Ачмиш 17 - Гирами Китаб

Вавилондин суд

¹ Ургуб гъаб хьайи ургур малайикдикан сар узухьна гъафнийи ва узухъди гъулхнийи: «Лиг, фициб жазайиз ккилигураш гизаф нирариин али Машгьур Кьяппа.

² Дюнʼяйин паччгьари дугъахъди кьяппавал гъапӀнийи, ва дугъан кьяппавалин чяхрихьди дюнʼяйин адмийир тухъ гъахьнийи».

³ Хъасин узу Гирами Рюгьну ацӀнийзу ва ичӀи чюлиз гъухнийзу. Узуз душваъ, Аллагьдиз дидикӀнайи люкьнарихьди алабцӀнайи уьру вягьши гьяйванатдиин деъну, дишагьли гъяркъзуз. Думу вягьши гьяйванатдиин ургуб кӀул ва йицӀуб кӀарч алийи.

⁴ Дишагьлийиин лап уьру ва ал рангнан палат алийи. Дугъан къашкъамат гъизилиинди, багьа гъванариинди дабалгнайи. Хилиъ дугъу чан кьяппавалин чиркишнари ва аьйибну абцӀнайи гъизилин зах дибиснайи.

⁵ Дугъан унтӀʼин жини сир айи гьамциб ччвур дибикӀнайи: «Вавилон – машгьур меркез, дюнʼяйин аьйибнанна кьяппаваларин дада».

⁶ Узуз думу дишагьли, Аллагьдин халкьдин ифи ва Исайикан шагьидвал апӀрударин ифи дубгъну, пиян духьну, гъяркъзуз. Узуз думу гъяркъиган, гъах гъахьир, узу йиз фикрихъна гъюрадайза.

⁷ Малайикди узуз гъапи: «Уву гьаз мюгьтал гъахьива? Узу увуз дишагьлийикан ва думу элеъну гъягъюрайи, ургуб кӀулна йицӀуб кӀарч али вягьши гьяйванатдикан сир ктибтидизавуз.

⁸ Увуз гъябкъю вягьши гьяйванат саб вахтна айи, хъа думу сарун имдар. Гьамус, багарихьди думу, кӀан ккадрушвʼан аьжал хъудубкьнайиб, удубчӀвиди. Дюнʼя халкь апӀайиз Уьмрин китабдик ччвурар дидикӀну адру дюнʼяйин вари адмийир, думу вягьши гьяйванат гъябкъиган, мюгьтал хьиди, гьаз гъапиш саб вахтна думу айи, хъа гъудубгнийи, хъа гьамус хъана ачмиш хьибди.

⁹ Мушваъ гъавриъ ахъуз фагьум ва аькьюл лазим ву. Ургуб кӀул – мурар, дишагьли деънайи ургуб тепе ву.

¹⁰ Дурар (ургуб кӀул) – ургур паччагь ву; гьамусдиз хьур гъийихну, сар ими, хъа имбур мегьел дуфнадар, ва, думу гъафиган, дугъан думукьан йигъар хьидар.

¹¹ Фила-вуш чӀивиди айи вягьши гьяйванат, гьам сяаьтна дубкӀнайиб – му гьадму ургур паччгьарси миржирпи паччагьра ву, думу чан аьжалнахьна гъяра.

¹² Увуз гъяркъю йицӀуб кӀарч, мегьел паччагьвал ккубкьнадру паччгьар ву, амма дурариз вягьши гьяйванатдихъди сатӀиди цӀиб вахтназ паччагьвал ккубкьди.

¹³ Дурарин сабстар метлебар ву, думу паччгьари чпин кьувватна гьюкум вягьши гьяйванатдихьна тувди.

¹⁴ Дурари Ччилахъди дяви гъабхиди, Ччил дурариин гъалиб хьиди, гьаз гъапиш Думу агъйирин Агъа ва паччгьарин Паччагь ву. Дугъахъди сатӀиди, Чав дих дапӀнайидар, Чав кадагънайидар ва Дугъахъ хъугърайидар, аьгьтлу вуйидар хьиди».

¹⁵ Хъа малайикди узуз гъапи: «Увуз рякъюрайи Кьяппа деънайи нирар – мурар халкьар, адмийирин аьхю гъварчар, миллетар ва чӀалар ву».

¹⁶ Увуз гъябкью йицӀуб кӀарчназ ва вягьши гьяйванатдиз думу Кьяппа даккун хьиди ва дугъхьан вари девлет тадабгъну, фукӀа илимдарди гъяцӀал апӀиди. Дурари дугъан жандак ипӀиди ва цӀигъ убгиди.

¹⁷ Гьамци дурарихьди апӀуз гъитур Аллагь ву. Агъайин ният гьациб вуйи. Аллагьди, Чан гафар тамам хьайизкьан, дидин хилиз гьюкум гъюз гъитнайи.

¹⁸ Хъа увуз гъяркъю дишагьли – му вари дюнʼяйин паччгьарин зиин паччагьвал гъабхурайи зурба ва машгьур шагьур ву.