Ачмиш 16 - Гирами Китаб

Аллагьдин хъял айи зах

¹ Хъасин узуз, Аьршарин Хулʼан аьхю дихниинди ургрид малайикариз кӀурайи дих гъеебхьунзуз: «Гъарахай, ургуб гъабраъ айи Аллагьдин хъял дюнʼяйиина удубзай!»

² Сарпир удучӀвну, дюнʼяйиина чан гъаб удубзуру ва бухь ккайи учӀвру ва мурдал зийнар хуру. Дурар вягьши гьяйванатдин лишан кайи ва дидин суратназ икрам апӀру адмийириин алаънийи.

³ Кьюрпири чан гъаб гьюлериинди удубзуру, ва шид майтин ифдиз илтӀибкӀуру – вари гьюлиъ айи чӀивишин йибкӀуру.

⁴ Шубурпири чан гъаб нирариинди ва булагъариинди удубзуру, ва дурарра ифдиз илтӀикӀуру.

⁵ Хъа штарин малайикди гъапиб гъеебхьзуз: «Уву гьякь вува, эй Айир, Гъахьир ва Гирамир, гьамци жаза гьадабтӀбаз:

⁶ дурари гирамидарин ва пайгъамбрарин ифи удубзну, гьаддиз Уву дурариз убхъуз ифи тувунва – дурар лайикь ву!»

⁷ Хъа узуз, гъурбнар ургру йишвура фици кӀуйиш гъеебхьзуз: «Ав, Агъа Аллагь, вари хили Дибиснайир, дугъри ва гьякь ву Яв адабтӀурайи жаза!»

⁸ Юкьурпири чан гъаб ригъдиинди улубзуру, ва ригъдиз чан цӀиинди адмийир ургуз гъитру кьувват тувру.

⁹ Яман убцрушнаан адмийир ургуйи ва гьацдар бедбахтвалар гьау Аллагьдин ччвурназ агьрар апӀуйи. Аммаки дурар, чпин тӀулар гъитну, швумал гъахьундайи ва Дугъан ад гъапӀундайи.

¹⁰ Хьурпири чан гъаб вягьши гьяйванатдин тахтниинди удубзнийи ва дидин паччагьлугъ мучӀушнаъ абхънийи. Адмийири, иццрушнаан чпин мелзариин кьацӀар алахьуйи,

¹¹ ва бедбахтваларна иццрушнар гьаъну кӀури Аьршарин Аллагьдиз агьар апӀуйи. Аммаки дурари чпин тӀулар дирчундайи, я гардандиъ гъидисундайи.

¹² Йирхьурпири чан гъаб машгьур нир Ефратдиинди удубзуру ва дидиъ айи шид, ригъ гьудубчӀвру терефариъ айи паччгьариз рякъ ачмиш хьуз, ебццуру.

¹³ Узуз, аждагьайин ушвниан, вягьши гьяйванатдин ушвниан ва кучӀлин пайгъамбрин ушвниан чру гъюбариз ухшар айи шубуб чиркин рюгьяр удучӀвури гъяркъзуз.

¹⁴ Мурар, аьламатар улупру жинарин рюгьяр ву: дурар, Аллагьдин, вари хилиъ Дибиснайирин зурба гъиямат йигъаз дявдиз гьязур йихьай кӀури, дюнʼяйин вари паччгьарихьна гъягъюру.

¹⁵ «Магьа, Узу тӀафалси, хабарсузди гъидиза. Хушбахтавар ву ккилигурайир ва чан палтар уьрхюрайир, дицир гъяцӀалди гъягъидар, ва гьич саризра дугъан аьйибнан йишвар рякъидар!»

¹⁶ Ва дурари паччгьар жугьуд чӀалниинди Армагедон кӀуру йишвʼина уч апӀуру.

¹⁷ Хъа ургурпи малайикди чан гъаб гьавайизди удубзуру. Аьршарин Хулаъ, тахтнахьан гьамци кӀурайи зурба дих гъюру: «Тамам гъапӀну!»

¹⁸ Хъа кьюркьлин цӀйир, гьарйир, гъугърумар ва жилар тӀурччвувалар шулу. Гьамкьан яманди жилар тӀурччвувал дюнʼяйиин адми гъахьихъанмина гъахьундайи.

¹⁹ Машгьур вуйи шагьур шубуб йишваз гъутӀубкӀнийи, Аллагь гьясбикк ккадрурарин шагьрар ккадахьнийи. Машгьур вуйи Вавилон кӀуру меркез Аллагьди кӀваин гъапӀнийи ва дидиз Дугъу Чан пис хъял айи чяхрин зах тувнийи.

²⁰ Хъа вари островар гъудургнийи, дагълар дихъури имдайи!

²¹ Завариан адмийириина йирхьцӀур килакьан айи мирккар гъургънийи. Гьамциб миркклин бедбахтвал гьапӀу Аллагьдиз адмийири хъа яман агьрар апӀуйи, гьаз гъапиш му бедбахтвал гизаф аьхюб вуйи!