Ачмиш 11 - Гирами Китаб

Кьюр шагьид

¹ Узухьна жилар ерцрубсиб маргъ тувнийи ва гъапнийи: «Душну Аллагьдин хал ва гъурбнар ургрушв ебц, хъа гьадму Хулаъ икрам апӀрударин кьадар гьисаб апӀин.

² Аммаки Хулахъди хъайи чӀатан гьяят гъидип, думу меебцан, гьаз гъапиш душвайишв аллагьсузариз тувна, дурари гирами шагьур ягъчӀвурна кьюб вазли ликриккан апӀиди.

³ Узу Йиз кьюр шагьид тувдиза: дурар, чӀуру ирин палат алабхьну, агъзурна кьюдваржна йирхьцӀуд йигъан, пайгъамбрарси, пайгъамбарвалин гафар кӀури гъузди».

⁴ Му пайгъамбрар – жилин Агъайин улихь дийигънайи оливайин кьюб гьарна, акв тувру кьюб алат ву.

⁵ Эгер шлизкӀа дурариз чӀуруб апӀуз ккун гъабшиш, дурарин ушвниан цӀа утӀубччвиди ва душмнар ургиди. Дурариз писвал апӀуз саризра ккун хьибдар, гъапӀиш, гьаци йикӀиди.

⁶ Дурариз зав хъябкьюз гьюкум а; дурарихьан чпин пайгъамбарвалин гъуллугъниин али вахтна мархь дурубгъри гъитуз шулу; дурариз шид ифдиз илтӀибкӀуз шлу гьюкум тувна; дурарихьан, чпиз фициб ккундуш, гьациб бедбахтвалихьди жил алабцӀуз шулу.

⁷ Дурарин шагьидвал апӀру вахт ккудубкӀган, кӀан ккадрушвʼанзина удубчӀву вягьши гьяйванат гьадму кьюрид пайгъамбрарихъди дявдиз удубчӀвиди, гьяйванат гъалиб хьибди ва дурар йихиди.

⁸ Дурарин майтар аьхю шагьрин кючейиъ дирчну хьиди. Жара жюрейиинди думу шагьриз, дурарин Агъа хачрак карсу йишваз, Содом ва Египет кӀури шулу.

⁹ Дурарин майтариз, вари халкьаригъян, тухмариан, чӀалариан ва миллетаригъян адмийир шубуд йигъанна гьацӀаъ лигури гъузди ва дурар кивуз гъитдар.

¹⁰ Дюнʼяйиин али адмийир шад хьиди, мяракйир ачмиш апӀиди, чиб-чпиз пешкешар апӀиди, гьаз гъапиш гьадму кьюрид пайгъамбрари дюнʼяйин халкьар аьзабнакк ккитнийи.

¹¹ Шубуд йигъна гьацӀ улдубчӀвган, Аллагьдихьан уьмрин рюгь майтариъ убчӀвди, ва пайгъамбрар чпин ликриина гъудужвиди, хъа дурариз лигурайидарик зурба гучӀ кабхъди.

¹² Пайгъамбрариз завариан чпиз: «Мина удучӀвай!» – кӀурайи зурба дих гъеебхьнийи. Душмнариз рякъюри, дурар дифриинди завариз за шулу.

¹³ Гьадму вахтна лап яманди жилар тӀурччвуру ва шагьрин йицӀубпи пай дарабгъну абхъру. Жилар гъутӀурччвган, ургуд агъзур кас гъийихнийи, хъа имбудариз гучӀ гъабхьнийи ва дурари Аьршарин Аллагьдин ад за апӀуз хъюгънийи.

¹⁴ Кьюбпи дерд гьудубчӀвнийи. Хъа магьа шубубпи дерд гъюз гьялакди а!

Ургубпи зурна

¹⁵ Ургурпи малайикди зурна хъапӀу, ва завариъ гьамци кӀурайи зурба дихар арайиз гъафи: «Гьаму дюнʼяйин паччагьлугъ ич Агъайин ва Дугъан Месигьдин Паччагьлугъ гъабхьну. Дугъу гьаргандиз, аьсрариан аьсрариз паччагьвал апӀиди!»

¹⁶ Аллагьдин улихь тахтариин деънайи къарна юкьур аьхюр, жилиина ахьну, Аллагьдиз, вари хилиъ Дибиснайириз, икрам гъапӀу.

¹⁷ Хъа гьамци кӀури, гьарай идипу: «Чухсагъул Увуз, Агъа Аллагь, вари хилиъ Дибиснайир, гьарган Айир ва Гъахьир, гьаз гъапиш, Уву Яв зурба вуйи кьувват ва паччагьвал хилиз гъибисунва.

¹⁸ Аллагьсузар аргъарди гъадагъна, хъа гьамус Увукра хъял кубчӀвнавук: дийихнайидарин суд апӀру ва дюнʼя чӀур апӀурайидар пуч апӀру, ва Яв лукӀарди гъахьи пайгъамбрариз, Яв гирами халкьдиз, Яв ччвурназ гьюрмат гъапӀу бицӀи касаризси, зурба вуйидаризра лайикьлу пешкешар тувру вахт дуфна».

¹⁹ Аьршариъ Аллагьдин хал абццру ва Душваъ Дугъан Йикьрар айи сундух рябкъюри шулу. Хъасин кьюркьлин цӀийир кричуру, гьарай абхъру, гъугърумарин гъугъ абхъру, жилар тӀурччвуру ва гужли миркк убгъуру.