Ачмиш 14 - Гирами Китаб

Сион дагъдиин цӀийи мяъли

¹ Хъа узуз гъяркъюнзуз: магьа, Сион дагъдиин Ччил дийигъна, Дугъахъди – гьадму варжна ягъчӀвурна юкьуд агъзур, унтӀʼин Исайин ччвур ва Дугъан Адашдин ччвур дидикӀнайидар.

² Хъа узуз завариан, ягъли гъарзарилан убсрайи нирин гъугъсиб ва завар рахбан гъугърумарстар дихар гъеерхьунзуз. Узуз гъеерхьу дихар гьацдар, мукьмар йивурайи чюнгринстар вуйи.

³ Дурари тахтнан улихь ва юкьрид гьяйванатарстаринна къарна юкьур аьхюдарин улихь цӀийи мяъли апӀурайи. Думу мяъли, дюнʼяйин тухмигъян гъядягънайи гьадму варжна ягъчӀвурна юкьуд агъзур касдихьантӀан гъайри, сарун гьич сарихьанра кӀваъланди дубгъуз шулдайи.

⁴ Дурар дишагьлийирихъди чиркин дархьидар, хъа чпин марццишин гъюбхдар ву; дурар, Ччил наанди гъушиш, Гьадгъахъди гъягърудар ву. Дурар имбу инсаниятдигъян гъядягънайидар ву. Дурар Ччилаз ва Аллагьдиз бин ва ккебгъувал вуди кадагънайидар ву.

⁵ Дурарин мелзназ кучӀал аьгъдайи, дурар кацӀдар дар.

Шубур малайик

⁶ Хъасин узуз, аьршарикк, гьаргандин Ужувлан хабар хьади, жилариин гьарсаб миллетдиз, тухмиз, чӀалназ ва халкьдиз дидкан хабар дебккри, тӀирхурайи жара малайик гъяркъюнзуз.

⁷ Дугъу аьхю дихниинди гьарай гъапӀу: «Аллагьдихьан гучӀ апӀинай ва Дугъан ад за апӀинай! Гьаз гъапиш Дугъу суд апӀру сяаьт хъубкьна! Гьаддиз зав, жил, гьюл ва булагъар яратмиш ГъапӀуриз икрам апӀинай!»

⁸ Сарсана, кьюрпи малайикра, сарпирин кьяляхъди тӀирхури, гъафи ва гьарай гъапӀу: «Ккадабхъну, ккадабхъну, ккадабхъну Вавилон, машгьур меркез, чан кьяппавалин чяхрихьди вари халкьар тухъ гъапӀу шагьур!»

⁹ Сарсана, шубурпи малайикра, кьюрпирин кьяляхъди, зурба дихниинди чӀигъар апӀури, гъафи: «Эгер шли вягьши гьяйванатдиз ва дидин суратназ икрам апӀураш ва хилʼин, ясана унтӀʼин дидин лишан капӀнаш,

¹⁰ гьадгъу Аллагьдин хъял айи захʼан фукӀа кпибикьди гьязур гъапӀу чяхир убгъиди. Дицирикан, цӀиъ ва гугуртдиъ, гирами малайикарин ва Ччилан улихь, зивзивар кчӀюкьиди.

¹¹ Дурарикан кчӀюкьюрайи зивзиварин кум гьаргандиз аьсрариан аьсрариз завариз удубчӀвура. Я йигъну, я йишвну сикинвал адар вягьши гьяйванатдиз, дидин суратназ, ва дидин ччвурнахъ лишан жандиин алапӀнайидариз».

¹² Гьамдиинди Аллагьдин гирами халкьдиз, Аллагьдин табшуругъар тамам апӀурайидариз ва Исайиз аьгьтлу вуйидариз мюгькам хьуз дих апӀура.

¹³ Мидхъан узуз завариан гьамци кӀурайи дих гъеебхьзуз: «БикӀ: „Хушбахтаврар ву, Иса Месигьдихъ хъугъну, гъийихдар“, „Ав, думу гьаци ву, – кӀура Рюгьну, – дурари, чпин гъагъишнариккан ккудучӀвну, рягьятвал гъадабгъура, гьаз гъапиш дурари гъапӀу ляхнар гьадрарихъди гъягъиди“».

Хъугъувалин иган

¹⁴ Ва магьа узуз лизи диф гъябкъзуз, хъа дифриин фуж-вуш Инсаниятдин Бализ ухшар алир деъна. Дугъан кӀулʼин гъизилин таж ал, хъа хилиъ учӀру дагьур а.

¹⁵ Хъа сарсана малайик Аьршарин хулʼан дифриин деънайириз аьхю дихниинди чӀигъ апӀури, удучӀву: «Яв дагьур гьапӀ ва убг! Гьаз гъапиш иган убгру вахт хъубкьна – дюнʼяйин мягьсул хъубкьна!»

¹⁶ Дифриин деънайири, хил хъапӀну, чан дагьур жилиина гатӀабхьуру, ва жилин вари иган дубгну шулу.

¹⁷ Хъасин Аьршарин Хулʼан жара малайик удучӀвуру, дугъахьра учӀру дагьур хьайи.

¹⁸ Сарсана цӀин аьхювал хьайи малайикди, гъурбнар ургрушвлан гъедергну, учӀру дагьур хьайи малайикдиз аьхю дихниинди кӀуру: «ГьапӀну яв дагьур, дюнʼяйиин али тӀумтӀарин багъдиан тӀумтӀарин кабар ккудутӀ, гьаз гъапиш дурар хъуркьна».

¹⁹ Малайикди чан дагьур дюнʼяйиинди гатӀабхьуру ва тӀумтӀар ккудутӀуру, хъасин дурар, Аллагьдин хъял айи кчӀюкьрушвазди ахьру.

²⁰ Хъа кабар шагьрин гъирагъдихъ, ликариккан апӀури, кчӀюкьюру, ва кчӀюкьрушван даргарилан ифи улдубзуз хъюбгъру. Удубзу ифди, дийибгънайи гьяйвнин фурийиккнакьан ягъалди, юкьуб аьтраф шубудварж километрин манзилназ жил алабцӀуру.