Ачмиш 10 - Гирами Китаб

Дибиржнайи китаб хьайи малайик

¹ Узуз дифариъди завариансина гъюрайи сарсана кьудратлу малайик гъяркъзуз. Дугъан кӀулʼин дерккучӀимир алийи, машну ригъдиси нур туврайи, хъа ликар цӀин бурузарстар вуйи.

² Дугъан хилиъ, саб кьадар ачмиш дапӀнайи кагъаз айи. Дугъу арччул лик гьюлериин диву, хъа гагул лик – жилариин,

³ ва зурба дихниинди, аслан арабхруганси, гьарай гъапӀу! Дугъу гьарай гъапӀиган, завар рахрустар, ургуб гъугъруми гафар апӀуз хъюгъю.

⁴ Ургбиб гъугърумари гафар гъапӀиган, узу бикӀуз гьязур гъахьиза. Аммаки узуз завариан гьамци кӀурайи дих гъеебхьзуз: «Ургбиб гъугърумари гъапиб жиниди уьбх. Думу гафар мидикӀан!»

⁵ Узуз гьюлʼинна жилиин дийигъну гъяркъю малайикди арччул хил завариз за гъапӀу,

⁶ ва аьсрариан аьсрариз гьарган яшамиш Шулайириинди, завар ва душваъ айиб, жилар ва душвʼин алиб арайиз Гъабхуриинди, сарун вахт имдар кӀури, ху гъапӀу!

⁷ Хъа гьадму йигъари, ургурпи малайикдин зурна гъарабхган, Аллагьдин сир, Дугъу Чан гъуллугънаъ гъаши пайгъамбрариз хабар дебккганси, вари тамам хьибди.

⁸ Узуз завариан гъеебхьу дихну, узухьинди илтӀикӀну гъапизуз: «Душну, гьюлʼинна жилиин дийигънайи малайикдихьан ачмиш дапӀнайи китаб бис».

⁹ Узу, багахь духьну, малайикдихьан гьадму китаб узухьна тувуб ккун гъапӀза. Хъа дугъу узуз гъапи: «Ма, му ипӀин, фуниъ кьутӀкьлишин абхъдияв, хъа ушв йиччвси меъли хьибдияв».

¹⁰ Узу думу китаб, малайикдин хилʼан дибисну, гъипӀза ва йиз ушвниъ, йиччв гъипӀганси, меълишин абхъу, хъа фуниъ – ктирсуз даршлу кьутӀкьлишин.

¹¹ Хъа узуз гъапи: «Уву аьхючӀвеъ халкьарикан, миллетарикан, чӀаларикан, ва паччгьарикан пайгъамбарвалин гафар хъана пуз буржлу вува».