Ачмиш 13 - Гирами Китаб

Гьюлʼан гьяйванат

¹ Узуз гьюлʼан, йицӀуб кӀарч али, ургуб кӀул али, кӀарчариин йицӀуб таж али, хъа кӀуларик Аллагьдиз люкьнар кайи вягьши гьяйванат удубчӀвури гъябкъюнзуз.

² Узуз гъябкъю вягьши гьяйванат леопарддиз ухшар вуйи, хъа ушв – асландинсиб. Аждагьайи дидиз чан кьувват, тахт ва зурба гьюкум тувнийи.

³ Дидин кӀуларикан сабнубдиз йибкӀрубсиб зиян дубхьну рябкъюйи, аммаки думу зиян сагъ гъабхьнийи, ва вари дюнʼя, мюгьтал дубхьну, гьадму вягьши гьяйванатдихъди гъубшнийи.

⁴ Хъа адмийири, аждагьайи чан гьюкум вягьши гьяйванатдиз тувиган, дидиз икрам гъапӀу, хъасин, гьамци кӀури, дурари вягьши гьяйванатдизра икрам апӀуру: «Фуж шулу гьаму гьяйванатдихь тевуз, шлихьан шул мидихъди элегуз?»

⁵ Дидиз, дамагъ кайи ва Аллагьдиз люкьнар апӀру гафар пуз, ихтияр тувнайи ва дидиз гьюкумра ягъчӀвурна кьюд йигъаз тувнайи.

⁶ Диди Аллагьдиз люкьнар апӀуз чан ушв абццру – люкьнар Дугъан ччвурназ, Думу яшамиш шулайишваз ва Аьршарин агьлариз апӀуру.

⁷ Дидиз Аллагьдин гирами халкьдихъдира дяви гъабхуз ва гъалиб хьуз ихтияр тувнайи. Дидиз гьацира гьарсаб тухмин, халкьдин, чӀалнан ва миллетдин зиин гьюкум тувнайи.

⁸ Дюнʼя арайиз хайиз гъурбан апӀуз гьязурди айи Ччилахь хьайи уьмрин китабдик ччвурар ктру жилин вари адмийири дидиз икрам апӀиди.

⁹ Шлик ерхьру ибар каш, гъит ебхьри!

¹⁰ Шли йисирар дисураш, думу учв йисирди дисиди. Шли ханжли йикӀураш, думу учв ханжлихьан йикӀиди. Гьамдиинди Аллагьдин гирами халкьдиз чпин мюгькамвал ва хъугъувал уьбхюз дих апӀура!

Жилиан гьяйванат

¹¹ Хъасин узуз жилиан удубчӀвурайи жара вягьши гьяйванат гъябкъзуз. Дидʼин, Ччилʼинси, кьюб кӀарч алийи, амма диди аждагьайиси гафар апӀуйи.

¹² Дидиз сабпи вягьши гьяйванатдинсиб гьюкум тувнайи. Диди сабпи вягьши гьяйванатдиз варибдиъ кюмек апӀуйи. Диди дюнʼяйиин вари адмийирихьди йибкӀрубсиб зиян сагъ дубхьнайи сабпи вягьши гьяйванатдиз икрам апӀуз гъитуйи.

¹³ Диди зурба аьламатар улупуйи: адмийирин улихь завариан жилариина цӀа гъюз гъитуйи.

¹⁴ Сабпи вягьши гьяйванатдин ччвурнахъан аьламатар улупури, диди дюнʼяйин адмийир улдугуз гъитуйи. Диди ханжал йивну зиян гъапӀу ва, хъана сагъ гъабхьи сабпи вягьши гьяйванатдин гьюрматназ сурат балгуз, буйругъ гъапӀу.

¹⁵ Гьадму суратну гафар апӀбан ва диди чаз икрам дарапӀрудар йихбан бадали, вягьши гьяйванатдин суратниин ил алапӀнийи; дидиз гьаци ил алапӀуз удукьрувал тувнайи.

¹⁶ Диди варидариз: гъулугъчйириз ва гъулугънахь хьтрудариз, девлетлуйириз ва касибариз, лукӀариз ва азаддариз – арччул хлик, ясана унтӀак лишан капӀуз гъитуйи.

¹⁷ Дициб лишан (вягьши гьяйванатдин ччвур, ясана число) кадрурихьди мутму я гъадабгъуз, я масу тувуз гъитри гъахьундар.

¹⁸ Мушваъ аькьюл лазим ву: фикирлу кас гъит, вягьши гьяйванатдин числойиъ айи мянайин гъаври ахъри. Думу число адмийиринуб ву, магьа дидин число: 666.