Ачмиш 18 - Гирами Китаб

Вавилон ккадабхъуб

¹ Хъасинси узуз завариан гъюрайи, хилиъ зурба гьюкум айи жара малайик гъяркъзуз. Дугъан адлувалиан жил нурлу гъабхьнийи.

² Дугъу кьудратлу дихниинди гъапи: «Ккадабхъну, ккадабхъну машгьур меркез Вавилон! Думу шейтӀнар диргрушв ва гьар бабат чиркин рюгьярин мугъара, гьар бабат чиркин жакьварин мукь, гьар бабат чиркин ва хяви вягьши гьяйванатарин макан ву;

³ гьаз гъапиш думу кьяппайи чан качʼвалин яман чяхир вари халкьарихьди убгъуз гъитнийи; дугъахъди дюнʼяйин вари паччгьари кьяппавал гъапӀнийи; дугъан хазнайин кьадар адрувалилантина ариш-веришчйири чпиз девлет уч гъапӀнийи».

⁴ Хъа узуз завариан кӀурайи жара дих гъеебхьзуз: «Йиз халкь, дугъан гунгьарин иштракчйир учву дархьбан бадали дугъан бедбахтвалар учвук ктрукӀбан бадали, дугъхьан ярхла йихьай.

⁵ Гьаз гъапиш дугъан гунгьар завариккна ккудукьна, ва Аллагьди дугъан алчагъ ляхнар кӀваин алаура.

⁶ Гьаддиз дугъаз, дугъу учвуз гъапӀуб апӀинай, кьюб ражари артухъ дугъан ляхнариз кьимат тувай; кьюб ражари артухъ ижми чяхир дугъан захаъ убзай!

⁷ Дугъан фукьан ад ади ва дугъу фукьан кефер апӀури гъахьнуш, гьадмукьан аьзабар ва дерд тувай дугъаз! Гьаз гъапиш дугъан кӀваан гьаму гъябгъюра: „Узу падишагь-ханумси деъназа, узу ачӀнир дарза ва дерд узуз гъябкъюндарзуз!“

⁸ Магьа гьаддиз, сабхилди дугъʼина бедбахтвалар гъиди: аьжал, дерд, гашʼвал, гьацира думу цӀигъ ургиди. Гьаз гъапиш, дугъан суд гъапӀу Агъа Аллагь кьудратлу ву».

⁹ Дугъак кабхъну цӀана кум гъябкъиган, дугъахъди алчагъʼвалариъди ва гъизилиан идиргъури яшамиш гъаши дюнʼяйин паччгьар дугъахъ ишиди ва дердер зигиди.

¹⁰ Дугъан аьзабариз гъирагъдихъ дийигъну лигури ва гукӀнишну гъадагъну, дюнʼяйин паччгьари пиди: «Язухъ вуда, язухъ вуда яв, эй Вавилон, машгьур вуйи меркез, кьудратлу вуйи меркез. Саб гагьди увʼина яв кьазйир гъафида!»

^11-13 Ариш-вериш апӀрударра дугъахъ ишуйи ва гъам зигуйи, гьаз гъапиш сарун дурарин мутмйир: гъизилин, арсран, багьа гъванарин ва жемчугдин, назук ирин, къириб-жюржюрин, шелкдин ва ал рангнан парчйирин, лимондин гьарарин гъагъар; флин кӀурбин гьаржюре шейʼарин ва багьа гакӀвликан, бронзайикан, рукькан ва мармардашдикан ктау гъабарин гъагъар; хурагнак кахьру гьарарин гъеерццу галарин, гъеерццу укӀарин, ицци ниар хъайи ччимарин, мирра ва ладан аьтрарстар ягъарин; чяхрарин, оливкйирин ва ччимарин, уччвуди гъярягъю хюйин, дяхнарин, йицарин ва марччарин, гьяйвнарин, аьрабйирин, лукӀарин гъагъар сарира гъадагъури имдайи.

¹⁴ «Яв кӀван тямягь хъайи йимишар сарун увуз имдар; яв нурлувал ва девлет вари пуч гъабхьну. Сарун гьич зат дурар увухъ хьидар!»

¹⁵ Гьамцдар мутмйириинди ариш-вериш апӀрудар ва Вавилондин падишагь-ханумдилантина девлетар уч гъапӀдар, дугъан аьзабар гъяркъган, мяхъ кивну, гъирагъдихъ дийигъиди ва дурари, ишури, жан гъадабгъури,

¹⁶ пиди: «Язухъ вуда, язухъ вуда, машгьур меркез, назук ирин палатдиъ убчӀвнайиб, лап уьру ва ал рангнан парчйириъ айиб, гъизилин, багьа гъванарин ва якьут-мержандин нур туврайи шагьур!

¹⁷ Фициб девлет саб гагьди пуч гъабхьундарин!» Хъа вари гьюлериин гимйир хъаърудар, вари гимйириъ айидар, вари гимйириин ляхин апӀурайидар ва вари гьюлериин чпиз девлетнахъ хъайидар гъирагъдихъ дийигънийи,

¹⁸ ва дурари, меркездик кабхъу цӀин кумрахьинди лигури, ишларин гьарайниинди кӀуйи: «Фу тевуз шул машгьур меркездихь?»

¹⁹ Хъасин дурари чпин кӀулариин дерднаан рюкъ алабхьуйи, хъа, ишури, гьарай илипуйи: «Язухъ вуда, язухъ вуда яв, машгьур меркез! Гьюлʼин гимйир хъаърайидар вари гьамгъан девлетналан арбаб гъахьну. Саб гагьди душв ичӀи чюлиз илтӀибкӀну!»

²⁰ «Аммаки уву, зав, шадвал хъапӀ! Шадвал хъапӀай, гирамидар, вакилар ва пайгъамбрар, дугъу учвʼан удубзу ифдилантина Аллагьди дугъаз завал гъядябхъюз гъитну!»

²¹ Хъасин кьудратлу малайикди, рягънин ахалсиб зурба гъван гъадабгъну, гьюлизди гатӀабхьну, кӀуру: «Гьамциб кьувватниинди илдипну Вавилон, машгьур меркез! Думу сарун арайиз гъибдар!

²² Мукьмарин сесер сарун хьидар, саризра ерхьидар чюнгюр йиврудар, швутӀрам ва зурна йиврудар. Я шейʼар апӀрудар, я шейʼар апӀрушвар сарун увуъ хьидар. Рягъярин ахларин сесер сарун саризра ерхьидар.

²³ Шагьриъ акв апӀру алатдин акв сарун саризра рябкъидар. Швушв хурайиринна швушван сесер сарун саризра ерхьидар. Гьаз гъапиш, яв ариш-вериш гъабхрудар дюнʼяйиъ зурба касар вуйи; гьаз гъапиш, вари халкьар уву яв тӀилисимдиинди кучӀлин рякъюхъна гъахунва;

²⁴ гьаз гъапиш, пайгъамбрарин ва гирами касарин ифи, дюнʼяйиин вари йивну гъийихдарин ифи гьаму шагьриъ а!»