Ачмиш 12 - Гирами Китаб

Дишагьли ва аждагьа

¹ Хъа завариин зурба лишан арайиз гъюру: ригъ алабхьнайи дишагьли, дугъан ликарикк – ваз, хъа кӀулʼин – йицӀикьюб хядракан вуйи таж.

² Дишагьлийик бицӀир ка ва аьзиятариан чӀигъар апӀура; думу бицӀир апӀуз ктӀерццуз хъюгънайи.

³ Завариин жара лишанра арайиз гъюру: зурба цӀаси уьру аждагьа, ургуб кӀул али, йицӀуб кӀарч али ва кӀулариин ургуб таж али.

⁴ Дидин рижвну завʼан шубубпи пай хядар илжикуру ва жилиинди ахьру. Аждагьа, бицӀир апӀурайи дишагьлийиз къаршуди дугъу бицӀир гъапӀубси, итӀуз ккепӀну дийибгънайи.

⁵ Дугъу бай гъапӀу. Думу Бали рукьан чумакъихьди вари халкьариин гьюкум гъабхиди. Дугъан бицӀир Аллагьдихьна, Дугъан тахтнахьна гъахуру.

⁶ Хъа дишагьли ичӀи чюлиз гьергру. Душваъ дугъаз Аллагьди йишв ккабалгнайи. Дина дугъаз агъзурна кьюдваржна йирхьцӀур йигъан хураг гъабхиди.

⁷ Хъа завариин Мукаил малайикдина дугъан малайикари аждагьайихъди дяви ккебгъру. Аждагьайи дяви чан малайикар хъади апӀурайи,

⁸ хъа дурарихьан гъалиб хьуз гъабхьундайи ва завариъ дидин йишв гъудубгнийи.

⁹ Хъасин зурба аждагьа, дегь заманайин битӀ, иблис вая Сатана, вари дюнʼя улдубгуз гъибтрайиб, завариан жилиина ипнийи. Дидихъди чан малайикарра идирчнийи.

¹⁰ Хъа узуз аьршариъ гьамци кӀури зурба дих гъеебхьзуз: «Магьа хъубкьна уьрхювал ва кьувват, васана ич Аллагьдин Паччагьлугъ, ва Дугъан ччим Кадатнайирин гьюкум, гьаз гъапиш ихь чвйирин футнакар идипну, Аллагьдин улихь йишвди-йигъди дурарилан футнийир апӀурайиб.

¹¹ Ихь чвйир аждагьайиин, Ччилан ифдиинди ва чпин шагьидвалариинди гъалиб гъахьну. Дурари аьжалин улихь чпин уьмур гьяйиф гъапӀундар.

¹² Гьаци вуйиган шадвалин сес ипай, аьршар ва душван агьлар! Язухъ ву жилин ва гьюлин! Учвухьна яман хъял ади, чан вахт хъубкьнайиб аьгъяди, иблис дуфна».

¹³ Аждагьайиз учв жилиина илдипну гъябкъиган, думу бай гъапӀу дишагьлийихъ хъебгру.

¹⁴ Дишагьлийиз чаз ичӀи чюлиъ улупнайи йишваз, аждагьа дяргърушваз ва шубуд йисна гьацӀаъ хураг хрушваз тӀирхуз, люкьран кьюб аьхю хлинцц тувру.

¹⁵ Дишагьлийин кьяляхъди, думу ккахъбан бадали, аждагьайи чан ушвниан зурба нир деебтуру.

¹⁶ Хъа жили дишагьлийиз кюмек апӀуру: диди чан ушвар арццру ва аждагьайи чан ушвниан деебту нир убхъуру.

¹⁷ Аждагьайиз дишагьлийикан яман хъял гъюру ва думу гъитну, дугъан имбу бицӀидарихъди, Аллагьдин табшуругъар уьрхрударихъди ва Исайикан шагьидвал апӀрударихъди дяви гъабхуз гъябгъюру.

¹⁸ Хъа аждагьа гьюлин гъирагъдихъ дугъубжвуру.