Дугъан ад за апӀидихьа, гьаз гъапиш Ччилан сумчир а! Дугъан швушв гьязур духьна:

⁸ швушваз назук ирин нурлу ва марцци палат тувна! Назук ир – му Аллагьдин гирами халкьдин гьякь ляхнар ву».

⁹ Хъасин малайикди узуз кӀуру: «БикӀ: „Хушбахтаврар ву Ччилахьна сумчрин гешт хъапӀуз дих дапӀнайидар!“ Ва, давам апӀури, малайикди гъапизуз: „Магьа Аллагьдин гьякь гафар!“»

¹⁰ Узу, му малайикдиз икрам апӀарза кӀури, дугъан ликариккна ис алахъза, хъа дугъу узуз гъапи: «Лиг, мици мапӀан! Узура, увуси ва яв гъардшарси, Исайикан шагьидвал апӀурайи лукӀ вуза! Аллагьдиз икрам апӀин! Гьаз гъапиш гьаму пайгъамбарвалин гафарин мяна Исайикан шагьидвал апӀуб ву».

Лизи гьяйвниин элеънайир

¹¹ Хъасинси узуз зав атӀабццну гъябкъзуз: магьа лизи гьяйван ва дидʼин Элеънайир. Дугъаз Дугъри ва Гьякь Кас кӀуйи, Дугъу гьякьʼвалиинди дяви ва суд апӀуру.

¹² Дугъан улар убгурайи цӀаси ву, Дугъан кӀулʼин гизаф тажар ал. Дурарик, Дугъаз ЧазтӀан гъайри, саризра аьгъдру ччвур дибикӀна.

¹³ Дугъʼин ифдик кипнайи валжагъ алийи. Дугъан ччвур: «Аллагьдин Гаф» вуйи.

¹⁴ Лизи гьяйвнариинди, назук ирин лизи ва марцци палат алди, Дугъахъди аьршариан кьушум хъайи.

¹⁵ Аллагьдин Гафнахъ хътругърудар пуч апӀуз Дугъан ушвниан учӀру ханжал удубчӀвурайи. Дугъу дурар рукьан чумакъикк ккаъди: Дугъу чяхир кчӀюбкьрушваъ Аллагьдин, вари хили Дибиснайирин, яман хъялнан чяхир кчӀюбкьюра.

¹⁶ Дугъан валжгъиин ва жвукьриин «паччгьарин Паччагь ва агъйирин Агъа» ччвур дибикӀнайи.

¹⁷ Узуз, ригъдиин дийигъну, заварикк тӀирхурайи вари жакьвариз зурба дихниинди чӀигъ апӀурайи малайик гъяркъзуз: «Эй, гьамина, Аллагьдихьна, хябяхъдин машгьур хураг ипӀуз уч йихьай!

¹⁸ Паччгьарин, кьушмарин аьхюдарин, кьудратлударин, гьяйвнарин ва дурариин элеънайидарин, лукӀарин ва азадкрарин, цӀиб ва зурба вуйидарин жандкарин йикк ипӀидичва».

¹⁹ Хъа узуз, лизи гьяйвниин Элеънайирихъдина Дугъан кьушмарихъди дявдиз удубчӀвнайи вягьши гьяйванат гъябкъзуз.

²⁰ Вягьши гьяйванатна кучӀлин пайгъамбар гъидису. КучӀлин пайгъамбри вягьши гьяйванатдин гьюрматназ аьламатар улупуйи. Дугъу гьадму аьламатариинди вягьши гьяйванатдин лишан капӀнайидар ва дидин суратназ икрам апӀурайидар алдатмиш гъапӀнийи. Дурар кьюридра чӀивиди имиди убгурайи гугуртдин дагриъ ирчу.

²¹ Имбудар лизи гьяйвниин Алирин ушвниан удубчӀвурайи ханжлихьди гъийихнийи, ва вари жакьвар дурарин майтарин йиккарихьди ацӀнийи.